Edwein 149:3 - AHYERƐLƐ KRONGRON

³ Odi kyɛ bɛfa abilie bɛye ye dumaa ayɛ, odi kyɛ bɛfa akasaa ne adengum bɛto ye nwo dwein.

Edwein 149:3 Iomraidhean Croise

2 Samuel 6:14

Dawide fale ye anwoserɛ amukoraa gole abilie wɔ AWURADE nyunu. Né Dawide afa ɔsɔfo ataadeɛ bɔ ɔte nwera ɔ wapɛ ye bo.

2 Samuel 6:16

Mmerɛ bɔ AWURADE alaka ne oodwuli Dawide kuro berɛ nen, Sɔɔlo awa brasua Mikal tole ye nye neane mboma nu. Onwuni kyɛ Nana Dawide ohuru pepe go abilie wɔ AWURADE nyunu ɔ, na obuli Dawide animtia wɔ ye ti anu.

1 Aberɛso Dwirɛ 16:42

Edwein bɔ bɛto ne, né Heman ne Yedutun yeɛ bɛbɔ totorobɛndo ne firikyiwa ne ɔ. Afei né besa bɛbɔ sangoo bɛto edwein krongron ne. Na Yedutun mma mmienzua nemɔ, bɛyele bɛ kyɛ bɛyɛ pambim awɛmvoɛ.

1 Aberɛso Dwirɛ 25:6

Edwein bɔ né bɛbɔ firikyiwa, sangoo ne adengum bɛto ye wɔ AWURADE awuro bɛfa bɛyɔ Nyameɛ awuro berɛ ɛsɔnenɛ adwuma ne, né bɛ baba nemɔ yeɛ bɛlela bɛ mukoraa bɛ noa ɔ. Asafe, Yedutun ne Heman de, né ɛhene bɔbɔ yeɛ ɔnea bɛ so ɔ.

2 Aberɛso Dwirɛ 20:28

Beedwuli Yerusalem, na bele adengum ne sangoo ne totorobɛndo bɛwale AWURADE awuro.

2 Aberɛso Dwirɛ 29:25

Ɔmane Lewifoɛ nemɔ bɛtenane AWURADE awuro berɛ bɛbɔle firikyiwa, adengum ne sangoo, kyɛbɔ Dawide ne Nana ye sona bɔ ɔse ase Gade ne ngɔmhyɛlɛniɛ Natan bɛhane ne ala. Ofikyɛ sɔ ahyɛdeɛ ne, AWURADE nate ye ngɔmhyɛlɛfoɛ so yeɛ ɔhyɛle ɔ.

Ɛsra 3:10

Suasilɛfoɛ nemɔ hyɛle ye bo bɔ bɛto AWURADE asɔneyɛɛ sua ne fapem nen, asɔfo mɔ bɔ bawurawura asɔfo ndaadeɛ ɔ behuli totorobɛndo, yeɛ Lewifoɛ bɔ bɛte Asafe bosofoɛ ne koso, bɛbɔle firikyiwa bɛyele AWURADE ayɛ, kyɛbɔ Yisrael hene Dawide hyehyɛ mane bɛ ne ala.

Edwein 30:11

Ama m’aworabɔlɛlilɛ wakakyi ahurusililɛ; aye me nwo ɛsɛen tena ne agua berɛ, na afa anigye ahera me,

Edwein 33:2

Ɛ́mɔfa sangoo bɛye AWURADE ayɛ; ɛ́mɔfa sangoo bɔ ye nyamaa buru ne bɛto ye nwo anigye dwein.

Edwein 81:2

Ɛ́mɔkenga edwein, ɛ́mɔwoso akasaa ne, ɛ́mɔbɔ sangoo fɛɛfɛɛ ne adengum ne.

Edwein 81:3

Ɛmɔhu totorobɛndo wɔ ɛsraen foforɛ aluolue ne, mmerɛ bɔ ɛsraen kɔyɛ mumua ne, wɔ y’aluolue kyẽa ne.

Edwein 87:7

Edweintolɛfoɛ ne abiliegolɛfoɛ bɛkã kyɛ, “Wɔ nu yeɛ me saleɛ amukoraa wɔ ɔ.”

Ɛksadɔso 15:20

Afei ngɔmhyɛlɛniɛ Miriam bɔ ɔte Aarɔn aliɛma brasua ne, ɔfale akasaa tirale, na mmrasua ne amukoraa bɛwosole akasaa begole abilie befitele belili ye si.

Yeremia 31:13

Yeɛ ndaluwa kɔfa anigye bekogo abilie ne, mmerandeɛ ne nworowaa bɛ nye kɔgye kɔbɔ nu; ofikyɛ ngɔma bɛ suɛ kɔkakyi ahurusililɛ, ngɔkyekye bɛ wora, na ngɔma bɛ nye kɔgye kofi b’aworabɔlɛ nu.

Yeremia 31:4

Ao Yisrael ababunu, ngosa ngɔma wɔ bo kotimu, na wɔ bo kotimu. Ekosa kɔfa w’akasaa ne kosiesie wɔ nwo, na ɛkɔfa ahurusililɛfoɛ b’abilie kosi nu kɔhɔ.

Maenbulɛfoɛ 11:34

Afei Yɛfeta sa wale ye awuro wɔ Misepa. Na edwirɛ nwanwa! Ɔwa brasua ne le akasaa ne abilie fitele kyɛ ɔbaayia ye! Né odi ye bahorɛ. Né olle baa bienzua anaa baa brasua ko boka ye so.