Ɛseta 9:3 - AHYERƐLƐ KRONGRON

³ Manzini nemɔ anu mbanyi ne mbɔtam mbanyi ne amrado mɔ ne ahemvie mbanyi gyinane Yudafoɛ si, ofikyɛ Modekae nwo suronyi tɔle bɛ so.

Ɛseta 9:3 Iomraidhean Croise

Ɛsra 2:2

Mmenia hemɔ yeɛ belili bɛ nyunu bɛfale bɛ bɛwale ɔ: Serubabɛl, Yesua, Nehemia, Seraya, Reelaya, Modekae, Bilsan, Misepare, Bigiwae, Rehum, yeɛ Baana. Yisrael mmienzua bɔ befili nnurehyelɛ nu bɛwale ne, bɛ somaa ɛhe:

Ɛsra 8:36

Asa koso, Nana Atasɛsɛse mmeraa bɔ ɔhyerɛle ye krataa nu ne, bɛye bɛmane ye mbɔtam mbanyi mɔ ne amrado mɔ bɔ begyi ye gya nu wɔ asue Yufreti si dɔ mbɔtam ne. Na bɛ koso bɛfale bɛ mmokalɛ bɛtale maen ne ne Nyameɛ awuro ne si.

Ɛseta 3:12

Bosome bɔ oli moa ne, ye kyẽa bɔ ɔtɔ so buru ne nza ne, bɛfrɛfrɛle Nana Ahasuro ahyerɛlɛfoɛ amukoraa maa beyiale, na bɛhyerɛle maa ɔyɛle mmeraa, kyɛbɔ Haman hyɛle kyɛ bɛyɔ ne ala. Na bɛfa bɛɛmane Nana Ahasuro mbɔtam mbanyi mɔ, amrado mɔ, maen maen nemɔ so mbanyi mɔ, manzini biala, kyɛbɔ ye ahyerɛlɛ ne nu mmenia dwudwolɛ si te ne, sɔ ala yeɛ bɛhyerɛle ye ɔ. Bɛhyerɛle ye Nana Ahasuro dumaa nu, na bɛfale ye nzɔanoɛ pɛteaa bɛsɔle ye noa.

Ɛseta 8:17

Manzini biala nu ne kuro biala so bɔ Nana Ahasuro mmeraa ne ahyɛdeɛ ne oodwuli ne, Yudafoɛ nyane anwosɛpɛ ne anigye, bɛtole poen, na belili afofi. Yeɛ maen maen mɔ bɔ bɛwɔ aseɛ ne aso ne, Yudafoɛ nwo suronyi tɔle bɛ nu pee so, yiti bɛ nu pee bɛɛyɛle Yudafoɛ.

Ɛseta 8:5

na ɔhane kyɛ, “Nana, sɛ ɛpene so, sɛ anwu me anwumvoin a, Nana, sɛ ɛnea ná ɔte paa a, yeɛ sɛ masɔ wɔ nye a, ye de ngrataa bɔ Agaginiɛ Hamedata ɔwa Haman nyane adwene tɛɛ hyerɛle fa hyɛle mmeraa kyɛ behũ Yudafoɛ bɔ bɛwɔ wɔ manzini amukoraa nu ne, hyɛ mmeraa maa bɛpɛ nu.

Ɛseta 8:9

Bosome nza bɔ yeɛ oli Siwan ne anu, ye kyẽa bɔ ɔtɔ so aburanyɔ ne nza ne, bɛfrɛfrɛle Nana Ahasuro ahyerɛlɛfoɛ maa beeyiale. Na edwirɛ biala bɔ Modekae hane ne, bɛhyerɛle maa ɔyɛle mmeraa, na bɛfa bɛɛmane Yudafoɛ, mbɔtam mbanyi, amrado mɔ ne manzini mbanyi bɔ bɛwɔ manzini ɛyaa ko aburanyɔ ne nzoo ne anu, fite Yindia bɔ ɔkwaadwu Yitiopia. Manzini biala, kyɛbɔ ye ahyerɛlɛ te ne, yeɛ mmenia biala, kyɛbɔ bɛ dwudwolɛ te ne, sɔ ala yeɛ bɛhyerɛle krataa ne ɔ, na bɔ bɛfa bɛɛmane Yudafoɛ ne koso, ɔte b’ahyerɛlɛ ne bɛ dwudwolɛ.

Daniel 3:2

Yeɛ Nana Nebukadenesa somane maa bɛɛfale mbɔtam mbanyi, mbanyi mɔ, amrado mɔ, foɛtulɛfoɛ, fotoɛsoneafoɛ, badwafoɛ, ndɛenbualɛfoɛ ne mbɔtam nemɔ aso mbanyi amukoraa, kyɛ amoen bɔ Nana Nebukadenesa wagyina bɔ ɔbaala ye ali ne, bɛbra berɛ bie.