Daniel 3:17 - AHYERƐLƐ KRONGRON

¹⁷ Na sɛ ɔte sɔ de a, ye de yɛ Nyameɛ bɔ yɛso ye ne, ɔkɔhora kɔpepɛ kole yɛ kofi see bɔ ogye wuronyiwuronyi wɔ foonoo nu ne anu; na Nana, ɔkɔpepɛ kole yɛ kofi wɔ sa nu.

Daniel 3:17 Iomraidhean Croise

Gyenesise 17:1

Mmerɛ bɔ Abram lili afoɛ aburahona ne ngona ne, AWURADE yele ye nwo ali hyirele ye, na osele ye kyɛ, “Me ole Tuminiɛ Nyameɛ, di me dwirɛ so, ná ma wɔ bra yɛ sannwuu.

Gyenesise 18:14

Aso nikyee bie wɔ berɛ bɔ ɔyɛ se ma AWURADE hɔ ɔ? Na mmerɛ bɔ mahyɛ ne, afoɛ bieku bekye sɔa ala, ngosa ngɔwa wɔ wa, na Sara konya baa bienzua.”

YOB NWOMAA NE 34:29

Na sɛ ɔyɛ konn a, nwa yeɛ ɔkɔhora kobua ye fɔ ɔ? Sɛ ɔfa ye nyunu fea a, nwa yeɛ okonwu ye ɔ? Nakoso, kyɛ maen oo, kyɛ sona oo, ɔnea bɛ so,

YOB NWOMAA NE 5:19

Ɔkɔye wɔ kofi amaneɛ sɔ alaa nzia nu, yoo, na bɔ ɔtɔ so nzoo ne anu, edwirɛ biala ngɔto wɔ.

Edwein 115:3

Nahorɛ nu, yɛ Nyameɛ ne ɔwɔ anwuro, na bɔ okuro biala yeɛ ɔyɔ ɔ.

Edwein 37:39

Teneneefoɛ de, bɛ ngoalelɛ fi AWURADE, na bɛkɔ amaneɛ nu a, ye yeɛ ɔte b’afealeɛ ɔ.

Edwein 37:40

AWURADE boka bɛ, na ɔpepɛ de bɛ; ɔpepɛ de bɛ fi bɔnefoɛ sa nu, na ode bɛ ngoa, ofikyɛ bɛnwati bɛkɔfea ye nu.

Edwein 73:20

Sɛ sona da dwɔso a, bɛte kyɛ laleɛ bie, yeɛ wɔ AWURADE koso, sɛ ɛkekã wɔ nwo a, ebu bɛ kyɛ laleɛ bie.

Yesaya 12:2

Amba, Nyameɛ te me ngoalelɛ, ngɔfa me wora ngowura ye nu, na mengosuro, ofikyɛ AWURADE Nyameɛ te m’anwoserɛ ne me dwein, na wayɛ me ngoalelɛ.”

Yesaya 54:14

Wɔ bo kotindim wɔ tenenee nu, ɛne nhyɛsoɛ b’afia atee kɔwale, ofikyɛ engosuro, yeɛ ɛne ahunundetelɛ b’afia atee kɔwale, ofikyɛ ongopingye wɔ.

Yeremia 1:8

Nnɛsuro bɛ nyunu, ngyi wɔ si, na ngɔpepɛ ngole wɔ,” AWURADE noa dwirɛ ɛne.

Yeremia 15:20

Na ngɔfa wɔ ngogyina berɛ kyɛ kɔɔbere fasue bɔ nu amia ɔ ngɔma maen he. Bɛkɔho bekotia wɔ, nakoso bengoli wɔ so ngonim, ofikyɛ ngyi wɔ si, kyɛ mede wɔ ngoa ná mepepɛ mede wɔ, AWURADE noa dwirɛ ɛne.

Yeremia 15:21

Ngɔpepɛ ngole wɔ ngofi bɔnefoɛ mɔ sa nu, na ngɔpɔ wɔ ngofi atianuserɛfoɛ bɛ sa nu.

Daniel 3:26

Yeɛ Nebukadenesa pingyele see bɔ ogye wuronyiwuronyi wɔ foonoo ne anu ne, na osele kyɛ, “Sadrake, Mesake ne Abedinego, Anwuro Anwuro Nyameɛ ye somvoɛ mɔ, ɛ́mɔfi nu béfite bɛbra!” Yeɛ Sadrake, Mesake ne Abedinego befili see ne anu befitele.

