Ɛksadɔso 12:29 - AHYERƐLƐ KRONGRON

²⁹ Ye abunnamu ne, AWURADE huhuni Misraim aseɛ so bamuɛbaa mmienzua mukoraati, fite Faro bamuɛbaa bienzua bɔ ɔtena ye bia so ɔ so, kodwu sona bɔ bahye ye nnure bawura kuku nu ye bamuɛbaa so, ɔne nyɛmmoa mɔ bɛ bamuɛbaa mɔ so.

Ɛksadɔso 12:29 Iomraidhean Croise

Gyenesise 15:14

Nakoso ngobua maen bɔ bɛkɔso ye ne ndɛen, na ɛhe asi ye, bɛkɔfa anwonya pee paa bekofi maen ne anu bɛkɔhɔ.

YOB NWOMAA NE 34:20

Bewu mvum nu, bɛ nwo wosowoso bɛ abunnamu, na ewue fa bɛ kɔ, na atitirefoɛ po, ɔye bɛ fi berɛ bɔ ɔmva sona so ɔ.

Edwein 105:36

Ohuhuni bɛ maen ne anu bamuɛbaa amukoraa, bɔ bɛte bɛ bienzua nu anwoserɛ amukoraa bɔ oli moa ne.

Edwein 135:8

Ye yeɛ ohuhuni Misraimfoɛ bamuɛbaa mɔ ɔ: mmenia ne ngaka bɛ bamuɛbaa mɔ.

Edwein 136:10

Ye bɔ ohuhuni Misraimfoɛ bɛ bamuɛbaa mɔ ɔ, ofikyɛ ye ɔdɔ bɔ onni ngasi ne, ɔwɔ berɛ afebɔɔ;

Edwein 78:50

Ɔmane ye nye borole bɛ so, wambepɛ wanne bɛ wamvi ewue sa nu, na mmom ɔfale bɛ ngoa wurale ɛhawo piri ne sa.

Edwein 78:51

Misraimfoɛ bamuɛbaa amukoraa, bɔ bɛte bɛ bienzua nu anwoserɛ bɔ oli moa ne, ohuhuni bɛ wɔ Ham ɛtena sua nemɔ anu.

Ɛksadɔso 11:1

AWURADE sele Mose kyɛ, “Waha amaneɛ pirikua ko bɔ mebaafa meto Faro ne Misraim so ɔ. Ɛhe asi ye, ɔkɔmaa ɛmɔkofi wa bɛkɔhɔ, na sɛ ɔma ɛmɔ ate a, ɔkɔfoa ɛmɔ maa ɛmɔkofi wa.

Ɛksadɔso 12:12

Ngɔɔpɛ nu Misraim aseɛ so sɔ kyẽa ne kɔngɔen, na ngohũ Misraim aseɛ so bamuɛbaa mukoraa, fite mmenia so kodwu ngaka so; na ngobua Misraim mmosoen amukoraa ndɛen. Me ole AWURADE.

Ɛksadɔso 12:28

Na Yisraelfoɛ mɔ hɔle bɛɛyɔle sɔ, kyɛbɔ AWURADE hyɛle Mose ne Aarɔn ne ala.

Ɛksadɔso 13:15

Ofikyɛ mmerɛ bɔ Faro bubuli mmakaa tuale ye so kyɛ ɔngɔma yɛngɔhɔ nen, AWURADE huhuni Misraim aseɛ so bamuɛbaa mukoraati, fite mmenia bamuɛbaa mɔ so, maa oodwuli nyɛmmoa bamuɛbaa mɔ so. Na ɔnate sɔ ati yeɛ mefa kaka bamuɛbaa bienzua biala mebɔ afɔleɛ mema AWURADE ɔ. Nakoso me mma mɔ bɛ nu bamuɛbaa bienzua biala de, mepɔ ye (mefi AWURADE berɛ).’

