Ɛfesofoɛ 3:10 - AHYERƐLƐ KRONGRON

¹⁰ kyɛbɔ ɔkɔyɛ bɔ afei ɔnate asɔre ne aso, Nyameɛ nworɛ ne kɔla ye nwo ali wɔ atee ahoroɔ so kohyire ahennie ne tumi ahoroɔ bɔ bɛwɔ anwuro dɔ ɔ.

Ɛfesofoɛ 3:10 Iomraidhean Croise

Edwein 103:20

Ao AWURADE abɔfo mɔ, ɛ́mɔye ye ayɛ: ɛmɔ anwoserɛfoɛ bɔ ɛmɔyɔ ye apɛdeɛ ná ɛmɔyɔ sotie bɛma ye dwirɛ ɔ.

Edwein 104:24

Ao, AWURADE wɔ sa noa nnwumaa sone paa! Ɛfale nworɛ tole ye nwo yeɛ ɛbɔle bɛ mukoraa ɔ; w’abɔdeɛ mɔ bayi aseɛ so tɛkyɛ.

Hesekiel 3:12

Yeɛ Sunzum ne mane me so, na ndele komviɛ bie bɔ ɔma aseɛ woso ɔ wɔ me si dɔ kyɛ, “Asennaa te AWURADE animnyam ne deɛ wɔ ye atenaleɛ berɛ!”

Romanfoɛ 11:33

O! Nyameɛ anwonya ne ye nworɛ ne ye nimdeɛ nu pi! Nwa yeɛ ɔkɔhora kohyirehyire ye porɛ bɔ wabɔ nu ɔ? Nwa yeɛ ɔse ye atee bɔ ɔfa so yɔ ye nningyein, anaa nwa yeɛ ɔkɔte ye bo koyie ɔ?

Romanfoɛ 8:38

Na mese ye pefee kyɛ ewue anaa ngoa, anaa abɔfo mɔ, anaa ewienu atumifoɛ, anaa nningyein bɔ ɔwɔ berɛ kekesaala ye, anaa nningyein bɔ ɔbaawa, anaa tumi,

1 Korintofoɛ 1:24

Na bɛ bɔ bafrɛ bɛ ne de, Yudafoɛ oo, Helafoɛ oo, Kristo te Nyameɛ tumi ne ye nworɛ ma bɛ.

1 Korintofoɛ 2:7

Na mmom mworɛ bɔ yɛbɔ ye nwo dawure ne te Nyameɛ mvealeɛ nu nworɛ, bɔ kyɛbɔ ɔkɔyɛ ná yanya animnyam ti, ɔhyehyɛ tole berɛ koraka yeɛ ɔbɔ wiase ɔ.

Ɛfesofoɛ 1:21

na ɔte ahennie, tumi, anwoserɛ ne meneɛ amukoraa so hene, ɔne dumaa biala bɔ bɛfa bɛfrɛ ɔ, bɔ nna wiase wa angome, na mmom ewiase bɔ ɔbaawa ne koso anu.

Ɛfesofoɛ 1:23

bɔ ɔte ye nipadua ne, bɔ ɔma nningyein mukoraa di mu wɔ nningyein mukoraa nu ne.

Ɛfesofoɛ 1:3

Animnyam hã Nyameɛ, y’Awurade Yesu Kristo Baba ne, bɔ wafa sunzum nu saleɛ amukoraa bɔ ɔwɔ nyameɛso wayira yɛ wɔ Kristo nu ne,

Ɛfesofoɛ 1:8

na ɔmaa ɔbole so mane yɛ wɔ nworɛ ne nimdeɛ amukoraa nu.

Ɛfesofoɛ 6:12

Ofikyɛ nna yɛne anwoɔnaen ne mogya yeɛ yɛdi ahoɛ ɔ; na mmom yɛne mbanyililɛ ne tumi mɔ ne ewiase awosii nu tumifoɛ ne ewienu dɔ sunzummɔne mɔ.

Kolosefoɛ 1:16

Ofikyɛ ye nu yeɛ bɛbɔle nningyein amukoraa, bɔ ɔwɔ nyameɛso ne aseɛ so ɔ; bɔ benwu ye ɔ ne bɔ bennwu ye ɔ; ahennie oo, meneɛ oo, mbanyililɛ oo, tumililɛ oo, nningyein mukoraa bɛnate ye so yeɛ bɛbɔle ɔ, na bɛbɔle bɛ bɛmane ye.

Kolosefoɛ 2:10

Na ɛmɔali mu bɔkɔɔ wɔ ye nu, ye bɔ ɔte tumi ne ahennie amukoraa bɛ ti.

Kolosefoɛ 2:15

Olele mbanyililɛ ne tumililɛ bɛ sa nu tumi, na ɔlale bɛ ali pefee wɔ badwa nu, na olili bɛ so ngonim wɔ mmeamudua ne aso.

1 Timoteo 3:16

Aporowaa biala nne ye nwo kyɛ nyamesom nu mvealeɛ nu dwirɛ ne ɔte piri: Nyameɛ lale ye nwo ali anwoɔnaen nu, olili be wɔ Sunzum nu; abɔfo mɔ nwuni ye, bɛbɔle ye nwo dawure wɔ maen maen nu; belele ye belili wɔ wiase, na bɛfale ye bɛhɔle nyameɛso animnyam nu.

1 Petro 1:12

Na bɛlale ye ali behyirele bɛ kyɛ, nna bɛ bɔbɔ bɛ nwo, na mmom yɛ yeɛ né bɛyɔ ɛsolɛ adwuma ne bɛma yɛ ɔ, wɔ edwirɛ mɔ bɔ kekesaala ye yɛbɔ ye dawure yɛkyire ɛmɔ ne anu, ɔne bɛ bɔ bɛnate Sunzum Krongron bɔ basoma ye fi nyameɛso so bɛɛhane nzɛmba ne behyirele ɛmɔ ne. Na sɔ dwirɛ nemɔ yeɛ abɔfo mɔ po bekuro kyɛ benwu nu ɔ.

1 Petro 3:22

Ye yeɛ ɔhɔle nyameɛso ne, na ɔte Nyameɛ sa famaa so; na abɔfo mɔ ne anwoserɛ mɔ ne tumi mɔ babrɛ bɛ nwo ase bawura ye bo.