Ɛseta 6:13 - AHYERƐLƐ KRONGRON

¹³ Edwirɛ bɔ wato Haman ne, ɔfale ye mukoraa bɔle ɔye Sɛrese ne ye damvo nemɔ amukoraa amaneɛ. Na ye foɛtulɛfoɛ nemɔ ne ɔye Sɛrese besele ye kyɛ, “Modekae bɔ ahyɛ ye bo agua wɔ nyunu ase wɔ ye nyunu ne, sɛ ɔte Yudaniɛ de a, ye de ɛngɔhora ye nyunu gyina, ekoli ngoguo wɔ ye nyunu.”

Ɛseta 6:13 Iomraidhean Croise

Gyenesise 24:66

Somvoɛ ne fale bɔ wayɔ amukoraa nwo amaneɛ bɔle Yisake.

Gyenesise 40:19

Kyɛ odwu ɛlɛsa ne, Faro kɔpɛ wɔ ti kofi so, na ɔkɔmaa bɛkɔfa wɔ kundunzii ne bekosinze bakaa so maa nnomaa kosuso wɔ naen bekoli.”

Gyenesise 41:8

Yiti aleɛ hyene ngyerɛmɔ ne, Faro yɛle basaa. Na ɔsomane maa bɛɛfrɛle Misraim ngonyaayelɛfoɛ amukoraa ne mmenia bɔ bɛse ase amukoraa bɛmane ye. Ɔhane ye laleɛ ne anu dwirɛ hyirele bɛ, nakoso bɛ nu biala angora ye bo kyire.

YOB NWOMAA NE 15:24

Aworabɔlɛ ne ahunundetelɛ nwunanwuna ye, na bɛba ye so kyɛ ɛhene bɔ waboaboa ye nwo ɔkɔ koɛ ɔ.

YOB NWOMAA NE 16:2

“Edwirɛ sɔaa mɔ de, mate pee, ɛmɔ amukoraa bayɛ kyɛ ɛmɔdodo me, nakoso ɛmɔgoro me nwo!

Edwein 105:15

Ɔhane kyɛ, “Me mmenia bɔ mapopa bɛ ngoo ne, nnɛma ɛmɔfa ɛmɔ sa bɛkã bɛ; yeɛ me ngɔmhyɛlɛfoɛ koso, nnɛma ɛmɔyɔ bɛ bɔne biala!”

Anyandera 28:18

Sona bɔ odi nahorɛ ne, okonya ngoa, nakoso bɔ ɔnate atee tɛɛ so ne de, ye ayieleɛ koyie ye mvum nu.

Daniel 2:12

Na ɔnate sɔ ati, Nana fɛle yaa, na ye nye borole, na ɔhyɛle kyɛ behũhũ Babilɔn nworɛfoɛ amukoraa.

Hosea 14:9

Nwa yeɛ ɔse nworɛ bɔ ɔte edwirɛ hemɔ abo ɔ? Nwa yeɛ ye adwene nu pi bɔ ole bɛ nwo nimdeɛ ɔ? Ofikyɛ AWURADE atee tengyɛ, teneneefoɛ kɔfa so, nakoso mmeraatolɛfoɛ de, bekofi ase wɔ so.

Sakaria 2:12

AWURADE kɔfa Yuda kɔyɛ ye agyapadeɛ kyɛ ye kyɛfa deɛ wɔ aseɛ krongron ne aso, na okosa kɔfa Yerusalem kɔyɛ ye deɛ.”

Numeri 24:9

Okunduni, na obutu berɛ kyɛ gyata, ɔte kyɛ gyata beleɛ; nwa yeɛ okotingye ye ɔ? Ebiala bɔ okoyira wɔ ne, Nyameɛ koyira ye, yeɛ ebiala bɔ ɔkɔnoma wɔ ne, Nyameɛ kɔnoma ye.”

Deuteronomi 32:10

“Onwuni ye wɔ ɛserɛ so, ɛserɛ pralaa suronyisuronyi so; ɔfale ye wurale ye kunu, ɔneane ye so, na ɔbɔle ye nwo waen kyɛ ye nye kyiremvua.