Ɛfesofoɛ 2:10 - AHYERƐLƐ KRONGRON

¹⁰ Ofikyɛ yɛte ye adwiililɛ bɔ wali ɔ, bɔ ɔbɔle yɛ Kristo Yesu nu mane nnwumaa paa bɔ Nyameɛ asiesie ato berɛ kyɛ yɛfa yɛbɔ yɛ bra ɔ.

Ɛfesofoɛ 2:10 Iomraidhean Croise

Edwein 100:3

Ɛ́mɔnwu ye kyɛ AWURADE yeɛ ɔte Nyameɛ ɔ, ye yeɛ ɔbɔle yɛ ɔ, na yɛte ye deɛ; yɛte ye maen ne ye mmoaen bɔ ɔma bɛ aleɛ ɔ.

Edwein 119:3

Afei koso bɛnyɔ mvomsoɛ, na mmom bɛnate ye atee so.

Edwein 138:8

AWURADE kɔma bɔ wahyehyɛ wafa me nwo ne kɔwa nu; ao AWURADE, wɔ ɔdɔ bɔ onni ngasi ne, ɔwɔ berɛ afebɔɔ: nnɛpo wɔ sa noa nnwumaa.

Edwein 51:10

Ao Nyameɛ, bɔ ahone bɔ nu te ɔ wura me nu, ná fa sunzum bɔ ɔtengyɛ ɔ wura me nu.

Edwein 81:13

Ao, sɛ ahaa me maen kotie me dwirɛ a, sɛ ahaa Yisrael kɔnate m’atee so a!

Yesaya 19:25

Ofikyɛ Asafo AWURADE koyira bɛ kyɛ, “Mayira me maen Misraim, ɔne Asiria bɔ ɔte me sa noa adwuma, yeɛ m’agyapadeɛ Yisrael.”

Yesaya 29:23

Na sɛ onwu ye mma, me sa noa adwuma ne wɔ ye nu a, bekobu me dumaa ne krongron, bekobu Yakob Krongronniɛ ne krongron, na bekosuro Yisrael Nyameɛ ne.

Yesaya 43:21

maen he, mabɔ ye mama me nwo, kyɛ bɛ́bɔ me nwo ayɛyelɛ dawure.

Yesaya 43:7

ebiala bɔ bɛfa me dumaa bɛfrɛ ye ɔ, bɔ mmɔle ye kyɛ ɔhyɛ me animnyam ɔ, bɔ nwone ye, ná nyɔle ye ɔ.”

Yesaya 44:21

O Yakob ne Yisrael, kaye sɔ dwirɛ hemɔ, ofikyɛ ɛte me somvoɛ; me yeɛ nwone wɔ ɔ, ɛte me somvoɛ. O Yisrael, me wora ngofi wɔ.

Yesaya 60:21

Wɔ mmenia ne amukoraa bɛkɔyɛ teneneefoɛ, bɛkɔfa aseɛ ne bɛkɔyɛ bɛ deɛ afebɔɔ, bɛte bakaa bɔ malua bɔ wafefɛ ɔ, me sa noa adwuma bɔ ɔhyɛ me animnyam ɔ.

Yesaya 61:3

kyɛ bɛ bɔ bedi aworabɔlɛ wɔ Sion ne, mva nyerɛen akomuade nzi nzoen gya nu mma bɛ, kyɛ mva anigye ngoo nzi aworabɔlɛ gya nu mma bɛ, kyɛ mva ayɛyelɛ tena nzi aworabɔlɛ gya nu, amaa ɔnate so bafrɛ bɛ tenenee mmakaa, bɔ AWURADE alua bɔ ɔhyɛ ye animnyam ɔ.

Yeremia 31:33

Nakoso apam bɔ me ne Yisrael awuro ama yɛkɔyɛ ɛhe: Sɔ mmerɛ ne asi ne, ngɔfa me mmeraa ngowura bɛ nu, na ngɔhyerɛ ye wɔ b’ahone nu; ngɔyɛ bɛ Nyameɛ, ná bɛ koso bayɛ me maen, AWURADE noa dwirɛ ɛne.

Mateo 5:16

Yiti ɛ́mɔma ɛmɔ kanea ɔta ma mmenia nwu ye, amaa ɔnate so banwu ɛmɔ yɔleɛ paa ne, ná bakamvo ɛmɔ Baba bɔ ɔwɔ nyameɛso ne.

