Ɛksadɔso 15:20 - AHYERƐLƐ KRONGRON

²⁰ Afei ngɔmhyɛlɛniɛ Miriam bɔ ɔte Aarɔn aliɛma brasua ne, ɔfale akasaa tirale, na mmrasua ne amukoraa bɛwosole akasaa begole abilie befitele belili ye si.

Ɛksadɔso 15:20 Iomraidhean Croise

Gyenesise 31:27

Nzu ati yeɛ ɛyɛle kudɛɛ nwatili na ɛlakalakale me ɔ? Nzu ati yeɛ ammɔ me amaneɛ maa mamva anigye ne edwein ne akasaa ne sangoo mangua wɔ ate ɔ?

2 Samuel 1:20

Nnɛma ɛmɔbɔ so wɔ Gate, nnɛma ɛmɔbɔ ye nwo dawure wɔ Asekelɔn dwaaso; ɛmɔbɔ so a, Filisti mmrasua koli ahurusi, na mmenia bɔ bɛmbɛ bɛ bienzua ne, bɛ mmrasua nye kɔgye.

2 Samuel 6:14

Dawide fale ye anwoserɛ amukoraa gole abilie wɔ AWURADE nyunu. Né Dawide afa ɔsɔfo ataadeɛ bɔ ɔte nwera ɔ wapɛ ye bo.

2 Samuel 6:16

Mmerɛ bɔ AWURADE alaka ne oodwuli Dawide kuro berɛ nen, Sɔɔlo awa brasua Mikal tole ye nye neane mboma nu. Onwuni kyɛ Nana Dawide ohuru pepe go abilie wɔ AWURADE nyunu ɔ, na obuli Dawide animtia wɔ ye ti anu.

2 Samuel 6:5

Na Dawide ne Yisrael awuro ama amukoraa bɛfale sangoo, adengum, akasaa, donno ne firikyiwa bɛfale b’anwoserɛ mu bɛtole dwein begole abilie wɔ AWURADE nyunu.

2 Ahemvo 22:14

Yiti ɔsɔfo Hilkia, yeɛ Ahikam, Akibɔ, Safan ne Asaya besili nu bɛhɔle ngɔmhyɛlɛniɛ brasua Hulda berɛ. Ohu ole Salum bɔ ye baba ole Tikiwa, bɔ ye baba ole Hahase bɔ ɔnea asɔfo mɔ bɛ ndaadeɛ so ne. Né Hulda te Yerusalem borɔnoɛ foforɛ paa ne aso, na berɛ yeɛ bɛhɔle ye berɛ beebisale Nyameɛ noa dwirɛ ɔ.

1 Aberɛso Dwirɛ 15:16

Dawide sa fale ahyɛdeɛ mane Lewi abusua kure mbanyi ne, kyɛ bɛye edweintolɛfoɛ maa bɛbɔ sangoo, adengum ne firikyiwa bɛto anigye dwein.

1 Aberɛso Dwirɛ 6:3

Amram mma ole Aarɔn, Mose ne Miriam. Aarɔn mma mmienzua ole Nadabo, Abihu, Eleasa ne Yitama.

Nehemia 6:14

Ao me Nyameɛ, kaye Tobia ne Sanbalate kyɛbɔ bɛ yɔleɛ si te ɔ. Afei koso, kaye ngɔmhyɛlɛniɛ brasua Noadia ne ngɔmhyɛlɛfoɛ ngaa nemɔ bɔ bɛpena kyɛ ɛserɛ kã mene.

Edwein 149:3

Odi kyɛ bɛfa abilie bɛye ye dumaa ayɛ, odi kyɛ bɛfa akasaa ne adengum bɛto ye nwo dwein.

Edwein 150:4

Ɛ́mɔfa akasaa ne abilie bɛ́ye ye ayɛ; ɛ́mɔfa sangoo ne awɛen bɛ́ye ye ayɛ!

Edwein 30:11

Ama m’aworabɔlɛlilɛ wakakyi ahurusililɛ; aye me nwo ɛsɛen tena ne agua berɛ, na afa anigye ahera me,

Edwein 68:11

AWURADE fa ye noa dwirɛ ne ɔma, na bɛ bɔ bɛbɔ ye nwo dawure ne, bɛsone pee.

Edwein 68:25

Edweintolɛfoɛ nemɔ li moa, sangoobɔlɛfoɛ nemɔ li nziɛ, ndaluwa li bɛ nu bɛwoso akasaa kyɛ,

Edwein 68:26

“Ɛ́mɔhyɛ Nyameɛ animnyam wɔ badwa kandinga ne anu, ɛmɔ bɔ Yisrael suli ɛmɔ ne, ɛ́mɔhyɛ AWURADE animnyam!”

Edwein 81:2

Ɛ́mɔkenga edwein, ɛ́mɔwoso akasaa ne, ɛ́mɔbɔ sangoo fɛɛfɛɛ ne adengum ne.

Ɛksadɔso 2:4

Na adɔma n’aliɛma brasua oogyinane dedeede neane bɔ ɔkɔto adɔma ne ɔ.

