Daniel 2:47 - AHYERƐLƐ KRONGRON

⁴⁷ Afei ɛhene ne sele Daniel kyɛ, “Nahorɛ nu, ɛmɔ Nyameɛ ne, ɔte nyameɛ mɔ nu Nyameɛ ne ahemvo mɔ nu Meneɛ, ɔne Nyameɛ bɔ ɔda mvealeɛ nu dwirɛ ali ɔ, ofikyɛ ahora ala sɔ mvealeɛ nu dwirɛ he ali.”

Daniel 2:47 Iomraidhean Croise

Gyenesise 41:39

Yiti Faro sele Yosef kyɛ, “Ɔnate kyɛ Nyameɛ aye ɛhe amu wahyire wɔ ne ati, ebiala nne berɛ bɔ ole nimdeɛ na ɔse nworɛ kyɛ wɔ ɔ;

2 Ahemvo 5:15

Yeɛ Naaman, ɔne ye lɔen bɔ bɛboka ye so amukoraa, besa bɛhɔle Nyameɛ sona ne berɛ. Naaman oogyinane ye nyunu berɛ, na ɔhane kyɛ, “Afei de manwu kyɛ aseɛ ye aso amukoraa, Nyameɛ biala ɔnne neka fee sana Yisrael angome. Mesrɛ wɔ, de w’akoaa sa nu akyɛdeɛ ye.”

YOB NWOMAA NE 12:19

Opuro asɔfo mɔ bɛ ndaadeɛ, na otu tumifoɛ fi bia so.

Edwein 136:2

Ao, ɛmɔla nyameɛ mɔ nu Nyameɛ ne ase, ofikyɛ ye ɔdɔ bɔ onni ngasi ne, ɔwɔ berɛ afebɔɔ.

Edwein 136:3

Ao, ɛmɔla meneɛ mɔ nu Meneɛ ne ase, ofikyɛ ye ɔdɔ bɔ onni ngasi ne, ɔwɔ berɛ afebɔɔ.

Edwein 72:11

Maa ahemvo amukoraa bɛkoto wɔ ye nyunu, ná maen maen amukoraa bɛso ye.

Edwein 82:1

Nyameɛ atena ye bia nu wɔ nyameɛso badwa ne anu, na obua nyameɛ mɔ ndɛen kyɛ,

Edwein 96:4

Ofikyɛ AWURADE te piri, na ɔfata ayɛyelɛ piri paa; odi kyɛ sona suro ye tra nyameɛ biala.

Hesekiel 26:7

“Ofikyɛ AWURADE Nyameɛ nwa nyoo: Tie, mebaafa Babilɔn hene Nebukadenesa bɔ ɔte ahemvo mɔ nu hene ne, ɔne mbɔngɔ, teaseɛnam mɔ, pɔngɔhanɛfoɛ ne koɛhonɛfoɛ ɛlɔen pee mefi sorɔ dɔ meba wɔ, Tiro so.

Daniel 11:36

“Ɛhene ne kɔyɔ bɔ okuro ɔ; ɔkɔmoma ye nwo so kɔyɛ ye nwo konguronn kohyire kyɛ ɔtra nyameɛ biala, na ɔkɔhã edwirɛ nwanwa kotia nyameɛ mɔ nu Nyameɛ ne, na okonya ngɔsoɛ koodwu kyɛ ahonehulɛ ne kɔwa nu ɔ, ofikyɛ bɔ bahyehyɛ bato berɛ ne, ɔkɔwa nu.

Daniel 2:19

Yeɛ Nyameɛ lale mvealeɛ nu dwirɛ ne ali hyirele Daniel wɔ kɔngɔen nyekyire nu. Na Daniel hyɛle nyameɛso Nyameɛ ne animnyam.

Daniel 2:22

ɔda edwirɛ bɔ nu pi ɔ, ɔne mvealeɛ nu dwirɛ ali, ɔse bɔ ɔwɔ awosii nu ɔ, na kanea ne ye yeɛ bɛte ɔ.

