Ɛseta 9:29 - AHYERƐLƐ KRONGRON

²⁹ Nana hemmaa Ɛseta bɔ ɔse ole Abihail ne, ogyinane tumi so hyerɛle krataa bɔ ɔtɔ so nyɔ ɔ, kyɛ odi kyɛ bedi Purim aluolue ne, na ɔfa foale Yudaniɛ Modekae krataa ne aso.

Ɛseta 9:29 Iomraidhean Croise

Ɛseta 2:15

Odwuli Ɛseta so kyɛ ɔkɔ Nana Ahasuro nyunu. Modekae bɔ ɔfale ye yɛle ɔwa ne, ye baba aliɛma bienzua Abihail ɔwa ɛne. Ɛseta anga kyɛ bɛma ye nningyein bɔ ɔfa siesie ye nwo ɔ. Nningyein bɔ Nana Ahasuro sayɛɛ Hegae, bɔ ɔnea mmrasua nemɔ so ne otuli ye foɛ kyɛ ɔfa siesie ye nwo ne, ye ala yeɛ ɔfale ɔ. Na ebiala bɔ ye nye bɔle Ɛseta so ne, ye nwo yɛle ye nyemene.

Ɛseta 3:15

Kyɛbɔ Nana Ahasuro hyɛle mmeraa nen, ɛbɔfoɛ nemɔ hane bɛ nwo bɛhɔle ndɛndɛ; yeɛ mmeraa nemɔ koso bɛbɔle ye nwo dawure wɔ Susa ahenguro. Afei Nana Ahasuro ne Haman bɛtenane ase bɛnone nzaa, wɔ aberɛ bɔ né Susa kuro ne anu ama bɛ nwo adwiri bɛ ɔ.

Ɛseta 8:10

Modekae maa bɛhyerɛle ngrataa nemɔ Nana Ahasuro dumaa nu, ɔfale Nana Ahasuro nzɔanoɛ kaa sosɔle bɛ noa, ɔfa somane mmenia bɔ bɛ nwo yɛ nyera, bɔ bɛtenatenane mbɔngɔ bɔ bɛ nwo yɛ nyera ɔ so. Né ahemvie adwuma ti yeɛ bɛhyɛ da besie sɔ mbɔngɔ nemɔ ɔ.

Ɛseta 9:20

Modekae hyerɛle edwirɛ bɔ osisili ne, na ɔmaa bɛfale ngrataa bɛɛmane Yudafoɛ amukoraa bɔ bepingye, ɔne bɛ bɔ bɛwɔ dedeede, bɔ bɛwɔ Nana Ahasuro manzini amukoraa nu ɔ.

Ɛseta 9:21

Ɔnwa, odi kyɛ betu bosome Ada, ye kyẽa bɔ ɔtɔ so buru ne nna, ɔne bɔ ɔtɔ so buru ne nnu ne besie berɛ afoɛnoa biala,

Ɛseta 9:28

Ye sɔ ne ati, odi kyɛ bɛkaye sɔ ngyẽa ne, ná bedi ye aworɛ ndoatoasoɛ ne abusua ne manzini ne kuro biala nu. Na sɔ Purim aluolue ngyẽa nemɔ, onni kyɛ bɛyakyi bɛ lilɛ le wɔ Yudafoɛ nu, yeɛ bɛ bosofoɛ koso, onni kyɛ bɛ wora fi ye lilɛ le.