Edwein 103:8 - AHYERƐLƐ KRONGRON

⁸ AWURADE se anwumvoin, na ɔdo mmenia, ye ahone nhu ndɛ, na ye ɔdɔ bɔ onni ngasi ne ɔsone.

Edwein 103:8 Iomraidhean Croise

Nehemia 9:17

Bɛyɛle b’adwene kyɛ bengoli so, na anwanwadeɛ bɔ ɛyɔle mane bɛ ne, bangaye, na mmom bɛyɛle asoserɛ, yeɛ bɛyele sona maa ɔlale bɛ noa kyɛ besa bɛkɔ ngoaasolɛ nu wɔ Misraim. Nakoso ɛte Nyameɛ bɔ ɛfa bɔne kyɛ, ɛdo mmenia, yeɛ ɛse anwumvoin, w’ahone nhu ndɛ, wɔ ɔdɔ bɔ onni ngasi sone, na anye wɔ sa amvi bɛ bo.

Edwein 130:7

Ao Yisrael, fa wɔ wora wura AWURADE nu! Ofikyɛ AWURADE yeɛ ole ɔdɔ bɔ onni ngasi ɔ, na ye yeɛ ɔpepɛ de sona mmorosoɛ ɔ.

Edwein 145:8

AWURADE do mmenia, na ɔse anwumvoin; ye ahone nhu ndɛ, na ye ɔdɔ bɔ onni ngasi ne, ɔsone.

Edwein 31:20

Wɔ natelɛ bɔ ɛne bɛ nate ne, ɔbɔ bɛ nwo waen fi mmenia bɛ porɛ bɔ babɔ ɔ nwo; ɛfa wɔ ndaa butu bɛ so ede bɛ fi ngɔngɔnzaafoɛ sa nu.

Edwein 86:15

Nakoso, ao AWURADE, ɛte Nyameɛ bɔ ɛse anwumvoin ná ɛdo mmenia ɔ; w’ahone nhu ndɛ, na wɔ ɔdɔ bɔ onni ngasi ne wɔ nahorɛlilɛ ne, ɔsone.

Edwein 86:5

Ao AWURADE, ɛte paa, na ɛfa bɔne kyɛ; wɔ ɔdɔ bɔ onni ngasi ne ɔsone ma bɛ bɔ besu bɛfrɛ wɔ ɔ.

Yesaya 55:7

Ohia kyɛ bɔnefoɛ yakyi ye yɔleɛ, yeɛ sona bɔ ɔndengyɛ ne koso, maa ɔsesã ye adwene, maa osa bra AWURADE berɛ, na okonwu ye anwumvoin, maa ɔbra yɛ Nyameɛ berɛ, ofikyɛ ɔkɔfa bɔne ne kɔhyɛ kandinga paa.

Yeremia 32:18

wɔ bɔ ɛye wɔ ɔdɔ ali kyire mmenia apee apee, nakoso ɛprapra seɛ mɔ b’amumuyɛɛ nwo akatuaa gua bɛ mma mɔ so ɔ. Ao, Nyameɛ Piri, Tuminiɛ kandinga, ye dumaa ole Asafo AWURADE.

Yoel 2:13

Ɛ́mɔsunzua ɛmɔ ahone nu, na nna ɛmɔ ndaadeɛ nu ɔ, ná ɛ́mɔsa bɛbra AWURADE ɛmɔ Nyameɛ berɛ. Ofikyɛ ɔdo mmenia na ɔse anwumvoin; ye ahone nhu ndɛ, ye ɔdɔ bɔ onni ngasi ne ɔsone, na ɔsesã ye adwene ɔtwe bɔne nwo asohwenɛ sa.

Yona 4:2

Na ɔbɔle mbaeɛ bisale AWURADE kyɛ, “Ao AWURADE, mesrɛ wɔ, mmerɛ bɔ né nwɔ me maen nu ne, aso nna edwirɛ he yeɛ ngane ɔ? Ye sɔ ti yeɛ nwatili kyɛ ahaa mekɔ Tasise ne, ofikyɛ mese kyɛ ɛte Nyameɛ bɔ ɛdo mmenia ná ɛse anwumvoin ɔ, w’ahone nhu ndɛ, wɔ ɔdɔ bɔ onni ngasi ne ɔte piri, na ɛsesã w’adwene wɔ musue bɔ ɛbaafa ba ɔ nwo.

Nahum 1:3

AWURADE ahone onhu ndɛ, ye tumi te piri; na ongobua bɔ odi fɔ ɔ be le. AWURADE atee la mvrama bɔ ɔpɛ ye nwo, ɔne mvrama bɔ otu serɛserɛ ɔ nu, na munungum te ye gya bo mvuture.

Numeri 14:18

‘AWURADE ahone nhu ndɛ, na ye ɔdɔ bɔ onni ngasi sone; ɔfa amumuyɛɛ ne mmeraatolɛ kyɛ, nakoso ɔmma sona bɔ odi fɔ ne, ɔmva ye nwo tɔtorɔtɔɔ; ɔprapra seɛ mɔ bɔne nwo asohwenɛ gua bɛ boso ama mɔ so, maa okodwu aworɛ ndoatoasoɛ nza ne nna so.’

Deuteronomi 5:10

Nakoso bɛ bɔ bekuro me dwirɛ, ná bedi me mmeraa dwirɛ so ne de, mekuro bɛ dwirɛ maa okodwu aworɛ ndoatoasoɛ apee apee so.

Yakobo 5:11

Ɛ́mɔtie, bɛ bɔ bemiane bɛ nye bɛfale amaneɛ nu ne, yɛbu bɛ kyɛ banya saleɛ. Yeɛ ɛmɔate Yob amaneɛnwunɛ nu animia ne, na ɛmɔanwu kyɛbɔ Awurade maa osi yiele ye ɔ, kyɛbɔ Awurade anwumvoinnwunɛ sone, ná osa le tema maa ɔbo so ɔ.