Ɛseta 2:16 - AHYERƐLƐ KRONGRON

¹⁶ Nana Ahasuro ahennie afoɛ bɔ ɔtɔ so nzoo ne anu, bosome buru bɔ oli Tebete ne anu yeɛ bɛfale Ɛseta bɛhɔle ye ahemvie berɛ ɔ.

Ɛseta 2:16 Iomraidhean Croise

Ɛsra 4:6

Ahasuro ahennie aberɛ so, afoɛ bɔ oli moa wɔ ye ahennie ne anu ne, pɔfoɛ nemɔ hyerɛle Yudafoɛ ne Yerusalemfoɛ nwo krataa bɛɛtoatoale bɛ.

Ɛsra 7:8

Nana Atasɛsɛse afoɛ bɔ ɔtɔ so nzoo ne, ye bosome nnu ne anu yeɛ Ɛsra wale Yerusalem ɔ.

Ɛseta 2:1

Sɔ dwirɛ nemɔ asi ne, bɔ Nana Ahasuro ahone tɔle nzue nu ne, ɔkayele Wasiti ne nikyee bɔ wayɔ ne, ɔne mmeraa bɔ wahyɛ wafa ye nwo ne.

Ɛseta 2:15

Odwuli Ɛseta so kyɛ ɔkɔ Nana Ahasuro nyunu. Modekae bɔ ɔfale ye yɛle ɔwa ne, ye baba aliɛma bienzua Abihail ɔwa ɛne. Ɛseta anga kyɛ bɛma ye nningyein bɔ ɔfa siesie ye nwo ɔ. Nningyein bɔ Nana Ahasuro sayɛɛ Hegae, bɔ ɔnea mmrasua nemɔ so ne otuli ye foɛ kyɛ ɔfa siesie ye nwo ne, ye ala yeɛ ɔfale ɔ. Na ebiala bɔ ye nye bɔle Ɛseta so ne, ye nwo yɛle ye nyemene.

Ɛseta 2:17

Na Nana Ahasuro hurole Ɛseta trale mmrasua ngaa ne amu. Ohurole ye dwirɛ, na ye nye gyele ye nwo trale mmabunu ne amu, yiti ɔfale ɛhemmaa kyerɛ ne wurale ye, na ɔfale ye sili hemmaa sili Wasiti gya nu.

Ɛseta 2:3

Nana, manzini amukoraa bɔ bɛwɔ w’ahennie nu ne, tu mbanyi sie berɛ maa bɛboaboa mmabunu anwonyemene amukoraa noa. Maa bɛfa bɛ bɛbra Susa ahemvie mmraanu berɛ. Nana, wɔ sayɛɛ Hegae bɔ ɔnea mmrasua so ne, maa bɛfa bɛ bewura ye sa, ná maa ɔma bɛ sakyeɛ mɔ bɔ bɛkɔfa bɛkɔpopa ɔ.

Ɛseta 8:9

Bosome nza bɔ yeɛ oli Siwan ne anu, ye kyẽa bɔ ɔtɔ so aburanyɔ ne nza ne, bɛfrɛfrɛle Nana Ahasuro ahyerɛlɛfoɛ maa beeyiale. Na edwirɛ biala bɔ Modekae hane ne, bɛhyerɛle maa ɔyɛle mmeraa, na bɛfa bɛɛmane Yudafoɛ, mbɔtam mbanyi, amrado mɔ ne manzini mbanyi bɔ bɛwɔ manzini ɛyaa ko aburanyɔ ne nzoo ne anu, fite Yindia bɔ ɔkwaadwu Yitiopia. Manzini biala, kyɛbɔ ye ahyerɛlɛ te ne, yeɛ mmenia biala, kyɛbɔ bɛ dwudwolɛ te ne, sɔ ala yeɛ bɛhyerɛle krataa ne ɔ, na bɔ bɛfa bɛɛmane Yudafoɛ ne koso, ɔte b’ahyerɛlɛ ne bɛ dwudwolɛ.