Ɛseta 3:12 - AHYERƐLƐ KRONGRON

¹² Bosome bɔ oli moa ne, ye kyẽa bɔ ɔtɔ so buru ne nza ne, bɛfrɛfrɛle Nana Ahasuro ahyerɛlɛfoɛ amukoraa maa beyiale, na bɛhyerɛle maa ɔyɛle mmeraa, kyɛbɔ Haman hyɛle kyɛ bɛyɔ ne ala. Na bɛfa bɛɛmane Nana Ahasuro mbɔtam mbanyi mɔ, amrado mɔ, maen maen nemɔ so mbanyi mɔ, manzini biala, kyɛbɔ ye ahyerɛlɛ ne nu mmenia dwudwolɛ si te ne, sɔ ala yeɛ bɛhyerɛle ye ɔ. Bɛhyerɛle ye Nana Ahasuro dumaa nu, na bɛfale ye nzɔanoɛ pɛteaa bɛsɔle ye noa.

Ɛseta 3:12 Iomraidhean Croise

1 Ahemvo 21:8

Yiti Yesebɛl fale Ahabo dumaa hyerɛle ngrataa, na ɔfale Ahabo nzɔanoɛ sosɔle bɛ noa. Ɔsomane maa bɛfale ngrataa ne bɛɛmane mbanyi ne atitire bɔ bɛ ne Nabɔto bɛte kuro berɛ ne.

Ɛsra 8:36

Asa koso, Nana Atasɛsɛse mmeraa bɔ ɔhyerɛle ye krataa nu ne, bɛye bɛmane ye mbɔtam mbanyi mɔ ne amrado mɔ bɔ begyi ye gya nu wɔ asue Yufreti si dɔ mbɔtam ne. Na bɛ koso bɛfale bɛ mmokalɛ bɛtale maen ne ne Nyameɛ awuro ne si.

Ɛseta 1:22

Nana Ahasuro maa bɛfale ngrataa bɛhɔle ye manzini ne amukoraa nu. Manzini biala, kyɛbɔ ye ahyerɛlɛ ɔte ne, yeɛ mmenia biala, kyɛbɔ bɛ dwudwolɛ ɔte ne, sɔ ala yeɛ bɛhyerɛle krataa ne ɔ; kyɛ, bienzua biala yeɛ tumi wura ye sa wɔ ye awuro ɔ, na ɔnzɛ kyɛ betu ye noa dwirɛ begua.

Ɛseta 3:11

Na Nana Ahasuro sele Haman kyɛ, “Sikaa ne wura wɔ sa, yeɛ mmenia ne koso bewura wɔ sa. Bɔ ekuro biala, fa yɔ bɛ.”

Ɛseta 8:2

Afei Nana Ahasuro ye nzɔanoɛ pɛteaa bɔ ole fili Haman berɛ ne, ɔye fili ye bɔbɔ ye sa, na ɔfa mane Modekae. Na Ɛseta bɔle Modekae panyi wɔ Haman awuro ne aso.

Ɛseta 9:27

Yudafoɛ le tole nu, na ɔyɛle amammerɛ mane bɛ ne bɛ bosofoɛ ne ebiala bɔ ɔɔyɛle Yudaniɛ ɔ, kyɛ sɔ ngyẽa nyɔ ne, bɛngɔma ɔngɔpa ye nwo, na bɛkɔhɔ so bekoli ye afoɛnoa biala, wɔ mmerɛ bɔ bahyɛ bato berɛ ne anu, kyɛbɔ bahyerɛ bato berɛ ne.

Daniel 3:10

Nana, ahyɛ mmeraa kyɛ, sona biala bɔ ɔkɔte awɛen, dodobɛen, sangoo, bɛnda, atɛndɛbɛn, kyenneɛ ne sangoo ahoroɔ nga nen, odi kyɛ obutu berɛ sɔne sikaa kɔkorɛ amoen ne;

Daniel 6:12

Yiti bɛhɔle ɛhene ne berɛ beebisale ye mmeraa ne anwo dwirɛ kyɛ, “Nana, aso amva wɔ sa anwura mmeraa bo, kyɛ eleburasa ye anu, sona biala bɔ ɔkɔfa ye abisadeɛ kɔto nyameɛ bie anaa sona bie nyunu ne, odi kyɛ begyi ye bɛto gyata nemɔ bɛ tuin ne anu ɔ; bɔ Nana, sana wɔ ngome wɔ nyunu yeɛ odi kyɛ ɔfa to ɔ?” Yeɛ ɛhene ne buale kyɛ, “Ye ala ɛne, kyɛbɔ Medese ne Pɛsia mmeraa bɔ bɛnzesã ye ne ɔte ne.”

Daniel 6:15

Yeɛ sɔ mmenia nemɔ boale bɛ noa bɛhɔle ɛhene ne berɛ beesele ye kyɛ, “Nana, nwu ye kyɛ, Medese ne Pɛsia mmeraa nu, sɛ Nana hyɛ mmeraa anaa ahyɛdeɛ biala a, bɛngora bɛnzesã ye.”

Daniel 6:25

Yeɛ Nana Dario hyerɛle krataa ɔɔmane maen maen, mmenia ne edwudwolɛ amukoraa bɔ bɛwɔ aseɛ so amukoraa ɔ kyɛ, “Ngɔsoɛ pee ɔbra ɛmɔ asetena oo!

Daniel 6:8

Yiti Nana, hyɛ mmeraa ne, ná fa wɔ sa wura ye bo bɔ ebiala ngɔhora ye sesã ɔ, kyɛbɔ Medese ne Pɛsia mmeraa bɔ bɛngora ye sesã ne ɔte ne.”