Nworɛ Dwirɛhanɛniɛ 3:4

esuɛ le ye mmerɛ, yeɛ ɛserelɛ le ye mmerɛ, awuyebɔlɛ le ye mmerɛ, yeɛ abiliegolɛ le ye mmerɛ;

Yeremia 31:4

Ao Yisrael ababunu, ngosa ngɔma wɔ bo kotimu, na wɔ bo kotimu. Ekosa kɔfa w’akasaa ne kosiesie wɔ nwo, na ɛkɔfa ahurusililɛfoɛ b’abilie kosi nu kɔhɔ.

Mika 6:4

Ofikyɛ nyele wɔ mvili Misraim aseɛ so mmale, mbɔle wɔ mvili ngoaasolɛ nu, na nzomane Mose, Aarɔn ne Miriam maa belili wɔ nyunu.

Numeri 12:1

Mmerɛ bɔ né bɛwɔ Haserote né, Miriam ne Aarɔn dwudwo tiale Mose, ɔnate kyɛ né Mose waagya Kuseniɛ braa bie (né wagya Kuseniɛ braa amba).

Numeri 12:2

Na besele kyɛ, “Aso Mose ngome yeɛ AWURADE afa ye so wadwudwo anaa? Aso yɛ koso, ɔffale yɛ so oddwudwole anaa?” Na AWURADE tele sɔ dwirɛ ne.

Numeri 20:1

Bosome bɔ oli moa ne anu, Yisrael maen ne amukoraa beedwuli Sen ɛserɛ ne aso, na mmenia ne tenane Kadese. Berɛ yeɛ Miriam wuli ɔ, na berɛ yeɛ besiele ye ɔ.

Numeri 26:59

Amram ɔye ole Lewi awa brasua Yokebɛde. Lewi wole Yokebɛde wɔ Misraim, na Yokebɛde ne Amram bɛwole Aarɔn ne Mose yeɛ b’eliɛma brasua Miriam.

Luka 2:36

Né ngɔmhyɛlɛniɛ braa bie bɔ bɛfrɛ ye Ana ɔ ɔwɔ berɛ bie. Ɔte Fanuel bɔ ofi Asɛ abusua nu ɔ ɔwa. Né wanyi paa, na ogyale biaa wɔ ye ababunu nu ɔne ohu bɛtenane afoɛ nzoo.

Asomafoɛ 21:9

Né ole mmaa mmrasua nna. Bɛte mmabunu bɔ bɛhyɛ ngɔm ɔ.

1 Korintofoɛ 11:5

Nakoso brasua biala bɔ ɔbɔ mbaeɛ anaakyɛ ɔhyɛ ngɔm ná wangata ye ti so ne, onni ye mene ni; na ɔte kyɛ wabɔ tikwa ne ala.

1 Korintofoɛ 14:34

ɛ́mɔma ɛmɔ mmrasua mɔ bemua bɛ noa wɔ asɔre mɔ nu. Ofikyɛ belle ye nwo ate kyɛ bedwudwo ɔ, na mmom bɛbrɛ bɛ nwo ase kyɛbɔ mmeraa ne kã ne.

Maenbulɛfoɛ 11:34

Afei Yɛfeta sa wale ye awuro wɔ Misepa. Na edwirɛ nwanwa! Ɔwa brasua ne le akasaa ne abilie fitele kyɛ ɔbaayia ye! Né odi ye bahorɛ. Né olle baa bienzua anaa baa brasua ko boka ye so.

Maenbulɛfoɛ 21:21

ná ɛ́mɔnea. Sɛ Silo ndaluwa nemɔ fite ba kyɛ bɛbaago b’abilie ne a, ɛ́mɔfi bobe boo nemɔ anu befite. Ɛmɔ anu biala ɔɔbɔ Silo brasua ko abum ɔfa ye yɛ ɔye, ná ɛmɔfa bɛ bɛhɔ Benyamin aseɛ so.

Maenbulɛfoɛ 4:4

Sɔ mmerɛ ne, ngɔmhyɛlɛniɛ brasua Debora bɔ ohu ole Lapidote ne, ye yeɛ né ɔla Yisrael noa ɔ.

1 Samuel 10:5

Na ɛhe asi ne, ekoodwu Gibeate Elohim, wɔ nekaa bɔ Filistifoɛ koɛhonɛfoɛ atenaleɛ wɔ ne. Na sɛ ɛkwaawura kuro ne anu a, ekoyia ngɔmhyɛlɛfoɛ kure bɔ befi asɔneyɛɛ so dɔ bɛ́torotoro bɛ́ba, bɔ adengum, akasaa, aweɛn ne sangoo angorɛ li bɛ nyunu ɔ. Na ekonwu kyɛ bɛ́hyɛ ngɔm ɔ.

1 Samuel 18:6

Mmerɛ bɔ Dawide huni Filistiniɛ ne, ná ɔne koɛhonɛfoɛ nemɔ besa bɛba nen, mmrasua fale edwein ne abilie befili Yisrael nguro ne amukoraa so beeyiale Nana Sɔɔlo. Né bele akasaa ne firikyiwa bɛ́to anigye dwein.