Daniel 9:27 - AHYERƐLƐ KRONGRON

²⁷ Ɔne mmeni pee bɛkɔyɛ apam kitii afoɛ nzoo. Na afoɛ nzoo ne, ye bue ko, ɔkɔbera ngaka afɔleɛbɔlɛ ne aleɛ afɔleɛbɔlɛ. Busueniɛ ne, ɔkɔfa akyiwadeɛ amoen ne kosie asɔneyɛɛ sua ne anu, kɔpem kyɛ ɛsɛkyelɛ mmerɛ bɔ Nyameɛ ahyehyɛ ato berɛ ama busueniɛ ne ɔkɔto ye ɔ.

Daniel 9:27 Iomraidhean Croise

Yesaya 28:15

Ofikyɛ ɛmɔnwa, “Yɛne ewue ayɛ apam, yɛne ɛborɔ yayɛ nhyehyɛleɛ, sɛ mbire bɔ ye noa yɛ yea tra so ne ɔbaapɛ nu a, ongonya yɛ ngofi yɛ, ofikyɛ yafa kanda yayɛ yɛ afealeɛ, yeɛ yafa nnakannaka yabɔ yɛ nwo waen.”

Yesaya 28:22

Yiti nnɛma ɛmɔdi ngorohoɛ ko, anyɔ a, bekomia ɛmɔ panwu ne anu; ofikyɛ mate ehuhunɛ pasaa nwo dwirɛ mafi Asafo AWURADE Nyameɛ berɛ, kyɛ, ɔkɔmaa ɔkɔto aseɛ amukoraa.

Yesaya 42:6

“Me, AWURADE, mafrɛ wɔ wɔ tenenee nu, ngotira wɔ sa ngɔfa wɔ ngosie, ngɔfa wɔ ngɔyɛ apam ngɔma maen ne, ɔne kanea ngɔma maen maen mɔ,

Yesaya 53:11

Okonwu ye kra amaneɛnwunɛ ne aso mvasoɛ maa ye ahone kɔtɔ ye kunu, na m’akoaa teneneeniɛ ne, ye nimdeɛ yeɛ ɔkɔfa kobua mmeni pee be ɔ, ofikyɛ ye yeɛ ɔkɔsoa b’amumuyɛɛ ɔ.

Yesaya 55:3

Ɛ́mɔyɛ asoɛ bétie, ná ɛmɔbra me berɛ; ɛ́mɔtie, amaa ɔnate so ɛmɔ kra anya ngoa. Me ne ɛmɔ yɛkɔyɛ apam afebɔɔ, bɔ ɔte me ɔdɔ bɔ onni ngasi bɔ nne ye ma Dawide ne.

Yeremia 7:30

“Ofikyɛ AWURADE nwa nyoo: Yudafoɛ bayɔ bɔne wɔ me nye so. Bagyinagyina b’akyiwadeɛ nningyein ne wɔ sua bɔ me dumaa la so ne anu, maa ɔnate so bafa efiɛ bahã ye.

Daniel 11:31

Ɔkɔma ye koɛhonɛfoɛ mɔ bɛkɔfa efiɛ bɛkɔhã nekaa krongron ne, bɔ ɔte anwoserɛ ne; bɛkɔbera daa biala naen yeralɛ afɔleɛ ne, na bekogyina akyiwadeɛ bɔ ɔbɔ maen ne.

Daniel 11:36

“Ɛhene ne kɔyɔ bɔ okuro ɔ; ɔkɔmoma ye nwo so kɔyɛ ye nwo konguronn kohyire kyɛ ɔtra nyameɛ biala, na ɔkɔhã edwirɛ nwanwa kotia nyameɛ mɔ nu Nyameɛ ne, na okonya ngɔsoɛ koodwu kyɛ ahonehulɛ ne kɔwa nu ɔ, ofikyɛ bɔ bahyehyɛ bato berɛ ne, ɔkɔwa nu.

Daniel 12:11

Na ofi mmerɛ bɔ bɛkɔbera daa biala naen yeralɛ afɔleɛ ne, ɔne mmerɛ bɔ bekogyina akyiwadeɛ bɔ ɔbɔ maen ne nen, ɔkɔyɛ ngyẽa apee ko ɛyaa nyɔ ne aburahona.

Daniel 7:25

Okodwudwo kotia Anwuro Anwuroniɛ ne, ɔkɔmaa Anwuro Anwuroniɛ n’anwoteefoɛ nemɔ bekoli amia, na ɔkɔyɛ ye adwene kyɛ ɔkɔsesã mmerɛ ne mmeraa, na bɛkɔfa anwoteefoɛ nemɔ bekowura ye sa afoɛ ko, afoɛ nyɔ ne bosome nzia.

