Awuye 2:9 - AHYERƐLƐ KRONGRON

⁹ Ye pambim nemɔ bamimi bahɔ ase, wasɛkye mmuralɛ bɔ ɔbrambram ye si nemɔ, na wabubu nu; ye hene ne ye mbanyi mɔ baali maen maensofoɛ mɔ nu. Mmeraa ne, ɔnne berɛ ko. Ye ngɔmhyɛlɛfoɛ koso, bennya nyekyire bemvi AWURADE berɛ.

Awuye 2:9 Iomraidhean Croise

2 Ahemvo 25:7

Behuhuni Sedekia mma mmienzua bɔ ye bɔbɔ ye nye tua ɔ, na betutuli Sedekia nye. Beguale ye ngɔnzɔngɔnzɔ bɛfale ye bɛhɔle Babilɔn.

2 Aberɛso Dwirɛ 15:3

Mmerɛ tendenn bie bɔ wapɛ nu ɔ, né Yisrael ɔnze nahorɛniɛ Nyameɛ ne. Né belle ɔsɔfo bɔ okyirekyire bɛ ɔ, yeɛ belle mmeraa biala.

Nehemia 1:3

Na bɛbɔle me amaneɛ kyɛ, “Mmenia bɔ bangye bɛ nnure bangɔ bie, ná bɛwɔ maen ne anu ne, amaneɛ ne animguaseɛ kandinga paa ato bɛ. Pɔfoɛ nemɔ babubu Yerusalem fasue ne bagua, yeɛ ye pambim nemɔ koso bato nu see bayera bɛ.”

Edwein 74:9

Yɛnnwu yɛ frangaa nemɔ; ngɔmhyɛlɛniɛ biala nne berɛ ko; na yɛ nu biala nze kyẽa bɔ ɛhe bo kɔpɛ ɔ.

Yesaya 24:12

Kuro ne akakyi kurofoen, babubu ye pambim nemɔ bagua gyirigorɔɔ.

Yeremia 14:14

Na AWURADE sele me kyɛ, “Ngɔmhyɛlɛfoɛ nemɔ bɛfa me dumaa bɛhyɛ ngɔndorɔ. Nnzomane bɛ, mmmane bɛ ahyɛdeɛ biala, yeɛ nngane edwirɛ biala nngyirele bɛ. Ngondombo nyekyire, ngonyaayelɛ, edwirɛ mbaen mbaen ne bɛ bɔbɔ bɛ ti anu dwirɛ yeɛ bɛhyɛ ye nwo ngɔm bekyire ɛmɔ ɔ.

Yeremia 23:16

Bɔ Asafo AWURADE kã ɛhe: Ngɔmhyɛlɛfoɛ bɔ bɛhyɛ ngɔm bekyire ɛmɔ ne, nnɛma ɛmɔtie bɛ, na bɛlakalaka ɛmɔ. Bɛbɔ bɛ bɔbɔ bɛ ti anu bɛkã nyekyire bɔ nna AWURADE noa dwirɛ ahɔ ɔ.

Yeremia 39:2

Sedekia ahennie afoɛ bɔ ɔtɔ so buru ne ko ne, bosome nna ne anu, ye ɛlɛhona ne aso, bɛbɔle kuro berɛ fasue ne anu tokuro.

Yeremia 39:8

Kaldeafoɛ nemɔ fale see bɛyerale ahemvie ne, ɔne amanvoɛ awuro mɔ, na bedwirili Yerusalem fasue ne beguale ase.

Yeremia 51:30

Babilɔn koɛhonɛfoɛ bayakyi koɛhonɛ, baafeafea b’anwoserɛ afealeɛ mɔ nu. B’anwoserɛ ayie, bakakyi mmrasua; mmenia ato ye atenaleɛ mɔ nu see, mmuralɛ bɔ ɔbeabea ye pambim mɔ asi ne, babubu nu.

Yeremia 52:14

Kaldeafoɛ koɛhonɛfoɛ amukoraa bɔ né bɛboka awɛmvoɛ nemɔ aso safohene ne aso ne, bebubuli Yerusalem nwo fasue ne amukoraa bɛbra beyiale.

Awuye 1:3

Amaneɛnwunɛ ne nhyɛsoɛ kandinga nu yeɛ bahye Yuda nnure bahɔ ɔ. Waatena amaen maen mɔ nu, na onnya nekaa bɔ ɔkɔtena kole ye nwome ɔ, bɛ bɔ bɛfoa ye ne amukoraa baato ye, bahã ye bapua wɔ atee kyenɔnn bie aso.