Yohane 3:21

Nakoso ebiala bɔ ɔyɔ bɔ ɔte nahorɛ ne de, ɔba kanea ne anwo, kyɛbɔ ɔkɔyɛ bɔ ye yɔleɛ kɔla ali pefee kyɛ wayɛ sotie wama Nyameɛ ɔ.”

Asomafoɛ 9:31

Yiti asɔre nemɔ bɔ bɛwɔ Yudea ne Galilea ne Samaria mukoraa benyane asomdwee, na benyini nyamesom nu. Na bɛnate Awurade surolɛ ne Sunzum Krongron aworakyekyerɛ nu bɛsone pee.

Asomafoɛ 9:36

Né gyidiniɛ braa bie bɔ bɛfrɛ ye Tabita wɔ Yopa. (Hela dwudwolɛ nu, Tabita bo kyire Dɔkase, bɔ ye koso ye bo kyire wanzane). Braa he fale paayɛlɛ ne ehiafoɛ adɔeɛyɛlɛ yɛle ye adwuma.

Romanfoɛ 8:1

Afei de, foɛbualɛ biala nne berɛ mma bɛ bɔ bɛte Kristo Yesu nu ne.

Romanfoɛ 8:29

Bɛ bɔ onwuni bɛ siele ne, osa tuli bɛ siele berɛ, kyɛ benya Ɔwa ne sue ne bie, amaa ɔnate so wayɛ aliɛmaa mɔ pee nu bamuɛbaa.

1 Korintofoɛ 3:9

Ofikyɛ yɛ de, yɛte Nyameɛ adwumayɔlɛfoɛ, bɔ yɛ ne ye bɔ nu yɛyɔ adwuma ɔ; na ɛmɔte ye boo, Nyameɛ sua.

2 Korintofoɛ 5:17

Yiti sɛ ebie fa ye nwo bɔ Kristo a, né wayɛ abɔdeɛ foforɛ, nningyein daa ne apɛ nu; amba nningyein mukoraa ayɛ foforɛ.

2 Korintofoɛ 5:5

Nyameɛ yeɛ wasiesie yɛ wama sɔ nhyehyɛleɛ ye ɔ, na wafa ye Sunzum ne wasi ye agyinayɛɛ.

2 Korintofoɛ 9:8

Nyameɛ kora ma ɛmɔnya saleɛ amukoraa mmorosoɛ, amaa mmerɛ biala ɛmɔ sa ahã nikyee biala bɔ ɛmɔhia ɔ, na ɛmɔkonya ye mmorosoɛ na ɛmɔafa bie baboka adwuma paa.

Galatiafoɛ 6:15

Sɛ ebie pɛ ye bienzua oo, wambɛ ye bienzua oo, nu biala nwo nhia; kyɛ bɛkɔwo wɔ foforɛ yeɛ ohia ɔ.

Ɛfesofoɛ 1:1

Pɔɔlo bɔ ɔnate Nyameɛ pɛ so nde Kristo Yesu somafoɛ ne, mefa mebrɛ anwoteefoɛ bɔ bɛwɔ Ɛfeso bɔ bɛte Kristo Yesu nu agyidifoɛ ne.

Ɛfesofoɛ 1:4

kyɛbɔ ɔneaneane nu yele yɛ wɔ ɔdɔ nu, Kristo nu koraka yeɛ bɛbaahyɛ wiase bo, kyɛ yɛyɛ krongron bɔ ngekalewa biala nne yɛ nwo wɔ ye nyunu ne.

Ɛfesofoɛ 2:13

Nakoso afei de, Kristo nu, ɛmɔ bɔ ahaa né ɛmɔwɔ dedeede ne, ɛmɔafa Kristo mogya ne aso bapingye.

Ɛfesofoɛ 2:15

ɔnate kyɛ waye ɛpɔen bɔ ɔte mmeraa dwirɛ ahoroɔ bɔ ɔwɔ ahyɛdeɛ nu ne wafi berɛ wɔ ye nwonaen nu, na wahã bɛ munyɔ ne wabɔ nu wayɛ bɛ sona foforɛ ko, wɔ ye bɔbɔ ye nu ama asomdwee awa,

Ɛfesofoɛ 2:2

bɔ daa ne, ɛmɔbɔle ɛmɔ bra kyɛbɔ wiase brabɔlɛ te ɔ, bɔ ɛmɔlili ewienu tumi panyi ne si, bɔ ɔte sunzum bɔ kekesaala ye odi dwumaa wɔ asoserɛfoɛ nu ne.

