Asomafoɛ 4:32 - AHYERƐLƐ KRONGRON

³² Agyidifoɛ fekue ne mane b’adwene yɛle ko. Ebiala le tole nu kyɛ ye nikyee biala bɔ ole ye ne ɔtte ye ngome ye deɛ, na mmom ɔte ebiala bɔ ɔwɔ fekue ne anu deɛ.

Asomafoɛ 4:32 Iomraidhean Croise

2 Aberɛso Dwirɛ 30:12

Yeɛ Nyameɛ tumi kanyane Yudafoɛ maa b’adwene yɛle ko kyɛ bɛkɔyɔ bɔ Nana Hesekia ne ye mbanyi bagyina AWURADE dwirɛ so bahyɛ ne.

Yeremia 32:39

Ngɔma bɛ ahone ko ne atee ko, amaa ɔnate so basuro me afebɔɔ, ɔnate bɛ bɔbɔ bɛ yeeyɛlɛ, ɔne kyẽa bie bɛ mma mɔ yeeyɛlɛ ti.

Yohane 17:11

Afei de, nne wiase ko, nakoso ɛhemɔ de bɛwɔ wiase wa; na me de, méba wɔ berɛ. Baba Krongron, bɛ bɔ afa bɛ ama me ne, fa bɛ sie wɔ wɔ dumaa nu, amaa ɔnate so bayɛ ko, kyɛbɔ yɛte ko ne.

Asomafoɛ 1:14

Bɛ mukoraa bɛmane b’adwene yɛle ko betuli bɛ nwo besiele berɛ bɛbɔle mbaeɛ, bɛne mmrasua nemɔ ne Yesu maame Maria ne Yesu aliɛmaa mɔ.

Asomafoɛ 2:1

Pɛntekɔso kyẽa ne dwuli ne, né agyidifoɛ nemɔ amukoraa baboa bɛ noa neka horɛ.

Asomafoɛ 5:12

Na nzɛngyerɛnneɛ ne anwanwadeɛ pee fale asomafoɛ nemɔ so lale ali wɔ maen ne anu. Né bɛ mukoraa bayɛ adwene ko bayia nu wɔ Solomon Abrannaa so.

Romanfoɛ 12:5

sɔ ala yeɛ yɛ koso bɔ yɛsone ne, yɛte nipadua komapɛ wɔ Kristo nu ɔ. Ebiala te sonongo de, nakoso yɛ mukoraa yatoatoa nu yayɛ nipadua ko.

1 Korintofoɛ 1:10

Nniɛma mɔ, mefa y’Awurade Yesu Kristo dumaa mesrɛ ɛmɔ kyɛ ɛmɔ amukoraa ɛ́mɔyɛ ko ná mbakyembakyemuɛ amma ɛmɔ nu; na ɛ́mɔyɛ ko wɔ adwene ko ne porɛ bɔlɛ ko nu.

2 Korintofoɛ 13:11

Afei aliɛmaa mɔ, mekra ɛmɔ oo! Ɛ́mɔma ɛmɔ nwo te, ɛ́mɔma ɛmɔ wora kyekye, ɛmɔnya adwene ko, ɛmɔtena asomdwee nu, na ɔdɔ ne asomdwee Nyameɛ ɔne ɛmɔ kɔtena.

Filipifoɛ 1:27

Nzaade ohia kyɛ ɛmɔma ɛmɔ brabɔlɛ fata Kristo nzɛmba ne, amaa sɛ mebapasa ɛmɔ nwo oo, sɛ mamma oo, mate ɛmɔ nga kyɛ ɛmɔagyina pindinn wɔ sunzum ko nu, bɔ ɛmɔayɛ adwene ko bɛpere bɛma nzɛmba ne nwo gyidie,

1 Petro 3:8

Bɔ ɔpɛ ye bo ɔ, ɛmɔ amukoraa ɛ́mɔnya adwene ko, ɛ́mɔnwunwu ɛmɔ nwo anwumvoin, ɛmɔhurohuro ɛmɔ nwo dwirɛ kyɛ aliɛmaa mɔ, ɛ́mɔnya tema bɛ́ma ɛmɔ nwo, na ɛ́mɔdwene anwobrɛaseɛ adwene.

1 Petro 4:11

Sɛ ebie dwudwo a, maa ɔhã ye kyɛ Nyameɛ noa dwirɛ ɔ; sɛ ebie ɔyɔ ɛsolɛ adwuma a, maa ɔfa anwoserɛ bɔ Nyameɛ afa ama ye ne ɔso; amaa ɔnate so bafa Yesu Kristo so bahyɛ Nyameɛ animnyam wɔ nningyein amukoraa nu. Ye yeɛ animnyam ne tumi te ye deɛ daa daa ɔ. Amen.