Ɛksadɔso 4:23

Na mekã mekyire wɔ kyɛ, “Ma mma ne ɔhɔ ɔɔsɔne me.” Na sɛ amma ye ate ma wangɔ a, ngohũ wɔ bamuɛbaa bienzua.’ ”

Ɛksadɔso 9:6

Aleɛ hyene ne, AWURADE yɔle sɔ ala. Misraimfoɛ nyɛmmoa mukoraa wuwuli, nakoso Yisraelfoɛ nyɛmmoa de, ko po anwu.

Yesaya 24:22

Ɔkɔboaboa bɛ mukoraa noa kyɛbɔ bɛboaboa kukunufoɛ noa wɔ kumaa nu ɔ, ɔkɔto bɛ nu wɔ kuku nu, na ngyẽa pee asi ne, ɔkɔhwe bɛ so.

Yesaya 41:11

Tie, bɛ bɔ bafɛ wɔ so yaa ne amukoraa, bɛ nyunu kogua ase, na bɛkɔfɛre; na bɛ bɔ bɛko betia wɔ ne, b’ayieleɛ koyie bɛ, na bekowuwu.

Yesaya 51:14

Sona bɔ babɔ ye panwu ne, bɛkɔye ye bekofi nu ndɛndɛ; ongowu wɔ ɛborɔ kumaa nu, yeɛ ye noa aleɛ ngɔbɔ ye.

Yeremia 38:13

Yeɛ bɛfale nyamaa ne bɛtwetwene Yeremia bɛyele ye befili abura ne anu. Na Yeremia hale kuku nu aluo berɛ.

Yeremia 38:6

Yiti bɛhyele Yeremia, na beegyili ye bɛtole Nana awa Malkiya ye abura bɔ ɔwɔ kuku nu aluo berɛ ne anu. Bɛfale nyamaa yeɛ bedwurale Yeremia bɛtole nu ɔ. Né nzue nne abura ne anu, na mmom asaa ngome, na Yeremia mene wɔ asaa ne anu.

Habakuku 3:5

Né ewue anwonyerɛ li ye nyunu, na né ɛhawo nate ye gya bo.

Sakaria 9:11

Na wɔ koso, ɔnate w’apam mogya ne ati, wɔ mmenia bɔ begua kuku nu ne, ngɔye bɛ ngofi kumaa bɔ nzue nne nu ne anu.

Numeri 3:13

ofikyɛ bamuɛbaa amukoraa te me deɛ. Mmerɛ bɔ ngukuni Misraim aseɛ so bamuɛbaa amukoraa ne, nduli Yisrael bamuɛbaa amukoraa nziele berɛ mane me nwo, kyɛ mmenia deɛ oo, kyɛ ngaka deɛ oo; bɛte me deɛ. Me ole AWURADE.”

Numeri 33:4

Sɔ mmerɛ ne, né Misraimfoɛ begu so besie bɛ bamuɛbaa mɔ amukoraa bɔ AWURADE ahũhũ bɛ wafi bɛ nu ne. Misraimfoɛ nyameɛ nemɔ koso, AWURADE amva bɛ nwo angyɛ bɛ.

Numeri 8:17

Ofikyɛ Yisraelfoɛ bamuɛbaa amukoraa, kyɛ sona oo, kyɛ kaka oo, ɔte me deɛ. Kyẽa bɔ nguni bamuɛbaa amukoraa wɔ Misraim aseɛ so ne yeɛ nduli bɛ nziele berɛ mane me nwo ɔ.

Hebrifoɛ 11:28

Ɔnate gyidie so yeɛ ɔfa hyehyɛle Abɔtra ne, ɔne mogya petenɛ wɔ b’anoa nyunu ɔ, kyɛbɔ ɔkɔyɛ ná ewue abɔfo ne wanguku bɛ bamuɛbaa nemɔ ɔ.

Hebrifoɛ 12:23

Ɛmɔawa Nyameɛ bamuɛbaa nemɔ bɔ bahyerɛ bɛ dumaa wɔ nyameɛso ne bɛ nyianu, ɔne Nyameɛ bɔ ɔte adasa mukoraa ndɛenbualɛniɛ ne berɛ, ɔne teneneefoɛ sunzum bɔ bali mu bayie nemɔ berɛ.