Daniel 6:22 - AHYERƐLƐ KRONGRON

²² Me Nyameɛ wasoma ye abɔfo maa waahã gyata nemɔ bɛ noa wato nu, yiti banyɔ me huu, ofikyɛ wanwu me kyɛ medi be wɔ ye nyunu; yeɛ Nana, wɔ nyunu koso nnyɔle bɔne biala.”

Daniel 6:22 Iomraidhean Croise

Gyenesise 40:15

Ofikyɛ nahorɛ nu, bɛhyele me nnure befili Hebrifoɛ aseɛ so; na ɛwa po, nnyɔle hwee bɔ ɔsɛ kyɛ bɛfa me bɛto kumaa nu kuku nu ɔ.”

2 Samuel 22:7

Nzu mvrɛle AWURADE wɔ m’amaneɛ nu, na ndeane nu mvrɛle me Nyameɛ kyɛ ɔboka me. Ɔwɔ ye asɔneyɛɛ sua nu yeɛ ɔtele me mbaeɛ ɔ, na me sufrɛ dwuli ye so anu.

1 Ahemvo 13:28

na ɔhɔ onwuni kyɛ efuin ne la atee ne anu, bɔ afunum ne ɔne gyata ne begyigyi ye nwo berɛ ɔ. Né gyata ne ollili fuin ne, yeɛ né ohhuni afunum ne koso.

2 Aberɛso Dwirɛ 32:21

Na AWURADE somane abɔfo ko maa oohuhuni koɛhonɛfoɛ atitire nemɔ, safohene nemɔ ne mbanyi amukoraa bɔ bɛwɔ Asiria hene asikyeleɛ ne anu ne. Yiti Senakeribo le animguaseɛ sa hɔle ye bɔbɔ ye maen nu. Oodwuli ye bosoen sua ne anu ne, ye bɔbɔ ye mma bele ngrandɛ behuni ye wɔ berɛ.

Edwein 118:28

Wɔ yeɛ ɛte me Nyameɛ ɔ, ngɔye wɔ ayɛ; wɔ yeɛ ɛte me Nyameɛ, ngɔpagya wɔ.

Edwein 26:6

Menwunzi me sa mefa mekyire kyɛ menni fɔ, na mepɛ w’afɔleɛ bokyea ne anwo mebra meyia, ao AWURADE;

Edwein 31:14

Nakoso ao AWURADE, mafa me wora mawura wɔ nu, menwa, “Me Nyameɛ ole wɔ.”

Edwein 34:7

Bɛ bɔ besuro AWURADE ne, ye abɔfo bɔ bɛ nwo waen bra yia, na ɔpepɛ de bɛ.

Edwein 38:21

Ao AWURADE, nnɛpo me, ao me Nyameɛ, nnɛtwe wɔ nwo fi me nwo.

Edwein 84:11

Ofikyɛ AWURADE Nyameɛ te eyia ne akokyɛm; ye yeɛ ɔdo sona ná ɔmaa onya animnyam ɔ, na bɛ bɔ bɛ bra te sannwuu ne, ɔmva nikye paa biala mmɔ bɛ atianuserɛ.

Yesaya 3:10

Ɛmɔhã behyire teneneefoɛ kyɛ okoyie bɛ yé, ofikyɛ bɛ sa kɔhã bɛ yɔleɛ paa nwo akatuaa.

Yesaya 63:9

Bɛ yealɛlilɛ amukoraa nu ne, ɔyɛle ye yea, na ye nyunu abɔfo ne, ɔpepɛ lele bɛ; ɔnate ye dɔ ne ye anwumvoinnwunɛ ne aso ɔpepɛ lele bɛ, ɔpagyale bɛ, na ododole bɛ wɔ daa tete mmerɛ ne amukoraa.

Yeremia 37:18

Yeremia sa bisale Nana Sedekia kyɛ, “Nzikyɛ tɛɛ yeɛ mayɔ wɔ anaa wɔ mbanyi anaa maen he bɔ ɛmɔafa me bato kuku nu ye?

Daniel 3:28

Yeɛ Nebukadenesa sele kyɛ, “Sadrake, Mesake ne Abedinego Nyameɛ bɔ wasoma ye abɔfo maa waapepɛ wale ye somvoɛ mɔ bɔ bɛfale bɛ wora bewurale ye nu ne, animnyam hã ye. Bɛ yeɛ behwi bɛfale me, Nana, me mmeraa so ɔ, na bɛfale bɛ ngoa bɛtole serewa, bɔ banzo anaa banzɔne nyameɛ biala ɔ, sana bɛ bɔbɔ bɛ Nyameɛ.

Daniel 6:20

Na opingyele tuin ne anwo berɛ nen, ole ahunundetelɛ teane nu frɛle Daniel, na osele Daniel kyɛ, “Daniel, Nyameɛ teasefoɛ somvoɛ ee, wɔ Nyameɛ bɔ ɛso ye daa ne, wahora wapepɛ wale wɔ wafi gyata nemɔ bɛ sa nu anaa?”

