Daniel 9:4 - AHYERƐLƐ KRONGRON

⁴ Mmɔle mbaeɛ ngyirele AWURADE me Nyameɛ, na nne ndole nu ngane ye pefee kyɛ, “O AWURADE, Nyameɛ piri bɔ ye nwo yɛ suro, bɔ odi apam ne ɔdɔ bɔ onni ngasi ɔ so ma bɛ bɔ bekuro ye dwirɛ ɔne bɛ bɔ bedi ye mmeraa dwirɛ so ɔ;

Daniel 9:4 Iomraidhean Croise

1 Ahemvo 8:23

Ɔhane kyɛ, “Ao, AWURADE Yisrael Nyameɛ, nyameɛso bɔ ɔwɔ anwuro, anaakyɛ aseɛ ye aso, nyameɛ biala nne berɛ bɔ ɔte kyɛ wɔ ɔ, bɔ odi apam so ná okyire ɔdɔ bɔ onni ngasi ne kyire ye ngoaa bɔ bɛye bɛ kunu fitaa bedi ye dwirɛ so ɔ.

2 Aberɛso Dwirɛ 7:14

ná me maen bɔ me dumaa la bɛ so ɔ, bɛbrɛ bɛ nwo ase, bɛbɔ mbaeɛ, bɛpena me si atee, ná bɛsakyera b’adwene befi brabɔlɛ tɛɛ ne anwo a, ye de ngotie bɛ sufrɛ wɔ nyameɛso, ngɔfa bɛ bɔne ngɔhyɛ bɛ, ná masa b’aseɛ ne anwonyerɛ.

Ɛsra 10:1

Mmerɛ bɔ Ɛsra gu so ɔbɔ mbaeɛ, bɔ ole esuɛ ode bɛ bɔne to nu, bɔ né wafa ye nyunu wabutu berɛ wɔ Nyameɛ awuro ne anyunu berɛ ne, Yisraelfoɛ pembepembe, mmienzua ne mmrasua ne ngwadaa bɛɛpɛle ye nwo beyiale, na bɛ koso besuni hahii.

Nehemia 1:5

Na ngane kyɛ, “Ao AWURADE, nyameɛso Nyameɛ, Nyameɛ piri bɔ wɔ nwo yɛ suro bɔ edi apam so ná ɛye ɔdɔ bɔ onni ngasi ali kyire bɛ bɔ bekuro wɔ dwirɛ ná bedi wɔ mmeraa dwirɛ ne aso ne,

Nehemia 9:32

“Yiti afei, yɛ Nyameɛ bɔ ɛte piri bɔ wɔ nwo yɛ suro, bɔ edi apam so ná ekyire ɔdɔ bɔ onni ngasi ɔ, amaneɛ amukoraa bɔ wato yɛ ne y’ahemvo, yɛ mbanyi mɔ, y’asɔfo mɔ, yɛ ngɔmhyɛlɛfoɛ, yɛ nana mɔ, ɔne wɔ mmenia amukoraa, ofi Asiria ahemvo mɔ aberɛ so bɔ ɔbaadwu ɛnɛ ye, nnebu ye nikyee ba.

Edwein 32:5

Afei ngane me bɔne ngyirele wɔ, na mangata m’amumuyɛɛ so. Ngane kyɛ, “Ngɔhã me mmeraatolɛ ngohyire AWURADE,” na ɛfale me bɔne nwo foɛlilɛ hyɛle me. Sela

Ɛksadɔso 20:6

Nakoso bɛ bɔ bekuro me dwirɛ, ná bedi me mmeraa dwirɛ so ne de, mekuro bɛ dwirɛ maa okodwu aworɛ ndoatoasoɛ apee apee so.

Yeremia 3:13

Wɔ de, de w’amumuyɛɛ to nu, kyɛ ayɛ AWURADE wɔ Nyameɛ nwo lɔen, afa wɔ ɔdɔ ama ɛwɔfoɛ mɔ wɔ bakaa monɛ biala abo, na ɛmɔandie me noa dwirɛ, AWURADE noa dwirɛ ɛne.

