Asomafoɛ 2:2 - AHYERƐLƐ KRONGRON

² Na mvum nu, dede bie bɔ ɔte kyɛ mvrama bɔ ye noa yɛ hye ɔ ofili nyameɛso wale, na ooyili awuro bɔ né bɛwɔ nu ne anu tɛkyɛ.

Asomafoɛ 2:2 Iomraidhean Croise

1 Ahemvo 19:11

Afei osele Elia kyɛ, “Kɔ bokaa ne aso kogyina AWURADE nyunu, ofikyɛ AWURADE baapɛ nu.” Afei mvrama kandinga bie tuli. Né mvrama ne noa yɛ se paa, yiti odwudwale mmokaa ne nyɔbotaen mɔ nu wɔ AWURADE nyunu, nakoso né AWURADE ɔnne mvrama ne anu. Mvrama ne asi ne, aseɛ wosole, nakoso né AWURADE ɔnne aseɛwosolɛ ne anu.

Edwein 18:10

Ɔtenane kɛrubo so tuli, na ɔnate mvrama ye ndaa so wale ndɛndɛ.

Edwein Nu Dwein 4:16

O, sorɔ dɔ mvrama, dwɔso, O, ngwaen dɔ mvrama, bra e! Baatu fa me turo ye anu ma ye fona ne ɔto pete. Me kurofoɛ ne, mepena kyɛ ɔba ye turo ne anu ɔbadi nu mmakaammaa paapaa ne.

Yesaya 65:24

Anzana bɛbaasu bɛfrɛ ne po, né mama mmuayɛɛ, na begu so bedwudwo ne po, né matie.

Malaki 3:1

“Tie, mebaasoma me bɔfoɛ maa odi me nyunu osiesie atee nu. Na AWURADE bɔ ɛmɔpena ye ne, bɔ ye ole apam bɔfoɛ bɔ ɔla ɛmɔ ahone nwo ne, ɔkɔhɔ ye asɔneyɛɛ sua nu mvum nu. Tie, ɔ́ba, Asafo AWURADE noa dwirɛ ɛne.

Luka 2:13

Na berɛ ne ala, nyameɛso asafo kure pembepembe bɛɛbokale abɔfo ne so bɛyele Nyameɛ ayɛ kyɛ,

Yohane 3:8

Mvrama bɔ kɔ nekaa bɔ okuro ɔ, na ɛte ye nga; nakoso ɛnze nekaa bɔ ofi ba ɔ, anaa nekaa bɔ ɔkɔ ɔ. Sɔ ala yeɛ ebiala bɔ bawo ye Sunzum nu ne ɔte ɔ.”

Asomafoɛ 2:3

Na nikyee bie bɔ ɔte kyɛ temverema bɔ nu apakyepakye, bɔ ɔte kyɛ see bɔ ogye ɔ, ɔyele ye nwo ali hyirele bɛ, na nu hyehyɛle oogyinagyinane bɛ ti afia ngoko ngoko.

Asomafoɛ 2:6

Na bɛtele sɔ dwudwolɛ woo nen, mmenia pee wale beeyiale, na ɔyɛle bɛ nwanwa paa; ofikyɛ bɛ nu biala tele kyɛ agyidifoɛ ne dwudwo wɔ ye bɔbɔ bɔ ótie ne kuro dwudwolɛ nu.

Asomafoɛ 4:31

Beyiele mbaeɛ ne bɔ nen, nekaa bɔ beyiale ne wosole. Sunzum Krongron yili bɛ tɛkyɛ, na bɛfale ahoneserɛ bɛbɔle Nyameɛ dwirɛ ne dawure.

1 Petro 1:12

Na bɛlale ye ali behyirele bɛ kyɛ, nna bɛ bɔbɔ bɛ nwo, na mmom yɛ yeɛ né bɛyɔ ɛsolɛ adwuma ne bɛma yɛ ɔ, wɔ edwirɛ mɔ bɔ kekesaala ye yɛbɔ ye dawure yɛkyire ɛmɔ ne anu, ɔne bɛ bɔ bɛnate Sunzum Krongron bɔ basoma ye fi nyameɛso so bɛɛhane nzɛmba ne behyirele ɛmɔ ne. Na sɔ dwirɛ nemɔ yeɛ abɔfo mɔ po bekuro kyɛ benwu nu ɔ.