Daniel 8:13

Yeɛ ndele kyɛ krongronniɛ bie odwudwo, na krongronniɛ ko koso bisale bɔ odwudwole ne kyɛ, “Daa biala naen yeralɛ afɔleɛ ne, musuebɔlɛ mmeraatolɛ ne, nekaa krongron berɛ bɔ waali ye sa ne, yeɛ ɛlɔen ne bɔ otiatiale bɛ so ne nwo nyekyire ne, mmerɛ beni yeɛ ɔkɔhɔ so koodwu ɔ?”

Hosea 3:4

Ofikyɛ Yisraelfoɛ kɔtena mmerɛ tendenn bɔ belle hene, bɔ belle dehyeɛ, bɔ bɛmmɔ afɔleɛ, bɔ belle amoen, bɔ belle asɔfo ataadeɛ ne abusua amoen ɔ,

Numeri 7:62

ayaa ko bɔ bafa esikaa kɔkorɛ bayɔ ɔ, bɔ nu nonɛ, ɛkyɛ kilo ko nu ɛyaa a, ɔte nu ngyɛmuɛ nza, bɔ ɛyɛɛ ayi ye tɛkyɛ ɔ;

Mateo 24:15

“Yiti sɛ ɛmɔnwu akyiwadeɛ bɔ ɔbɔ maen ne, bɔ ngɔmhyɛlɛniɛ Daniel hane ye nwo dwirɛ ne, kyɛ ogyi nekaa krongron berɛ a, (bɔ ɔkenga ne, maa ɔte ye bo),

Mateo 26:28

ofikyɛ ɛhe yeɛ ɔte me mogya bɔ ogyi berɛ ma apam bɔ mmenia pee ti béhwie bégua bɛ́ma bɔnefakyɛ ɔ.

Mateo 27:51

Na yieee, ɛtena bɔ ɔpɛ asɔneyɛɛ sua ne anu ne, nu suale nyɔ fili anwuro oodwuli ase; na aseɛ wosole, na nyɔbotaen mɔ nu dwudwale;

Marko 13:14

“Na sɛ ɛmɔnwu akyiwadeɛ bɔ ɔbɔ maen ne, kyɛ ogyi nekaa bɔ ɔnzɛ kyɛ ogyina a, (bɔ ɔkenga ne, maa ɔte ye bo), ye de, bɛ bɔ bɛwɔ Yudea ne, odi kyɛ bɛnwati bɛkɔ mmokaa nemɔ aso;

Luka 21:20

“Na sɛ ɛmɔnwu kyɛ koɛhonɛfoɛ bapɛ Yerusalem nwo bayia a, ye de ɛ́mɔnwu ye kyɛ ye bɔlɛ apingye.

Luka 21:24

Bɛkɔtotɔ ngrandɛ noa, bɛkɔhye bɛ nnure bɛkɔhɔ maen maen mukoraa so; na Amaenmaensofoɛ kotiatia Yerusalem so koodwu kyɛ Amaenmaensofoɛ nemɔ bɛ mmerɛ ne kɔwa nu ɔ.

Romanfoɛ 11:26

Yiti bekole Yisrael amukoraa ngoa, kyɛbɔ bahyerɛ kyɛ, “Defoɛ ne kofi Sion yeɛ ɔkɔwa ɔ, na ɔkɔye amumuyɛɛ biala kofi Yakob nu.

Romanfoɛ 5:15

Na kyɛbɔ mvomsoɛ ne ɔte ne, nna sɔ yeɛ adom akyɛdeɛ ne ɔte ɔ. Ofikyɛ sɛ ɔnate sona ko bɔne so mmenia pee nyane ewue de a, nzaade né Nyameɛ adom, ɔne ye akyɛdeɛ bɔ ɔwɔ Yesu Kristo nu ne sone maa ɔbo so ma mmenia pee.

Romanfoɛ 5:19

Afei kyɛbɔ ɔnate sona ko asoserɛ so ti mmeni pee yɛle bɔnefoɛ nen, sɔ ala yeɛ ɔnate sona ko sotie so mmeni pee kɔyɛ teneneefoɛ ɔ.

Hebrifoɛ 9:28

sɔ ala yeɛ Kristo bɔ bɛfale ye bɛbɔle afɔleɛ komapɛ kyɛ ɔsoa mmeni pee bɛ bɔne ne, okosa kɔwa ye pɛen so ɔ; ɔmmangyikyi bɔne, na mmom ɔbaale bɛ bɔ bɛ́nea ye ate nemɔ ngoa.