Yeremia 32:23

Na bɛwale aseɛ ne aso bɛɛfale. Nakoso bandie wɔ dwirɛ, yeɛ banni wɔ mmeraa ne aso. Na ahyɛdeɛ amukoraa bɔ ɛfa mane bɛ kyɛ beli so ne, banni so. Ye sɔ ati yeɛ aprapra musue he amukoraa agua bɛ so ye.

Daniel 6:10

Na Daniel tele kyɛ wafa ye sa wawura mmeraa ne abo nen, ɔhɔle ye awuro aborɔsaen ne aso, nekaa bɔ ye pia nu mboma mɔ bebukye a bɛ nye kyire Yerusalem ne. Na kyɛbɔ né daa ne ɔyɔ ne ala, ɛlɛho biala oguale ndwerɛ pɛen nza ɔbɔle mbaeɛ lale ase wɔ ye Nyameɛ nyunu.

Daniel 9:3

Yeɛ mva nziele me nye so ndwe mbingyele AWURADE Nyameɛ, kyɛ ngoli mmuadaa, ngɔhera ɛsɛen tena, ngotu nzoen ngogua me nwo ngɔfa me mbaeɛ ne sufrɛ ngɔto ye nyunu.

Luka 1:72

kyɛ okonwu yɛ nana mɔ anwumvoin, ná wakaye ye apam krongron ne.

Romanfoɛ 8:28

Yɛse kyɛ bɛ bɔ bekuro Nyameɛ dwirɛ ne, bɔ okosi biala ɔboka bɛ, bɛ bɔ ɔnate ye nhyehyɛleɛ so wafrɛ bɛ ne.

Deuteronomi 5:10

Nakoso bɛ bɔ bekuro me dwirɛ, ná bedi me mmeraa dwirɛ so ne de, mekuro bɛ dwirɛ maa okodwu aworɛ ndoatoasoɛ apee apee so.

Deuteronomi 7:12

“Na sɛ ɛmɔyɛ asoɛ betie sɔ nhyehyɛleɛ hemɔ, ná ɛmɔdi so pɛpɛɛpɛ a, ye de adɔeɛ apam bɔ AWURADE wɔ Nyameɛ tale ye nwo ndaen hyirele wɔ nana mɔ ne, AWURADE koli so kɔma wɔ.

Deuteronomi 7:21

Nnɛma bɛ nwo suronyi tɔ wɔ so, ofikyɛ AWURADE wɔ Nyameɛ bɔ ogyi wɔ si ne, ɔte Nyameɛ bɔ ɔte piri, bɔ ye nwo yɛ suro ɔ.

Deuteronomi 7:9

Yiti ɔsɛ kyɛ enwu ye kyɛ, AWURADE wɔ Nyameɛ ne, ye ole Nyameɛ; Nyameɛ nahorɛlilɛniɛ bɔ odi ye adɔeɛ apam so ma mmenia bɔ bekuro ye dwirɛ ná bedi ye mmeraa dwirɛ so ɔ, kodwu aworɛ ndoatoasoɛ apee so.

Yakobo 1:12

Sona bɔ omia ye nye fa nzɔhwɛ nu ne, onya saleɛ; ofikyɛ sɛ ɔkora gyina nzɔhwɛ ne noa a, okonya ngoa abotire bɔ Awurade afa ahyɛ bɛ bɔ bekuro ye dwirɛ bɔ ne.

Yakobo 2:5

Nniɛma mɔ bɔ ɛmɔla m’ahone nwo ɔ, ɛ́mɔtie! Aso Nyameɛ ɔnneneane nu ɔyyele wiase ahiafoɛ kyɛ bɛyɛ gyidie nu anwonyafoɛ, ná benya agyapadeɛ wɔ ahennie ne anu, ahennie bɔ wafa wahyɛ bɛ bɔ bekuro ye dwirɛ ne bɔ ne?