Daniel 4:35

na aseɛ sofoɛ amukoraa bɛtte huu wɔ ye nye so, bɔ okuro biala yeɛ ɔyɔ ye wɔ nyameɛso lɔen mɔ nu, ɔne aseɛ sofoɛ mɔ nu ɔ, na ebiala nne berɛ bɔ ɔkɔhora kogyina ye tumi noa, anaa okobisa ye kyɛ, ‘Nzikyɛ yeɛ ɛyɔ e?’

Daniel 6:16

Yeɛ ɛhene ne hyɛle maa bɛɛfale Daniel bɛwale, na begyili ye bɛtole gyata mɔ tuin ne anu. Na ɛhene ne sele Daniel kyɛ, “Wɔ Nyameɛ bɔ ɛso ye daa ne, ɔpepɛ le wɔ!”

Daniel 6:23

Yeɛ ɔyɛle ɛhene ne fɛ paa, na ɔhyɛle kyɛ bɛye Daniel befi tuin ne anu. Yiti bɛyele Daniel befili tuin ne anu, na bannwu kyɛ ye nwo nekaa biala wapuropuro ɔ, ofikyɛ ɔfale ye wora wurale ye Nyameɛ nu.

Daniel 6:27

Ode ngoa, na ɔpepɛ de mmenia, na ɔyɔ nzɛngyerɛnneɛ ne anwanwadeɛ wɔ nyameɛso ne aseɛ so, na ye yeɛ wapepɛ wale Daniel wafi gyata mɔ bɛ sa nu ɔ.”

Mika 7:7

Yiti me de, AWURADE yeɛ me nye la ye so ɔ; ngɔfa me wora ngowura me ngoalelɛ Nyameɛ nu; me Nyameɛ kotie me.

Luka 1:37

ofikyɛ Nyameɛ de, nikyee biala nne berɛ bɔ ɔngora nyɔ ɔ.”

Asomafoɛ 20:24

Nakoso me de, memva he menyɛ hwee, yeɛ me ngoa koso memva menyɛ hwee; amaa ɔnate so mahora mafa anigye mayie me natelɛ ne Awurade Yesu asɛmbatrɛ adwuma bɔ ɔfa mane me kyɛ nni Nyameɛ adom nzɛmba ne nwo adanzeɛ ne.

Asomafoɛ 21:13

Nakoso obuale yɛ kyɛ, “Na esuɛ ye koso ɛ? Bɔ bɛyɔ sɔ bɛma m’aba nu bu ye! Me de, nna kuku nu nnaa ngome yeɛ masiesie me nwo mama ɔ, na mmom kyɛ Awurade Yesu dumaa ti ngowu wɔ Yerusalem ɔ.”

Romanfoɛ 8:31

Afei nzikyɛ yeɛ yɛkɔhã kɔfa ɛhemɔ nwo ɔ? Sɛ Nyameɛ gyi yɛ si a, nwa yeɛ ɔkɔho kotia yɛ ɔ.

2 Korintofoɛ 1:10

Ye yeɛ ɔyele yɛ fili ewue suronyisuronyi sɔa nu ɔ, na ɔkɔpepɛ kole yɛ; ye yeɛ yafa yɛ wora yawura ye nu ɔ, kyɛ okosa kɔpepɛ kole yɛ ɔ.

Hebrifoɛ 7:25

Yiti ɔkora de bɛ bɔ bɛfa ye so bɛba Nyameɛ berɛ ne ngoa bɔkɔɔ; ofikyɛ ɔte ase afebɔɔ, na odi bɛ ti dwirɛ ma bɛ.

1 Samuel 17:37

Na AWURADE bɔ olele me fili gyata sa nu, ɔne kwabrafo sa nu ne, okole me kofi sɔ Filistiniɛ he sa nu.” Yeɛ Sɔɔlo sele Dawide kyɛ, “Kɔ, na mesrɛ kyɛ AWURADE ogyina wɔ si!”

1 Samuel 17:46

Ɛnɛ kyẽa ye, AWURADE kɔfa wɔ kowura me sa. Ngohũ wɔ ngɔpɛ wɔ ti. Ɛnɛ kyẽa ye, ngɔfa Filisti koɛhonɛfoɛ nemɔ bɛ fuin ngɔma ewienu nnomaa ne aseɛ so ngaka. Na ɔnate so ewiase amukoraa konwu ye kyɛ Nyameɛ bie wɔ Yisrael.