Daniel 11:4 - AHYERƐLƐ KRONGRON

⁴ Na sɛ onya nyinasoɛ yie a, afei ye ahennie ne kɔbɔ, na nu kɔhyehyɛ kɔhɔ nyameɛso mvrama nna nemɔ anu; nakoso ongooli ye bosofoɛ mɔ sa, yeɛ tumi bɔ bɛkɔfa bekoli hene ne ɔngɔyɛ kyɛ ye deɛ ne; ofikyɛ ye ahennie ne kogyigya, na okooli ebiemɔ mbaen bɛ sa nu.

Daniel 11:4 Iomraidhean Croise

Edwein 39:6

Amba, ebiala nate berɛ kyɛ wawoɛ bie. Amba, sona ha ye nwo mbaen, sona pena agyapadeɛ pee, nakoso ɔnze sona bɔ okooli ye sa ɔ.

Nworɛ Dwirɛhanɛniɛ 4:8

Sona bɔ wayɛ angonam bɔ olle ba anaa aliɛmaa ɔ, nakoso adwuma serɛ alaa yeɛ ɔkɔ so yɔ ɔ, na ye nye nzɔ ye anwonya bɔ wanya ye ɔ. Na obisa ye nwo kyɛ, “Adwuma bɔ mefɛ me nwo meyɔ, bɔ mama m’anigye abɔ me ye, nwa yeɛ mefɛ mema ye ɔ?” Ɛhe koso te mbaen ne adwuma fuin.

Yeremia 12:15

Na ɔkɔwa kyɛ, sɛ metu bɛ bo mefi berɛ a, ngosa ngonwu bɛ anwumvoin, na ngosa ngɔfa bɛ nu biala ngɔwa ye agyapadeɛ nu ne ye aseɛ so.

Yeremia 12:17

Nakoso maen bɔ wandie ne, ye de ngotu sɔ maen ne abo ngɔsɛkye ye pasaa. AWURADE noa dwirɛ ɛne.”

Yeremia 18:7

Sɛ ɔba ye kyɛ, mekã mefa maen bie anaa ahennie bie anwo kyɛ ngotutu ná mabubu ná masɛkye ye,

Yeremia 31:40

Na efuin ne nzoen bɔnza ne amukoraa, ɔne aseɛ amukoraa bɔ ɔkwaadwu asue Kidron, bɔ ɔkwaadwu Pɔngɔ pambim ne ndweasoɛ so wɔ eyia afiteleɛ so ne, ɔkɔyɛ krongron kɔma AWURADE. Ye bo ngotutu ko, yeɛ bengodwiri bengogua ase ko le.”

Yeremia 45:4

Kã kyire ye kyɛ, AWURADE nwa nyoo: Tie, bɔ masi ne, ngobubu ye, yeɛ bɔ malua ne, ngotutu ye bo. Na ngɔyɛ ɛhe wɔ aseɛ ye amukoraa so.

Yeremia 49:36

na ngɔfa mvrama nna ne ngofi nyameɛso ndweasoɛ nna ne aso ngɔwa Elam so, na ngɔbɔ bɛ ngɔsande ngoogua sɔ mvrama ne amukoraa so. Maen biala nne berɛ bɔ sɔ Elamfoɛ bɔ bafoa bɛ maa banwati ne, bɛ nu bie ngɔhɔ so ɔ.

Hesekiel 37:9

Yeɛ osele me kyɛ, “Hyɛ ngɔm frɛ nwomeɛ ne, Sona awa, hyɛ ngɔm, ná se nwomeɛ ne kyɛ, ‘AWURADE Nyameɛ nwa nyoo: Nwomeɛ ee, fi mvrama nna nemɔ anu bra oo, ná baale nwomeɛ gua mmenia hemɔ bɔ bahũhũ bɛ ne aso ma benya ngoa oo!”

Daniel 7:2

Daniel nwa nyoo, “Nwuni ye wɔ me nyekyire ne anu kɔngɔen ne, yieee, nyameɛso mvrama nna nemɔ betuli ɛpo piri ne aso bɛmaa ɔyɛle bagyabagya.

Daniel 7:6

Na ɛhe asi ne, nneane, na nwuni kaka foforɛ bɔ ɔte kyɛ aboa ɔ. Né ole anomaa ndaa nna wɔ ye si; né kaka ne ti te nna, na bɛmane ye tumi.

Daniel 7:8

Na ngu so menea mmɛen nemɔ nen, yieee, nwuni kyɛ mmɛen kaaba foforɛ bie wafifi mmɛen nemɔ b’afia ɔ. Na mmɛen bɔ beli moa nemɔ, bɛ nu nza bo tutuli maa sɔ mmɛen ne ootuale berɛ. Na nwuni kyɛ sɔ mmɛen ne ole anyeɛ bɔ ɔte kyɛ sona deɛ ɔ, ɔne noa bɔ ɔkekã edwirɛ mbiri mbiri ɔ.

Daniel 8:22

Na mmɛen bɔ so buli bɔ mmɛen nna befifili ye gya nu ne, okyire kyɛ ahennie nna kodwɔso maen ne anu, nakoso b’anwoserɛ ngodwu ye deɛ ne.

Daniel 8:8

Yiti abɔngye nyii ne momane ye nwo so paa, nakoso mmerɛ bɔ ye anwoserɛ ne yɛle piri paa nen, mmɛen piri ne buli, na mmɛen mbiri mbiri nna fifili ye boso bɔ bɛ nye kyire nyameɛso mvrama nna ne ɔ.

Sakaria 2:6

Huuu, huuu! Ɛ́mɔnwati béfi sorɔ dɔ aseɛ ne aso oo, AWURADE noa dwirɛ ɛne; ofikyɛ mabɔ ɛmɔ masande kyɛ anwuro mvrama nna ne, AWURADE noa dwirɛ ɛne.

Sakaria 6:5

Na abɔfo ne buale me kyɛ, “Ɛhemɔ ole nyameɛso sunzum nna ne, bɔ begyinagyina aseɛ amukoraa Mene ye nyunu berɛ beyie a befi berɛ bɛkɔ ne.

Mateo 12:25

Yesu nwuni b’adwene, yiti obuale bɛ kyɛ, “Ahennie biala bɔ ɔne ye nwo ko ne, ogu; yeɛ kuro anaa awuro biala bɔ ɔne ye nwo ko ne, ɔbɔ.

Luka 12:20

Nakoso Nyameɛ sele ye kyɛ, ‘Kwaseambane! Kɔngɔen ye ala ngole wɔ kra ngofi wɔ sa nu; na nningyein bɔ apena agua berɛ ne, nwa yeɛ bɛkɔyɛ ye deɛ ɔ?’

Nyekyire 7:1

Na ɛhemɔ asi ne, nwuni abɔfo nna kyɛ begyigyi aseɛ ndweasoɛ nna ne aso, bɔ né basi aseɛ so mvrama nna nemɔ ate, kyɛbɔ ɔkɔyɛ bɔ mvrama biala ngotu ngɔfa aseɛ anaa ɛpo anaa bakaa biala so ɔ.