Daniel 9:13 - AHYERƐLƐ KRONGRON

¹³ Kyɛbɔ bahyerɛ ye wɔ Mose mmeraa ne anu ne, musue he amukoraa atoto yɛ, nakoso yanzrɛ AWURADE yɛ Nyameɛ kyɛ onwu yɛ anwumvoin. Yɛhhwene yɛ nwo yɛffili yɛ amumuyɛɛ nwo, yeɛ yɛyyɛle yɛ adwene kyɛ yɛkotie wɔ nahorɛ ne ɔ.

Daniel 9:13 Iomraidhean Croise

2 Ahemvo 22:16

AWURADE nwa nyoo: nwomaa bɔ Yuda hene akenga ne, ngogyina nu dwirɛ amukoraa so ngɔfa amaneɛ ngɔto maen he ɔne nu ama so.

YOB NWOMAA NE 36:13

“Bɛ bɔ benzuro Nyameɛ ne, bɛte nzɛmmɔtia, na sɛ Nyameɛ twe bɛ so po a, benzu bɛmvrɛ ye.

Edwein 119:18

Bukye me nye maa nwu anwanwadeɛ wɔ wɔ mmeraa ne anu.

Edwein 119:27

Maa nde w’ahyɛdeɛ atee ne abo, na ngɔbɔ w’anwanwadeɛ nnwumaa ne anwo dawure.

Edwein 119:73

Wɔ sa yeɛ ɛfa bɔle me ná esiesiele me ɔ; ma me ndeaseɛ maa mva nzua wɔ mmeraa dwirɛ ne.

Edwein 85:4

Ao yɛ ngoalelɛ Nyameɛ, maa yɛsa yɛbra wɔ berɛ, na ɛyaa bɔ afɛ ye wɔ yɛ so ne, yakyi maa ɔha.

Yesaya 31:1

Bɛ yaakɔ, bɛ bɔ bɛkɔ Misraim bɛkɔpena mmokalɛ, bɔ bɛfa bɛ nye bɛto mbɔngɔ so, bɔ ɔnate teaseɛnam mɔ bɛ somaa ti bɛfa bɛ wora bewura bɛ nu, bɔ ɔnate pɔngɔhanɛfoɛ mɔ b’anwoserɛ ti bɛfa bɛ wora bewura bɛ nu, nakoso bɛmva bɛ nwo bɛndo Yisrael Krongronniɛ ne so ɔ, anaakyɛ bɛmbena AWURADE si atee ɔ.

Yesaya 42:9

Tie, nningyein daa ne, bawa nu, na méfa nningyein foforɛ meto dwaa, na mékã bɛ nwo dwirɛ mekyire ɛmɔ koraka né basi.”

Yesaya 43:22

“Nakoso, O Yakob, anzɔne me, na mmom, me nwo afono wɔ, O Yisrael!

Yesaya 64:6

Yɛ mukoraa yayɛ kyɛ nikyee bɔ ye nwo nde ɔ, na yɛ tenenee amukoraa ɔte kyɛ ndangurɛ fiɛ; yɛ mukoraa yɛkese kyɛ nyaa, na yɛ amumuyɛɛ pia yɛ kɔ kyɛ mvrama.

Yesaya 64:7

Ebiala nne berɛ bɔ ɔbɔ wɔ dumaa sɔne wɔ ɔ bɔ waye ye kunu wafa ye nwo wabɔ wɔ ɔ; ofikyɛ aye wɔ nye ato buro afea yɛ, na yɛ amumuyɛɛ ti ahũhũ yɛ.

Yesaya 9:13

Nakoso maen ne anza angɔ ye bɔ ɔhwene bɛ so ne berɛ, yeɛ bambena Asafo AWURADE si atee.

Yeremia 2:30

Ɛhwenɛ bɔ mahwe ɛmɔ mma mɔ bɛ so ne, wayɛ mbaen, bande fo. Ɛmɔ bɔbɔ ɛmɔ ngrandɛ yeɛ wahũ ɛmɔ ngɔmhyɛlɛfoɛ kyɛ gyata bɔ ye nye aboro ɔ.

Yeremia 30:14

Wɔ dɔfo amukoraa bɛ wora afi wɔ; bɛmbena wɔ si atee, ofikyɛ mapura wɔ kyɛbɔ pɔfoɛ kopura wɔ ɔ; yeɛ mahwe wɔ so kyɛbɔ atianuserɛniɛ kɔhwe wɔ so ɔ, ofikyɛ w’amumuyɛɛ sone pee, yeɛ wɔ bɔne ayɛ buburugyaa.

Yeremia 31:18

Amba, mate kyɛ Efraim ɔ́bɔ abubue kyɛ, ‘Ahwe me so, na manya asohwenɛ, kyɛ nandwie ba bɔ bennya bɛffale kɔnnua bɛttole ye kɔme ɔ. Maa nza mmra, na ngosa ngɔwa, ofikyɛ wɔ yeɛ ɛte AWURADE me Nyameɛ ɔ.