Ɛfesofoɛ 2:6

Na watingye yɛ ne ye, na wafa yɛ ne ye waatena nyameɛso dɔ wɔ Kristo Yesu nu,

Ɛfesofoɛ 4:1

Yiti afei me, Awurade kukununiɛ, mesrɛ ɛmɔ kyɛ ɛ́mɔbɔ bra bɔ ɔfata ɛfrɛlɛ bɔ bafa bafrɛ ɛmɔ ne,

Ɛfesofoɛ 4:24

ná ɛ́mɔfa sona sue foforɛ bɔ Nyameɛ bɔle ye kyɛ ye sɛso wɔ nahorɛ tenenee ne anwotelɛ nu ne bewura.

Deuteronomi 32:6

Yiti akatuaa bɔ ɛfa ma AWURADE hɔ ɛne? Ngwaseafoɛ bɔ nworɛ nne bɛ ti anu ɔ! Aso nna wɔ baba bɔ ɔbɔle wɔ hɔ ɛne? Ye bɔ ɔyɔle wɔ, bɔ ɔmaa enyane nyinasoɛ ne!

Deuteronomi 5:33

Atee amukoraati bɔ AWURADE ɛmɔ Nyameɛ wahyɛ kyɛ ɛ́mɔfa so bɛ́bɔ bɛ bra ne, odi kyɛ ɛmɔfa so, amaa ɔnate so ɛmɔanya ngoa, ná wayie ɛmɔ yé, ná ɛmɔatena aseɛ bɔ ɛmɔ sa baahã ye ne aso bahyɛ.

Filipifoɛ 1:6

na mede medi kyɛ, ye bɔ ɔhyɛle adwuma paa bo wɔ ɛmɔ nu ne, ɔkɔhɔ so kɔyɔ koyie maa okoodwu Yesu Kristo kyẽa ne.

Filipifoɛ 2:13

ɔnate kyɛ Nyameɛ yeɛ ɔyɔ adwumaa wɔ ɛmɔ nu maa ɛmɔkuro kyɛ ɛmɔyɔ, ná ɛmɔyɔ nnwumaa kyɛbɔ ɔsɔ ye nye ɔ.

Kolosefoɛ 1:10

Na ɛhe kɔmaa ɛmɔkɔhora kɔbɔ bra bɔ ɔfata Awurade, ná ɔsɔ ye nye wɔ atee biala so. Na ɔkɔmaa ɛmɔkosu mmaa wɔ nnwumaa paa mukoraati nu, ná ɛmɔanyi Nyameɛ nimdeɛ nu.

Kolosefoɛ 3:10

na ɛmɔanya sona sue foforɛ, na ye bɔ ɔbɔle yɛ ne, ogu so ɔyɛ yɛ foforɛ ba nimdeɛ nu maa ye sɛso yɛ kyɛ ye bɔbɔ ne ala.

2 Tɛsalonika 2:17

ɔ́kyekye ɛmɔ wora, ná ɔma ɛmɔ anwoserɛ wɔ edwirɛ ne adwuma paa mukoraa nu.

1 Timoteo 2:10

na mmom nnwumaa paa bɔ ɔfata mmrasua bɔ bɛda nyamesom ali ɔ.

1 Timoteo 5:10

bɔ bedi ye ne ye nnwumaa paa nwo adanzeɛ: kyɛ watete mmaa, kyɛ waso ɛwɔfoɛ mɔ, kyɛ wanwunzi anwoteefoɛ gya bo, kyɛ waboka bɛ bɔ bɛwɔ anwokyere nu, ɔne kyɛ watu ye nwo wasie berɛ wama nnwumaa paa mukoraa ɔ.

1 Timoteo 5:25

Na sɔ ala yeɛ nnwumaa paa bɛda ali pefee ɔ, na sɛ banna ali po a, bɛngora bɛmvea.