Daniel 2:28

na mmom Nyameɛ bie wɔ nyameɛso bɔ ɔda mvealeɛ nu dwirɛ ali ɔ, na ye yeɛ waye bɔ kyẽa bie okosi ɔ wahyire Nana Nebukadenesa ɔ. Ɛla wɔ bɛen so ne, wɔ laleɛ ne nyekyire bɔ enwuni ne, ye ɛhe:

Daniel 2:29

Nana, mmerɛ bɔ né ɛla wɔ bɛen so ne, bɔ kyẽa bie okosi ɔ nwo adwene wale wɔ ti anu, na bɔ ɔda mvealeɛ nu dwirɛ ali ne yeɛ waye bɔ ɔbaasi ɔ wahyire wɔ ɔ.

Daniel 2:30

Na me de, nna kyɛ nworɛ yeɛ mese metra ateasefoɛ amukoraa ti ɔ, yeɛ ɔmaa ɔnate so waye sɔ mvealeɛ nu dwirɛ he wahyire me ɔ. Na mmom, Nana, kyɛbɔ ɔkɔyɛ bɔ bekohyire ye bo bekohyire wɔ, ná afei ate edwirɛ bɔ ɔwale wɔ ti anu ne abo ti ɔ.

Daniel 2:37

Wɔ, Nana, ɛte ahemvo mɔ bɛ nu hene bɔ nyameɛso Nyameɛ ne wafa ahennie, tumi, anwoserɛ ne animnyam wama wɔ ɔ.

Daniel 3:15

Afei de, sɛ ɛmɔaboaboa ɛmɔ nwo kyɛ sɛ ɛmɔte awɛen, dodobɛen, sangoo, bɛnda, atɛndɛbɛn, kyenneɛ ne sangoo ahoroɔ nga a, ɛmɔkobutu berɛ bɛkɔsɔne amoen bɔ magyina ne a, ye de ɛmɔ nwo sonn. Nakoso sɛ ɛmɔanzɔne ye de a, ye de bekofindi ɛmɔ bekogua see bɔ ogye wuronyiwuronyi wɔ foonoo nu ne anu; na nyameɛ beni yeɛ ɔkɔhora kɔpepɛ kole ɛmɔ kofi me sa nu ɔ?”

Daniel 3:28

Yeɛ Nebukadenesa sele kyɛ, “Sadrake, Mesake ne Abedinego Nyameɛ bɔ wasoma ye abɔfo maa waapepɛ wale ye somvoɛ mɔ bɔ bɛfale bɛ wora bewurale ye nu ne, animnyam hã ye. Bɛ yeɛ behwi bɛfale me, Nana, me mmeraa so ɔ, na bɛfale bɛ ngoa bɛtole serewa, bɔ banzo anaa banzɔne nyameɛ biala ɔ, sana bɛ bɔbɔ bɛ Nyameɛ.

Daniel 3:29

Yiti, méhyɛ mmeraa kyɛ, maen, mmenia anaa edwudwolɛ biala bɔ ɔkɔhã dwirɛ kotia Sadrake, Mesake ne Abedinego Nyameɛ ne nen, ngɔmaa bɛkɔtete ye nu pasapasa, na bɛkɔfa ye awuro bɛkɔkakyi fofoɛ; ofikyɛ nyameɛ biala nne berɛ bɔ ɔkora pepɛ de sona sɔaa ɔ.”

Daniel 4:17

Sɔ ahyɛdeɛ ne, awɛmvoɛ nemɔ bɛ noa dwirɛ ɛne, krongronfoɛ nemɔ b’agyina bɔ batu hɔ ɛne, amaa ɔnate so ateasefoɛ banwu kyɛ Anwuro Awuroniɛ ne yeɛ ole adasa ahennie so tumi ɔ, ɔfa ma sona biala bɔ okuro ɔ, na adasa nu anwobrɛaseɛfoɛ yeɛ ɔfa bɛ sie so ɔ.’

Daniel 4:25

Bɛkɔfoa wɔ bekofi mmenia nu, na ɛne eburo ngaka yeɛ bɛkɔɔtena ɔ. Bɛkɔmaa ekoli ndire kyɛ nandwie, na nyameɛso bosue kɔloa wɔ. Ɛhe kɔto wɔ afoɛ nzoo, kɔpem kyɛ ekonwu ye kyɛ Anwuro Anwuroniɛ ne yeɛ ole adasa ahennie so tumi ɔ, na ebiala bɔ okuro ne yeɛ ɔfa ma ye ɔ.