Yeremia 44:23

Ɔnate kyɛ ɛmɔayera ɛyɛɛ, ɔne kyɛ ɛmɔayɔ bɔne batia AWURADE, ná ɛmɔandie AWURADE noa dwirɛ, yeɛ ɛmɔanni ye mmeraa, ye ahyɛdeɛ ne ye nhyehyɛleɛ so ne ati, yeɛ sɔ amaneɛ he wato ɛmɔ kyɛbɔ ɔte ɛnɛ ye.”

Yeremia 44:27

Ɛ́mɔtie, ngotu me nye ngosie bɛ so ngɔfa bɔ ɔtte mayee ɔ ngoli bɛ, na mmom nna paa ɔ; na Yuda mmienzua amukoraa bɔ bɛwɔ Misraim aseɛ so ne, bɛkɔtotɔ wɔ ngrandɛ noa, na ɛhɔen kohũhũ bɛ maa bekowuwu, kɔpem kyɛ bɛ boso konua ɔ.

Yeremia 5:3

Ao AWURADE, aso nna nahorɛ yeɛ wɔ nye pena kyɛ onwu ye ɔ? Ahwe bɛ so, nakoso wanyɛ bɛ yea; ahũhũ bɛ, nakoso bamva ɛhe bandu bɛ nwo foɛ, bɛ nyunu porɛ bɔ babɔ ɔ, ɔtra nyɔboɛ, na bayɛ b’adwene kyɛ bɛngɔsakyera.

Awuye 5:21

Ao AWURADE, ma yɛ nye osa kakyi ɔbra wɔ berɛ, na yɛkosa yɛkɔwa. Maa yɛsa yɛpe yɛ daa nu.

Hesekiel 16:43

Na ɔnate kyɛ angaye mmerɛ bɔ né ɛte abaayaa, na mmom afa ɛhemɔ amukoraa ahu m’ahone ne ati, tie, ngɔma wɔ yɔleɛ kɔbɔ wɔ ti so, AWURADE Nyameɛ noa dwirɛ ɛne. Aso amva nyanzoen bra ammoka w’akyiwadeɛ yɔleɛ amukoraa so?

Daniel 9:11

Amba, Yisrael amukoraa abu wɔ mmeraa ne aso, bali makyebu bɔ bendie wɔ dwirɛ ɔ. Na ɛnomalɛ ne ndaen bɔ bahyerɛ ye wɔ Nyameɛ somvoɛ Mose mmeraa ne anu ne, wawa yɛ so, ofikyɛ yayɔ bɔne yatia ye.

Hosea 7:10

Yisrael anwomasoɛ di adanzeɛ tia ye, nakoso benza bɛmma AWURADE bɛ Nyameɛ berɛ, yeɛ ɛhe amukoraa si ne, bɛmbena ye si ate.

Hosea 7:14

Bemvi b’ahone nu benzu bɛmvrɛ me, na mmom bɛbɔ awuye wɔ bɛ bɛen so; bɛpepɛ bɛ nwo naen bɛpena aburoo ne nzaa, na bɛyɛ me nwo lɔen.

Hosea 7:7

Bɛ mukoraa bayɛ hye kyɛ foonoo, bekũkũ bɛ maenbulɛfoɛ mɔ; b’ahemvo amukoraa batotɔ, na bɛ nu biala nne berɛ bɔ osũ frɛ me ɔ.

Luka 24:45

Afei obukyele b’adwene nu maa bɛtele Ahyerɛlɛ ne abo.

Yohane 10:35

Na sɛ ɔfrɛle bɛ bɔ Nyameɛ dwirɛ ne wale bɛ berɛ ne nyameɛ mɔ, bɔ ebie ngora nzɛkye Ahyerɛlɛ ne a,

Yohane 6:45

Bahyerɛ ye wɔ ngɔmhyɛlɛfoɛ nwomaa ne anu kyɛ, ‘Bɛ mukoraa bɛkɔyɛ mmenia bɔ Nyameɛ ahyirehyire bɛ ɔ.’ Ebiala bɔ wate, ná wasua wafi Baba ne berɛ nen, ɔba me berɛ.

Yohane 8:32

na ɛmɔkonwu nahorɛ ne, na nahorɛ ne kɔyɛ ɛmɔ nnehyeɛ.”

Ɛfesofoɛ 4:21

Ɛmɔate ye nwo dwirɛ amba, yeɛ bayɛ ngyerɛkyerɛ bahyire ɛmɔ wɔ ye nu, kyɛbɔ Yesu nu nahorɛ ne ɔte ne.

Deuteronomi 29:4

Nakoso ɛnɛ ne ɛnɛ ye po, AWURADE nnya mmane ɛmɔ adwene bɔ ɔte edwirɛ (hemɔ) bo ɔ, anaa anyeɛ bɔ onwu nikye ɔ, anaa asoɛ bɔ ɔte dwirɛ ɔ.

Yakobo 1:5

Na sɛ ɛmɔ nu bie tɔ sii nworɛ nu a, maa obisa Nyameɛ bɔ ɔye ye kunu fa ma mmenia, bɔ ɔmva animguaseɛ mmata ye nwo ne, na ɔkɔfa kɔma ye.