1 Timoteo 6:18

Bɔ bɛ kɔkɔ kyɛ bɛ́yɔ bɔ ɔte paa ɔ, kyɛ bɛyɛ sikafoɛ wɔ nnwumaa paa nu, ná bɛye bɛ kunu bɛyɛ adɔeɛ,

2 Timoteo 2:21

Na sɛ sona te ye nwo fi bɔ bɛmva anidie bɛmma ye ne anwo a, ɔkɔyɛ nikyee bɔ bɛfa anidie bɛma ye ɔ, bɔ bate ye nwo, bɔ ye mene fa yɛ nikyee a ɔyɛ yé ɔ, ná wasiesie ye nwo wama adwuma paa biala.

2 Timoteo 3:17

amaa ɔnate so Nyameɛ sona wayɛ pɛpɛɛpɛ bɔ bama ye ndeteyɛɛ bɔ odi mu ɔ bama nnwumaa paa amukoraa.

Tito 2:14

Ye yeɛ ɔfale ye ngoa tole berɛ mane yɛ ɔ, kyɛbɔ okole yɛ kofi amumuyɛɛ amukoraa nu, ná wate yɛ nwo wafa yɛ wayɛ ye bɔbɔ ye mmenia sonongo bɔ bɛbɔ nnwumaa paa nwo mmɔden ɔ.

Tito 2:7

Na nningyein mukoraa nu, tu wɔ nwo sie berɛ yɛ yɔleɛ paa nwo nhwɛsoɛ: Wɔ ngyerɛkyerɛ nu, da nahorɛlilɛ ne ahoneserɛ ali,

Tito 3:1

Kaye bɛ ma bɛbrɛ bɛ nwo ase bɛma maen mbanyi ne bɛ bɔ tumi wura bɛ sa ɔ, kyɛ bɛyɛ sotie, ná bésiesie bɛ nwo bɛ́ma nnwumaa paa biala;

Tito 3:14

Ma yɛ mmenia besua nnwumaa paa nwo mmɔdenbɔlɛ, ná bɛ́fa bɛ́boka bɛ bɔ behia mmokalɛ paa ɔ; na mmom ɔnzɛ kyɛ bɛyɛ foen bɔ mvasoɛ nne bɛ so ɔ.

Tito 3:8

Ɛhe te edwirɛ nahorɛ, na mekuro kyɛ esi edwirɛ hemɔ so paa, amaa ɔnate so bɛ bɔ bale Nyameɛ bali ne badwene kyɛbɔ bɛkɔbɔ nnwumaa paa nwo mmɔden ɔ. Sɔ nningyein nemɔ yeɛ ɔte paa ɔ, na mvasoɛ wɔ so ma sona.

Hebrifoɛ 10:24

Ɛ́mɔma yɛpena atee bɔ yɛkɔfa so yɛkɔbokaboka yɛ nwo bɔ ɔkɔmaa yɛkohyire ɔdɔ ná yayɔ nnwumaa paa ɔ.

Hebrifoɛ 13:21

ɔ́ma ɛmɔ anwoserɛ wɔ nikyee paa biala nu ma ɛmɔyɔ ye apɛdeɛ; ná ɔ́fa Yesu Kristo so ma ɛmɔli dwumaa bɔ ɔsɔ ye nye ɔ. Animnyam hã ye afebɔɔ. Amen.

1 Petro 2:12

Ɔwɔ nu kyɛ Amaenmaensofoɛ nemɔ bɛkekã ɛmɔ nwo dwirɛ kyɛ ɛmɔte bɔnefoɛ de, nakoso ɛ́mɔma ɛmɔ bra yɛ sannwuu wɔ bɛ nu, amaa banwu ɛmɔ bra paa ne, ná bahyɛ Nyameɛ animnyam wɔ kyẽa bɔ ɔkɔwa ne.

1 Yohane 1:7

Nakoso sɛ yɛnate kanea nu, kyɛbɔ ye koso ɔwɔ kanea nu ne a, né yɛ ne yɛ nwo yɛ nwo yatira abiɛngoɛ, na Ɔwa Yesu Kristo mogya ne te yɛ nwo fi bɔne mukoraa nu.

1 Yohane 2:6

Na ebiala bɔ ɔnwa ɔne Nyameɛ atira abiɛngoɛ nen, odi kyɛ ye koso ɔbɔ ye bra kyɛbɔ Kristo bɔle ye deɛ ne.