Edwein 1:2 - AHYERƐLƐ KRONGRON

² Sɔ sona ne, ye nye gye AWURADE mmeraa ne anwo, na ye mmeraa ne yeɛ ɔdwene ye nwo eyia ne kɔngɔen ɔ.

Edwein 1:2 Iomraidhean Croise

Gyenesise 24:63

Ye nɔsoa ne, Yisake hɔle eburo kyɛ ɔkwaadwenedwene edwirɛ bie anwo. Ɔmane ye nye so, na onwuni kyɛ afupɔngɔ biemɔ bɛ́ba.

Ɛsra 7:10

Ofikyɛ né Ɛsra watu ye nwo wasie berɛ kyɛ okosua AWURADE mmeraa ne, kyɛ okoli so, ɔne kyɛ okohyirehyire sɔ ahyɛdeɛ ne ɔne nhyehyɛleɛ ne wɔ Yisrael.

YOB NWOMAA NE 23:12

Ye mmeraa bɔ wahyɛ ne, mmmuli so, na ye noa dwirɛ ne, ye nwo hia me maa mafa masie me ti anu.

Edwein 104:34

Mesrɛ kyɛ ɔma bɔ medwene ye nwo ne ɔsɔ ye nye, ofikyɛ AWURADE nu yeɛ medi ahurusi ɔ.

Edwein 112:1

Ɛ́mɔye AWURADE ayɛ! Sona bɔ osuro AWURADE, ná ye nye gye ye mmeraa dwirɛ nwo paa ne, onya saleɛ.

Edwein 119:1

Bɛ bɔ bɛ bra te sannwuu, ná bedi AWURADE mmeraa so ne, benya saleɛ.

Edwein 119:11

Mafa wɔ dwirɛ ne masie me ti anu, amaa ɔnate so manyɔ bɔne mandia wɔ.

Edwein 119:35

Di me nyunu fa me fa wɔ mmeraa dwirɛ atee ne aso, ofikyɛ me nye gye ye nwo.

Edwein 119:72

Wɔ noa nu mmeraa te paa ma me tra esikaa kɔkorɛ ne ɛdwetɛ apee apee.

Edwein 119:92

Sɛ nna wɔ mmeraa yeɛ me nye gye ye nwo a, ahaa mawu wɔ m’amaneɛnwunɛ nu.

Edwein 40:8

Ao me Nyameɛ, bɔ mekuro ole kyɛ ngɔyɔ w’apɛdeɛ ɔ; wɔ mmeraa ne wɔ me ti anu.”

Edwein 88:1

Ao AWURADE, me ngoadefoɛ Nyameɛ, mesu wɔ wɔ nyunu eyia ne kɔngɔen.

Yeremia 15:16

Nwuni wɔ dwirɛ ne, na ɔyɛle m’aleɛ, wɔ dwirɛ ne yɛle me anika, na ɔma m’ahone tɔle me kunu ofikyɛ wɔ, AWURADE Asafo Nyameɛ, wɔ dumaa yeɛ ɔla me so ɔ.

Luka 18:7

Na bɛ bɔ Nyameɛ aneanea nu waye bɛ, bɔ besu bɛfrɛ ye eyia ne kɔngɔen ne, sɛ ɔto ye bo ase ɔkyɛ kãa wɔ bɛ nwo a, aso ongoli bɛ dwirɛ ngɔma bɛ anaa?

Luka 2:37

Né ɔte kunaniɛ bɔ wali afoɛ kɔyɛ aburawɔtwɛ ne nna; na daa biala né ɔwɔ asɔneyɛɛ sua nu berɛ, bɔ eyia ne kɔngɔen ole akɔngyere ne mbaeɛbɔlɛ ɔsɔne Nyameɛ ɔ.

Romanfoɛ 7:22

Ofikyɛ me nye gye Nyameɛ mmeraa nwo wɔ me nu paa.

1 Tɛsalonikafoɛ 2:9

Aliɛmaa mɔ, ɛmɔkaye kyɛbɔ yɛsi yɛyɔle adwuma, ɔne yɛ fɛɛ bɔ yɛfɛle ɔ. Yɛyɔle adwuma eyia ne kɔngɔen kyɛbɔ ɔkɔyɛ na yanyɛ ɛmɔ nu biala so tɔsom, wɔ mmerɛ bɔ né yɛkã Nyameɛ nzɛmba ne yɛkyire ɛmɔ ne.

1 Timoteo 4:15

Bɔ mmɔden wɔ sɔ nningyein hemɔ anwo, tu wɔ nwo sie berɛ ma bɛ bɔkɔɔ, amaa ɔnate so wɔ ngɔsoɛ ala ali ama ebiala anwu ye.

2 Timoteo 1:3

Mefa asennaa mema Nyameɛ bɔ mefa tiboa paa meso ye, kyɛbɔ me nana mɔ bɛsole ye ne, kyɛ daa biala mekaye wɔ wɔ me mbaeɛ nu eyia ne kɔngɔen.

Yosua 1:8

Nnɛyakyi Mmeraa nwomaa he kengalɛ le; na mmom dwene ye nwo alehyeleɛ ne alesaleɛ, amaa ɔnate so ali bɔ bahyerɛ ye nu amukoraati so nahorɛ nu. Na ɛhe yeɛ ɔkɔmaa nningyein kɔhɔ so yé kɔma wɔ, ná wayie wɔ yé ɔ.

1 Yohane 5:3

Sɛ yɛdi Nyameɛ ahyɛdeɛ so a yeɛ okyire kyɛ yɛkuro ye dwirɛ ɔ, na ye ahyɛdeɛ ne aso lilɛ koso nyɛ se.