Awuye 4:15

Mmenia teateane nu sisele bɛ mmango kyɛ, “Ɛ́mɔfi wa bɛhɔ, na ye nwo nde, Ɛ́mɔfi wa bɛhɔ, ɛ́mɔfi wa bɛhɔ, nnɛmɔma ɛmɔ nwo kã bɛ!” Yiti bɛnwatili bɛbɔ bɛsandene, na mmenia kekane ye wɔ Amaenmaensofoɛ nemɔ anu kyɛ, “Yɛ ne bɛ ngɔtena wa ko.”

Awuye 4:20

Yɛ ngoa nwomeɛ, bɔ yeɛ ole bɔ AWURADE apopa ye ngoo ne, bɛhyele ye wɔ bɛ kumaa nemɔ anu. Ye yeɛ yɛhã yɛfale ye nwo kyɛ, “Ye fɔnwoo ne abo, yeɛ yɛkɔtena wɔ Amaenmaensofoɛ nemɔ anu ɔ.”

Hesekiel 12:13

Ngɔtrɛtrɛ m’asawu nu ngogua ye so, na me ngaen kɔhye ye, na ngɔfa ye ngɔhɔ Babilɔn bɔ ɔwɔ Kaldeafoɛ b’aseɛ so ɔ. Nakoso ongonwu ye, na dɔ yeɛ okowu ɔ.

Hesekiel 17:20

Ngɔtrɛtrɛ m’asawu nu ngogua ye so, na me ngaen kɔhye ye, na ngɔfa ye ngɔhɔ Babilɔn. Ngɔɔhwe ye so wɔ dɔ, ɔnate me nwo lɔen bɔ wayɔ ne ati.

Hesekiel 7:26

Musue kɔwa kɔtoatoa so, yeɛ ngunga kɔwa kɔtoatoa so; bɛkɔpena nyekyire bekofi ngɔmhyɛlɛniɛ ne berɛ, mmeraa ne anwo nimdeɛ kɔbɔ ɔsɔfo, yeɛ foɛtulɛ kɔbɔ mbanyi mɔ.

Hosea 11:6

Ɔnate b’agyirɛ bɔ batu ne ati, ngrandɛ kohũhũ mmenia wɔ ye nguro nemɔ aso, na okobubu mmuralɛ bɔ ɔbrambram ye anoa nemɔ asi ne.

Hosea 3:4

Ofikyɛ Yisraelfoɛ kɔtena mmerɛ tendenn bɔ belle hene, bɔ belle dehyeɛ, bɔ bɛmmɔ afɔleɛ, bɔ belle amoen, bɔ belle asɔfo ataadeɛ ne abusua amoen ɔ,

Amose 1:5

Ngobubu buralɛ bɔ ɔbrambram Damasko pambim nemɔ asi ne, na bɛ bɔ bɛte Awen bɔnza ne anu ne, ngɔpɛ bɛ asue ngofi berɛ. Bɔ otira hɔtɔ ne, ngotu ye ngofi Bete Eden, na bɛkɔhye Siriafoɛ nnure bɛkɔhɔ Kire,” AWURADE noa dwirɛ ɛne.

Deuteronomi 28:36

“Wɔ, ɛne sona bɔ ɛkɔfa ye koli wɔ so hene ne, AWURADE kɔsesa ɛmɔ kɔhɔ maen bɔ ɛne wɔ nana mɔ bɛnze so ɔ so, na berɛ yeɛ ɛkɔso nyameɛ foforɛ biemɔ bɔ bafa mmakaa ne nyɔboɛ bayɔ ɔ.

Deuteronomi 28:63

Na kyɛbɔ AWURADE nye gyele kyɛ ɔkɔmaa okosi ɛmɔ yé, ná ɛmɔata pee nen, sɔ ala yeɛ ɔkɔyɛ AWURADE fɛ kyɛ okohũhũ ɛmɔ, ná wama ɛmɔ boso anua ɔ. Na okotu ɛmɔ kofi aseɛ bɔ ɛkwaafa tena so ne aso.

1 Samuel 28:6

Sɔɔlo bisale AWURADE, nakoso laleɛ nu oo, Yurim so oo, anaa ngɔmhyɛlɛfoɛ so oo, AWURADE andɛ ye so.