Daniel 6:23

Yeɛ ɔyɛle ɛhene ne fɛ paa, na ɔhyɛle kyɛ bɛye Daniel befi tuin ne anu. Yiti bɛyele Daniel befili tuin ne anu, na bannwu kyɛ ye nwo nekaa biala wapuropuro ɔ, ofikyɛ ɔfale ye wora wurale ye Nyameɛ nu.

Daniel 6:4

Yeɛ mbanyi so neafoɛ nemɔ ne mbɔtam mbanyi nemɔ, bɛpenane ahennie ne bulɛ nwo dwirɛ bɔ ɔkɔma Daniel nwo kɔhyere ye ɔ, nakoso bannya mvomsoɛ anaa ye nwo dwirɛ tɛɛ biala, ofikyɛ né odi nahorɛ, na bannya ye nwo mvomsoɛ anaa bɔne biala.

Daniel 6:7

Yɛ, ahennie ye anu mbanyi so neafoɛ mɔ, mbanyi, mbɔtam mbanyi, foɛtulɛfoɛ ne amrado mɔ amukoraa bahã bɛ ti bapura, kyɛ odi kyɛ Nana hyɛ mmeraa, ná ɔbra ye kitii kyɛ, eleburasa ye anu, sona biala bɔ ɔkɔfa ye abisadeɛ kɔto nyameɛ bie anaa sona bie nyunu ne, odi kyɛ begyi ye bɛto gyata nemɔ bɛ tuin ne anu; Nana, sana wɔ ngome wɔ nyunu yeɛ odi kyɛ ɔfa to ɔ.

Mika 7:7

Yiti me de, AWURADE yeɛ me nye la ye so ɔ; ngɔfa me wora ngowura me ngoalelɛ Nyameɛ nu; me Nyameɛ kotie me.

Numeri 20:16

Yɛsu yɛfrɛle AWURADE. Otiele yɛ suɛ, na ɔsomane abɔfo maa ɔɔyele yɛ fili Misraim. Kekesaala ye yɛwɔ Kadese, kuro bɔ ɔwɔ w’aseɛ ne noa ne aso.

Mateo 27:46

Na ɔbɔle kɔyɛ eyia nnɔnmmiɛnza ne, Yesu teane nu serɛserɛ hane kyɛ, “Eli, Eli, lama sabaktani?” Bɔ ye bo kyire kyɛ, “Me Nyameɛ, Me Nyameɛ, nzu ati yeɛ apo me ye?”

Asomafoɛ 12:11

Na Petro nye wale ye nwo so ne, ɔhane kyɛ, “Afei de, manwu kyɛ ɔte nahorɛ kyɛ Awurade asoma ye abɔfo maa waaye me wafi Herode sa nu, ɔne nikyee biala bɔ Yudafoɛ nye la so kyɛ bɛkɔfa bɛkɔyɛ me ɔ nu.”

Asomafoɛ 24:16

Ɛhe ati, mmerɛ biala mebɔ mmɔden kyɛ me tiboa ngobua me foɛ wɔ Nyameɛ ne kuro sona nyunu ɔ.

Asomafoɛ 27:23

Ɔnate kyɛ, ɛnɛ kɔngɔen ye, Nyameɛ bɔ nde ye deɛ ná meso ye n’abɔfo wale me berɛ,

2 Korintofoɛ 1:12

Bɔ yɛfa yɛhoahoa yɛ nwo ɛhe: yɛ tiboa di yɛ adanzeɛ kyɛ yafa nahorɛlilɛ ne nyamesuro yeɛ yabɔ yɛ bra wɔ wiase ɔ, nganga yɛ ne ɛmɔ asetena nu. Yamva ewiase nworɛ so yeɛ yɛbɔle yɛ bra ɔ, na mmom yɛnate Nyameɛ adom so.

2 Timoteo 4:17

Nakoso Awurade gyinane me si mane me anwoserɛ, kyɛbɔ ɔkɔyɛ bɔ ɔkɔfa me so kɔbɔ edwirɛ ne dawure bɔkɔɔ kɔma Amaenmaensofoɛ amukoraa bɛkɔte ɔ. Yiti ɔpepɛ lele me fili gyata noa nu.

Hebrifoɛ 1:14

Aso bɛ mukoraa bɛtte sunzum asomvoɛ mɔ, bɔ ɔsoma bɛ maa bɛkɔɔso mmenia bɔ bekonya ngoalelɛ ɔ?

Hebrifoɛ 11:33

Bɛ yeɛ ɔnate gyidie so bɛhone belili ahennie ahoroɔ so ngonim ɔ, begyinane bɛmane tenenee, bɛ sa hane bɔhyɛ mɔ, bɛhane gyata mɔ noa bɛtole nu;

1 Samuel 17:37

Na AWURADE bɔ olele me fili gyata sa nu, ɔne kwabrafo sa nu ne, okole me kofi sɔ Filistiniɛ he sa nu.” Yeɛ Sɔɔlo sele Dawide kyɛ, “Kɔ, na mesrɛ kyɛ AWURADE ogyina wɔ si!”

1 Samuel 26:18

Na Dawide fa sɔle so kyɛ, “Nzu ati yeɛ me mene ɔfoa ye somvoɛ ɔ? Mayɔ nzu? Bɔne beni yeɛ mayɔ ɔ?