Ɛseta 7:4 - AHYERƐLƐ KRONGRON

⁴ Ofikyɛ bayɛ me ne me mmenia atɔen kyɛ beli yɛ awue, behũ yɛ, ná benua yɛ boso. Na sɛ bɛtɔnene yɛ maa yɛyɛle ngoaa ne afaneɛ mɔ po a, ahaa mengɔtɛ me noa nu, ofikyɛ ahaa ye nwo ngohia kyɛ ngɔfa sɔ dwirɛ kaaba he ngɔha Nana adwene ɔ.

Ɛseta 7:4 Iomraidhean Croise

Nehemia 5:5

Yɛne y’eliɛma Yudafoɛ ne, yɛ mukoraa yɛte sona ko. Yɛ mma te kyɛ bɛ mma deɛ mɔ ala. Nakoso yɛhyɛ yɛ mma mmienzua ne yɛ mma mmrasua mɔ maa bɛyɛ nganga, na yɛ mma mmrasua nemɔ bie de yali moa yatɔne bɛ. Yɛyɔ ye nwo hwee a ɔnyɛ ye, yeɛ y’aseɛ ne yɛ bobe boo mɔ ayɛ ebiemɔ deɛ.”

Ɛseta 3:13

Bɛfale ngrataa nemɔ bɛsomane mmenia bɔ bɛ nwo yɛ nyera ɔ maa bɛfa bɛhɔle Nana Ahasuro manzini ne amukoraa nu. Nu dwirɛ kyire kyɛ, beli Yudafoɛ awue, behũ bɛ ná benua bɛ mukoraa bɛ boso: mmerandeɛ ne mbanyi, mmrasua ne ngwadaa ɛlɛhomapɛ, bɔ sɔ kyẽa ne te kyẽa bɔ ɔtɔ so buru ne nza wɔ bosome buru ne nyɔ, bɔ ye ole Ada ne anu. Osa ka kyɛ bɛfẽ bɛ nningyein bɛfa.

Ɛseta 3:9

Nana, sɛ ɛkɔpene so a, maa bɛhyɛ mmeraa kyɛ odi kyɛ benua bɛ boso; na Nana, ngotua ɛdwetɛ talɛnde apee buru ngɔma bɛ bɔ bɛnea w’adwuma so ne maa bɛkɔfa bekogua wɔ fotoɛ nu.”

Ɛseta 7:5

Yeɛ Nana Ahasuro bisale Nana hemmaa Ɛseta kyɛ, “Sona beni ɛne, ɔwɔ nisua, nwa yeɛ wabɔ sɔ porɛ he ne?”

Ɛseta 7:6

Na Ɛseta buale kyɛ, “Sɔ Haman he, ɔte busueniɛ, okyi yɛ, na osa te yɛ pɔfoɛ.” Na sɔ dwirɛ ne mane Haman kunu tele ye wɔ Nana Ahasuro ne Nana hemmaa Ɛseta bɛ nyunu berɛ.

Ɛseta 8:11

Sɔ ngrataa ne anu, Nana Ahasuro fale tumi wurale Yudafoɛ bɔ bɛwɔ kuro biala so ɔ sa, kyɛ bɛha bɛ nwo bɛbɔ nu, ná bɛho bɛpere bɛ ti ngoa. Ɔnwa, sɛ maen anaa manzini biala fa koɛ batoa bɛ a, wama bɛ tumi kyɛ bɛkɔhora bekoli sɔ mmenia nemɔ awue, bekohu bɛ, bekonua bɛ ne bɛ mmrasua ne bɛ mma mɔ boso, ɔne kyɛ bɛkɔfẽ bɛ nningyein bɛkɔfa ɔ.

Ɛseta 8:6

Ofikyɛ, musue bɔ ɔbaato me mmenia ye mɔ ye, meyɛ sɛɛ né mahora mafa me nye manea? Yeɛ meyɛ sɛɛ né mahora mafa me nye manea me mmenia bɔ benua bɛ boso ɔ?”

Ɛseta 9:25

Nakoso mmerɛ bɔ Ɛseta hɔle Nana Ahasuro nyunu nen, Nana Ahasuro hyɛle mmeraa maa bɛhyerɛle, kyɛ Yudafoɛ ti so porɛ bɔ Haman wabɔ ne, odi kyɛ ɔbɔ ye bɔbɔ ye ti so. Na odi kyɛ besinze ye ne ye mma mmienzua nemɔ wɔ bakaa so.

Daniel 6:2

Afei ɔyele mbanyi mɔ so neafoɛ nza bɔ bɛkɔnea mbɔtam mbanyi nemɔ aso ɔ, bɔ né Daniel te mmenia nza nemɔ anu ko ɔ. Né odi kyɛ sɔ mbɔtam mbanyi nemɔ bebu b’adwuma nwo ngondaa bekyire bɛ, amaa ɔnate so ɛhene ne anhwere ye nikyee bie.

Yoel 3:6

Ɛmɔatɔne Yudafoɛ ne Yerusalemfoɛ bama Helafoɛ, kyɛbɔ ɔkɔyɛ bɔ ɛmɔkɔye bɛ kofi b’aseɛ so bɛkɔhɔ dedeede ɔ.

Amose 2:6

AWURADE nwa nyoo, “Ɔnate Yisrael ye amumuyɛɛ nza, eh, ɔne nna ne ati, mengɔhwe ye so hwenɛ ne mengosa; ofikyɛ bɛtɔne teneneeniɛ bɛfa bede ɛdwetɛ, yeɛ bɛtɔne ehianiɛ bɛfa bede mmaboa.

Luka 12:45

Nakoso sɛ sɔ akoaa ne kã ye wɔ ye ti anu kyɛ, ‘Me mene onnya ɔwwale,’ ná ɔhyɛ ye bo ɔbo ngoaa mmienzua ne ngoaa mmrasua nemɔ, ná odidi ná ɔno nzaa bo a,

Deuteronomi 28:68

AWURADE kɔsesa ɛmɔ kogua ɛlɛen mɔ nu kosa kɔfa ɛmɔ kɔhɔ Misraim. Ɔkɔfa ɛmɔ kɔfa atee bɔ ɔhyɛle ɛmɔ bɔ kyɛ ɛmɔ nye ngonwu ye ko ne aso; na berɛ yeɛ ɛmɔkɔyɛ bɛ nwo atɔen bɛkɔma ɛmɔ pɔfoɛ mɔ, kyɛ bɛ́fa ɛmɔ bɛ́yɛ nganga mmienzua ne mmrasua ɔ, nakoso ebiala ngɔtɔ ɛmɔ po.”

Yosua 9:23

Ofi ɛnɛ bɔ ɔkɔ ɔ, Nyameɛ apaye ɛmɔ: ɛmɔ nu biemɔ kɔyɛ ngoaa daa, na bɛkɔyɛ eyeinbubulɛ ne nzuehɔlɛ adwuma wɔ me Nyameɛ awuro.”

1 Samuel 22:23

Maa yɛtena wa, na nnɛsuro, ofikyɛ sona bɔ ɔpena me ku me ne, wɔ koso ɔpena wɔ ku wɔ. Na ɛwɔ me wa de a, ngɔbɔ wɔ nwo waen.”