Daniel 1:4 - AHYERƐLƐ KRONGRON

⁴ mmerandeɛ bɔ bellili nnɛen ɔ, anwonyemenefoɛ bɔ bɛse nworɛ, bɔ nimdeɛ ali bɛ ti, bɔ bɛkɔhora bekosua nwomaa, bɔ bɛkɔhora bɛkɔyɔ ɛsolɛ adwuma wɔ Nana ahemvie ɔ, ná ohyirehyire bɛ Kaldeafoɛ dwudwolɛ ne ye hyerɛlɛ.

Daniel 1:4 Iomraidhean Croise

Gyenesise 41:46

Yosef hyɛle ye adwuma abo wɔ Misraim hene Faro ahemvie ne, né wali afoɛ aburasa. Na Yosef fili Faro awuro berɛ ɔɔpasale Misraim maen ne anu mukoraa.

2 Samuel 14:25

Yisrael amukoraa, né ebiala nne berɛ bɔ bɛkamvo ye anwonyemene te kyɛ Absalom ɔ. Fite ye gya bo bɔ ɔkwaadwu ye ti so, ye nekaa biala nne berɛ bɔ ɛto ye nwo a ɔyɛ yé ɔ.

Anyandera 22:29

Aso anwu sona bɔ ɔyɛ ye adwuma ferengyemm ɔ? Ahemvo mɔ yeɛ okonya atee kɔso bɛ ɔ, ɔngɔso kwahweabaa mɔ.

Nworɛ Dwirɛhanɛniɛ 7:19

Nworɛ ma nworɛniɛ nya tumi tra mbanyi buru bɔ bɛnea kuro so ɔ.

Yesaya 36:11

Yeɛ Eliakim, Sebena ne Yoa besele safohene ne kyɛ, “Wɔ ngoaa, yɛsrɛ wɔ, kã edwirɛ ne kyire yɛ wɔ Aramaeke dwudwolɛ nu, ofikyɛ yɛte Aramaeke. Nnɛdwudwo kyire yɛ wɔ Yuda dwudwolɛ nu, ofikyɛ mmenia bɔ bɛwɔ fasue ne aso ne, bɛkɔte bɔ ɛkã ne.”

Yeremia 5:15

Ao Yisrael awuro ama, ɛ́mɔtie, méma maen bie bɔ ofi dedeede ɔ ɔfa koɛ ɔbateta ɛmɔ, AWURADE noa dwirɛ ɛne. Ɔte maen bɔ ye nwo yɛ se ɔ, ɔte daa tete maen, maen bɔ ɛnde ye dwudwolɛ, bɔ ɛnde bɔ ɔkã ne abo ɔ.

Daniel 2:10

Yeɛ Kaldeafoɛ nemɔ buale Nana kyɛ, “Ebiala nne aseɛ ye aso bɔ ɔkɔhora konya Nana dwirɛ ne anwo adwene ɔ; ofikyɛ edwirɛ sɔaa de, ɛhene, anaa meneɛ, anaa maenbulɛniɛ biala nne berɛ bɔ wafa wato ngonyaayelɛniɛ, anaa sona bɔ ɔnea nzramaa nu ɔkã nu dwirɛ, anaa Kaldeaniɛ biala nyunu le kyɛ ohyire ye bo ɔ.

Daniel 2:2

Na Nana Nebukadenesa hyɛle kyɛ bɛɛfa ngonyaayelɛfoɛ, bɛ bɔ bɛnea nzramaa nu bɛkã nu dwirɛ, musueyelɛfoɛ ne Kaldeafoɛ ma bɛbra beehyire ye laleɛ nemɔ abo. Yiti bɛwale beegyinane Nana nyunu.

Daniel 3:8

Na sɔ mmerɛ ne, Kaldeafoɛ biemɔ bɛɛbɔle Yudafoɛ mɔ kwaadu yeayea.

Daniel 4:7

Yeɛ ngonyaayelɛfoɛ, bɛ bɔ bɛnea nzramaa nu bɛkã nu dwirɛ, Kaldeafoɛ ne ahɔmeɛ bɛwale. Ngane laleɛ ne ngyirele bɛ, nakoso bangora bangyire me ye bo.

Daniel 5:11

Biaa bie wɔ w’ahennie ye anu bɔ nyameɛ krongron mɔ bɛ sunzum wɔ ye nu ɔ. Wɔ baba aberɛ so, benwuni kanea ne nimdeɛ ne nworɛ bɔ ɔte kyɛ nyameɛ nemɔ bɛ nworɛ deɛ ne bie ɔ wɔ ye nu, na wɔ baba Nana Nebukadenesa bɔle ye panyi wɔ ngonyaayelɛfoɛ, bɛ bɔ bɛnea nzramaa nu bɛkã nu dwirɛ, Kaldeafoɛ ne benewaafoɛ nemɔ bɛ so,

Daniel 5:7

Na ɛhene ne teane nu sele kyɛ bɛɛfa bɛ bɔ bɛnea nzramaa nu bɛkã nu dwirɛ, Kaldeafoɛ ne benewaafoɛ bɛbra. Yeɛ ɛhene ne sele Babilɔn nworɛfoɛ nemɔ kyɛ, “Ebiala bɔ ɔkɔkenga sɔ ahyerɛlɛ he, ná okohyire me ye bo nen, ngɔfa kende ngɔhera ye, yeɛ ngɔfa sikaa kɔkorɛ atweaban ngɔto ye kɔme anu, na ɔkɔyɛ ɛhene bɔ ye tumi tɔ so nza ɔ wɔ ahennie ye anu ɔ.”

Daniel 9:1

Ahasuro awa Dario bɔ ye si fi Medese, bɔ olili Kaldeafoɛ maen ne aso hene ne, ye ahennie afoɛ bɔ oli moa ne,

Sakaria 2:4

na osele ye kyɛ, “Tu amirika kɔhã kyire aberandeɛ he kyɛ, ‘Yerusalem kɔyɛ kyɛ nguraa nguraa bɔ fasue nne bɛ nwo ɔ, ɔnate nu mmenia somaa ne nu nyɛmmoa somaa ti.

Asomafoɛ 7:20

Sɔ mmerɛ ne yeɛ bɛwole Mose ɔ. na né ye nwo yɛ nyeme, na Nyameɛ hurole ye dwirɛ. Na bɛneane ye bosome nza wɔ ye baba awuro.

Asomafoɛ 7:22

Bɛfale Misraim nworɛ amukoraa yeɛ bɛtetele Mose ɔ, na onyane nimdeɛ wɔ ye dwudwolɛ ne ye brabɔlɛ nu.

Ɛfesofoɛ 5:27

kyɛbɔ okosiesie asɔre ne animnyam nu kɔma ye nwo, bɔ ngekalewa anaa ɛpombonɛ, anaa nikyee fiɛ biala nne ye nwo, na mmom wayɛ krongron bɔ mvomsoɛ nne ye nwo ɔ.

Maenbulɛfoɛ 8:18

Yeɛ obisale Seba ne Samuna kyɛ, “Mmienzua bɔ ɛmɔhuhuni bɛ wɔ Tabɔ ne, bɛ sue te sɛɛ?” Bebuale kyɛ, “Bɛ nu biala te kyɛ wɔ ala; besoma mmenia bɔ bɛ se te ɛhene ɔ.”