Edwein 71:22 - AHYERƐLƐ KRONGRON

²² Ao me Nyameɛ, ɔnate wɔ nahorɛlilɛ ti, ngosa ngɔbɔ adengum ngɔye wɔ ayɛ; Ao Yisrael Krongronniɛ, ngɔfa sangoo ngɔto wɔ nwo ayɛyelɛ dwein.

Edwein 71:22 Iomraidhean Croise

2 Ahemvo 19:22

‘Nwa yeɛ agoro ye nwo ná abɔ ye alapaa ne? Nwa yeɛ adwudwo atia ye, bɔ ama wɔ nye atra wɔ ndo nwiaa ye? Yisrael Krongronniɛ ne yeɛ ayɔ ɛhe atia ye ɔ!

Edwein 138:2

Mebɔ me nu ase mefa me nye mekyire w’asɔneyɛɛ sua krongron ne, na mefa asennaa mema wɔ dumaa, ɔnate wɔ ɔdɔ bɔ onni ngasi ne wɔ nahorɛlilɛ ne ati; ofikyɛ apagya wɔ dumaa ne wɔ dwirɛ maa batra nikyee biala.

Edwein 144:9

Ao Nyameɛ, ngɔto edwein foforɛ ngɔye wɔ ayɛ; sangoo bɔ ye nyamaa buru yeɛ ngɔbɔ ngɔye wɔ ayɛ ɔ.

Edwein 25:10

AWURADE atee amukoraa te ɔdɔ bɔ onni ngasi ne nahorɛ ma bɛ bɔ bedi ye apam ne ye dwirɛ so ɔ.

Edwein 33:2

Ɛ́mɔfa sangoo bɛye AWURADE ayɛ; ɛ́mɔfa sangoo bɔ ye nyamaa buru ne bɛto ye nwo anigye dwein.

Edwein 43:4

Na ngɔhɔ Nyameɛ afɔleɛ bokyea ne anwo, ngɔhɔ Nyameɛ bɔ ɔte m’anigye mmorosoɛ ne berɛ; ao Nyameɛ, me Nyameɛ, ngɔbɔ sangoo ngɔye wɔ ayɛ.

Edwein 56:4

Nyameɛ bɔ meye ye dwirɛ ne ayɛ ne, Nyameɛ yeɛ mefa me wora mewura ye nu ɔ, yiti menzuro hwee; nzikyɛ yeɛ kuro sona kɔhora kɔfa kɔyɔ me ɔ?

Edwein 78:41

Besole Nyameɛ bɛneane mmerɛ pee, na bewurale Yisrael Krongronniɛ ne apue.

Edwein 89:1

Ao AWURADE, ngɔto wɔ ɔdɔ bɔ onni ngasi ne anwo dwein daa, na ngɔte me noa ngɔbɔ wɔ nahorɛlilɛ ne anwo dawure ngohyire aworɛ ndoatoasoɛ amukoraa.

Edwein 89:18

Ofikyɛ AWURADE yeɛ ɔte y’akokyɛm ɔ, Yisrael Krongronniɛ ne yeɛ ɔte yɛ Hene ɔ.

Edwein 98:3

Wakaye ye ɔdɔ bɔ onni ngasi ne, ɔne ye nahorɛlilɛ bɔ wala ye ali wahyire Yisrael awuro ama ne. Aseɛ so nekaa amukoraa banwu yɛ Nyameɛ ye ngoalelɛ ne.

Edwein 98:4

Aseɛ amukoraa, ɛ́mɔfa ahurusi bɛ́bɔ AWURADE nwo ese; ɛ́mɔtea nu beli ahurusi, ná ɛ́mɔto ayɛyelɛ dwein.

Edwein 98:5

Ɛ́mɔfa sangoo bɛ́to AWURADE nwo dwein, ɛ́mɔfa sangoo ne edweintolɛ.

Yesaya 12:6

O ɛmɔ bɔ ɛmɔte Sion ɔ, ɛ́mɔbɔ ese bɛ́to dwein anigye so, ofikyɛ Yisrael Krongronniɛ bɔ ɔwɔ ɛmɔ afia ne, ɔte piri.”

Yesaya 43:3

Ofikyɛ me ole AWURADE wɔ Nyameɛ, Yisrael Krongronniɛ ne, wɔ Defoɛ ne, Mafa Misraim mayɛ wɔ ti nyɔboɛ mapɔ wɔ, Mafa Yitiopia ne Seba masesã wɔ.

Yesaya 5:16

Nakoso Asafo AWURADE de, bɛma ye so wɔ ye ndɛenbualɛ turoloo nu, na Krongronniɛ Nyameɛ ɔda ye krongronyɛlɛ ali wɔ tenenee nu.

Yesaya 5:19

bɛ bɔ bɛnwa, “Ma ye nwo yɛ nyera e, maa ɔyɔ ye adwuma ne ndɛndɛ ma yɛnea e; Yisrael Krongronniɛ ne, ma ye botaeɛ ne opingye ma yɛnea e!”

Yesaya 5:24

Yiti kyɛbɔ see osi yera ngyɛngyɛma motoo, ɔne kyɛbɔ see wuronyiwuronyi osi yera ndire worowaa ne, sɔ ala yeɛ sɔ mmenia nemɔ bɛ ndii kɔporɔ ɔ, na mvrama kɔporo bɛ nyerɛen kogua kyɛ mvuture, ofikyɛ bapo Asafo AWURADE mmeraa ne, na babu Yisrael Krongronniɛ ne dwirɛ animtia.

Yesaya 57:15

Ofikyɛ Anwuro Anwuroniɛ ne, bɔ ɔwɔ berɛ afebɔɔ, bɔ ye dumaa ole Krongron ne, ɔnwa nyoo: “Anwuro ne nekaa krongron berɛ yeɛ nde ɔ, na sona bɔ wanya nnuhoɛ ne anwobrɛaseɛ ne, me ne ye yeɛ yɛte ɔ, amaa ɔnate so mama anwobrɛaseɛfoɛ bɛ sunzum anya ngoa, ná mama bɛ bɔ banya nnuhoɛ ne b’ahone anya ngoa.

Yesaya 60:9

Amba, supɔ mɔ kɔnwondɛ me, Tasise ɛlɛen mɔ yeɛ bekoli moa ɔ, bɛkɔfa wɔ mma mɔ bekofi dedeede bɛkɔwa bɔ b’ɛdwetɛ ne bɛ sikaa kɔkorɛ boka so, bɔ bɛbaafa bɛhyɛ AWURADE wɔ Nyameɛ dumaa animnyam, ɔne Yisrael Krongronniɛ ne animnyam ɔ, ofikyɛ wahyɛ wɔ animnyam.

Mika 7:20

Ɛkɔye nahorɛlilɛ ali kohyire Yakob, ɔne anwumvoinnwunɛ ali kohyire Abraham, kyɛbɔ ata ye nwo ndaen ahyire yɛ nana mɔ fi daa tete ne.

Romanfoɛ 15:8

Na mekã mekyire ɛmɔ kyɛ, Kristo yɛle somvoɛ mane bienzuapɛlɛfoɛ nemɔ fa hyirele Nyameɛ nahorɛlilɛ, kyɛ ɔma bɔhyɛ bɔ bɛhyɛle yɛ nana mɔ ne otindim,