Daniel 4:32

Bɛkɔfoa wɔ bekofi mmenia nu, na ɛne eburo ngaka yeɛ bɛkɔɔtena ɔ. Bɛkɔmaa ekoli ndire kyɛ nandwie. Ɛhe kɔto wɔ afoɛ nzoo, kɔpem kyɛ ekonwu ye kyɛ Anwuro Anwuroniɛ ne yeɛ ole adasa ahennie so tumi ɔ, na ebiala bɔ okuro ne yeɛ ɔfa ma ye ɔ.”

Daniel 5:11

Biaa bie wɔ w’ahennie ye anu bɔ nyameɛ krongron mɔ bɛ sunzum wɔ ye nu ɔ. Wɔ baba aberɛ so, benwuni kanea ne nimdeɛ ne nworɛ bɔ ɔte kyɛ nyameɛ nemɔ bɛ nworɛ deɛ ne bie ɔ wɔ ye nu, na wɔ baba Nana Nebukadenesa bɔle ye panyi wɔ ngonyaayelɛfoɛ, bɛ bɔ bɛnea nzramaa nu bɛkã nu dwirɛ, Kaldeafoɛ ne benewaafoɛ nemɔ bɛ so,

Amose 3:7

Amba, AWURADE Nyameɛ ngɔyɔ nikyee biala, bɔ ɔngɔla ye mvealeɛ nu dwirɛ ne ali ngohyire ye somvoɛ mɔ ngɔmhyɛlɛfoɛ nemɔ ɔ.

1 Korintofoɛ 14:25

Ye ti anu mvealeɛ nu dwirɛ kɔla ali, ɔkɔfa ye nyunu kobutu berɛ kɔsɔne Nyameɛ, ná wahã kyɛ Nyameɛ wɔ ɛmɔ nu amba.

Deuteronomi 10:17

Ofikyɛ AWURADE ɛmɔ Nyameɛ ne, ɔte nyameɛ mɔ nu Nyameɛ ɔne meneɛ mɔ nu Meneɛ, Nyameɛ piri bɔ ye nwo yɛ suro, bɔ ɔnyɛ nyeyemuɛ, bɔ onne fea-ase-ma ɔ.

1 Timoteo 6:15

Na bɔ ɔkɔma ɛhe kɔla ali wɔ mmerɛ bɔ ɔsɛ ɔ nu ole saleɛniɛ ne Tuminiɛ komapɛ twe ne, ahemvo mɔ nu Hene ne meneɛ mɔ nu Meneɛ ne,

Yosua 22:22

“AWURADE, ɔte Ɛdangama Nyameɛ! AWURADE, ɔte Ɛdangama Nyameɛ! Ye yeɛ odi yɛ adanzeɛ ɔ, na yɛpena kyɛ Yisrael koso te ye bo. Sɛ yayɛ AWURADE nwo lɔen, anaakyɛ yanni nahorɛ yamma ye a, ye de ɛmɔhu yɛ ɛnɛ.

Nyekyire 1:5

ɔne bɔ ofi Yesu Kristo bɔ ɔte danzeniɛ nahorɛniɛ ne, awufoɛ nu bamuɛbaa ne aseɛ so ahemvo mɔ bɛ hene ne berɛ ne, ɔbra ɛmɔ so. Ye bɔ okuro yɛ dwirɛ, ná wafa ye mogya wanwunzi yɛ nwo wafi yɛ bɔne nu,

Nyekyire 17:14

Bɛkɔfa koɛ bɛkɔteta Boaen Ba ne, na Boaen Ba ne koli bɛ so ngonim; ofikyɛ ɔte meneɛ mɔ nu Meneɛ ne ahemvo mɔ nu Hene; na bɛ bɔ bɛboka ye so ne, wafrɛ bɛ, waneanea nu waye bɛ, na bedi nahorɛ.”

Nyekyire 19:16

Né ole dumaa bie bɔ bahyerɛ ye wɔ ye ataadeɛ nu ne ye sɔ nwo kyɛ, “Ahemvo mɔ nu Hene ne meneɛ mɔ nu Meneɛ.”