Ɛfesofoɛ 6:6 - AHYERƐLƐ KRONGRON

⁶ nnɛmɔma ɛmɔ solɛ ne ɔyɛ bɛ nye so nikyee mbaen, kyɛ bɛ bɔ bɛfa bɛsɔ mmenia nye ɔ, na mmom kyɛ Kristo ngoaa bɔ baye b’ahone nu bɛyɔ Nyameɛ apɛdeɛ,

Ɛfesofoɛ 6:6 Iomraidhean Croise

Yeremia 24:7

Na ngɔma bɛ nimdeɛ bɔ ɔkɔmaa bekonwu me kyɛ me ole AWURADE ɔ. Bɛkɔyɛ me maen, ná me wora mayɛ bɛ Nyameɛ, ofikyɛ bɛkɔfa b’ahone amukoraa bekosa bɛkɔwa me berɛ.

Yeremia 3:10

Nakoso ɛhe amukoraa si ne, oliɛma brasua ngondomboniɛ Yuda wanza wamva ye ahone amukoraa wamma me berɛ, na mmom ɔyɔle sɔ wɔ nnakannaka atee so, AWURADE noa dwirɛ ɛne.”

Mateo 12:50

Ofikyɛ ebiala bɔ ɔkɔyɔ me Baba bɔ ɔwɔ nyameɛso n’apɛdeɛ nen, ye yeɛ ɔte nniɛma bienzua ne nniɛma brasua ne me maame ɔ.”

Mateo 7:21

“Nna ebiala bɔ ose me kyɛ ‘Awurade, Awurade’ ne, yeɛ ɔkɔhɔ nyameɛso ahennie ne anu ɔ, na mmom sana bɔ ɔyɔ me Baba bɔ ɔwɔ nyameɛso ne ye apɛdeɛ ɔ.

Marko 3:35

Ofikyɛ ebiala bɔ ɔyɔ Nyameɛ apɛdeɛ nen, ye yeɛ ɔte nniɛma bienzua ne nniɛma brasua ne me maame ɔ.”

Romanfoɛ 6:17

Ɛmɔma yɛla Nyameɛ ase! Ofikyɛ ɛmɔayɛ bɔne ngoaa le, na afei de ɛmɔafa b’ahone mukoraa bayɛ sotie bama nahorɛ, bɔ ɛmɔanya bafi ngyerɛkyerɛ bɔ bɛfa bɛmane ɛmɔ ne anu ne.

1 Korintofoɛ 7:22

Ofikyɛ ebiala bɔ né ɔte akoaa koraka yeɛ Awurade frɛle ye ne, wayɛ Awurade dehyeɛ. Sɔ ala yeɛ ebiala bɔ né ɔte dehyeɛ koraka yeɛ bɛfrɛle ye ne, wayɛ Kristo akoaa ɔ.

Galatiafoɛ 1:10

Afei, kuro sona, anaa Nyameɛ yeɛ mepena kyɛ ɔkamvo me ɔ? Anaa mepena kyɛ mesɔ adasa nye? Sɛ kuro sona yeɛ ngu so mesɔ ye nye a, ahaa nnde Kristo akoaa.

Ɛfesofoɛ 5:17

Yiti nnɛma ɛmɔyɛ mmenia bɔ adwene nne bɛ ti anu ɔ, na mmom ɛ́mɔyɛ mmenia bɔ bɛte Awurade apɛdeɛ bo ɔ.

Filipifoɛ 2:12

Yiti mmiɛngo paa mɔ, kyɛbɔ ɛmɔyɛ sotie daa ne, nna kyɛ mmerɛ bɔ me ne ɛmɔ yɛwɔ berɛ ne angome, na mmom afei bɔ nne ɛmɔ berɛ ye de po, ɔtra so; ɛ́mɔfa esuronyi ne anwowosowolɛ béli ɛmɔ bɔbɔ ɛmɔ ngoalelɛ nwo dwumaa ma oli mu,

Kolosefoɛ 1:9

Ɔnate ɛhe ati, ofi kyẽa bɔ yɛtele sɔ dwirɛ ne ɔ, yɛyyakyili ɛmɔ nwo mbaeɛbɔlɛ le. Na yɛsrɛ kyɛ ɔma ɛmɔnya ye apɛdeɛ nwo nimdeɛ mmorosoɛ wɔ sunzum nu nworɛ ne ndeaseɛ amukoraa nu.

Kolosefoɛ 4:12

Kristo Yesu akoaa Epafra bɔ ɔte ɛmɔ nu ko ne, obisa ɛmɔ ahye. Daa biala ɔkaye ɛmɔ paa wɔ ye mbaeɛbɔlɛ nu, kyɛbɔ ɛmɔkogyina pindinn, ná ɛmɔ adwene asi pi wɔ Nyameɛ apɛdeɛ mukoraa nu ɔ.

1 Tɛsalonikafoɛ 2:4

na mmom kyɛbɔ Nyameɛ abu yɛ kyɛ yɛfata, ná wafa nzɛmba ne wawura yɛ sa ne, sɔ ala yeɛ yɛdwudwo ɔ; nna kyɛ yɛfa yɛsɔ mmenia nye, na mmom Nyameɛ bɔ ɔse yɛ ti anu dwirɛ ne yeɛ yɛfa yɛsɔ ye nye ɔ.

1 Tɛsalonikafoɛ 4:3

Nyameɛ apɛdeɛ ɛhe: kyɛ ɛmɔ nwo kɔte, ná ɛmɔkɔhwe ɛmɔ nwo bekofi adwamanbɔlɛ nwo,

Hebrifoɛ 10:36

Odi kyɛ ɛmɔmia ɛmɔ nye, amaa ɛmɔahora bayɔ Nyameɛ apɛdeɛ ná ɛmɔ sa ahã ye bɔhyɛ ne.

Hebrifoɛ 13:21

ɔ́ma ɛmɔ anwoserɛ wɔ nikyee paa biala nu ma ɛmɔyɔ ye apɛdeɛ; ná ɔ́fa Yesu Kristo so ma ɛmɔli dwumaa bɔ ɔsɔ ye nye ɔ. Animnyam hã ye afebɔɔ. Amen.

1 Petro 2:15

Ofikyɛ bɔ Nyameɛ kuro kyɛ ɛmɔyɔ ɛhe: kyɛ ɛmɔkɔfa ɛmɔ bra paa ne bɛkɔhã ngwaseafoɛ noa bɛkɔto nu ɔ.

1 Petro 4:2

na anwoɔnaen nu asetena mmerɛ bɔ waha ne, ɔndena ase mma sona akɔnnɔ ko, na mmom ɔtena ase ma Nyameɛ apɛdeɛ.

1 Yohane 2:17

Ewiase ne nu akɔnnɔ gu so ɔpɛ nu kɔ, nakoso sona bɔ ɔyɔ Nyameɛ apɛdeɛ ne te ase afebɔɔ.