Asomafoɛ 19:9 - AHYERƐLƐ KRONGRON

⁹ Nakoso ebiemɔ yɛle asoserɛ, banne dwirɛ ne banni, na bɛhane musue dwirɛ betiale Atee ne wɔ mmenia wora ne nyunu. Yiti ɔyakyili bɛ berɛ, ɔfale agyidifoɛ ne bokale ye nwo so; na daa biala ɔyɛle ngyerɛkyerɛ wɔ ebie bɔ bɛfrɛ ye Tirano sukuu sua nu.

Asomafoɛ 19:9 Iomraidhean Croise

2 Ahemvo 17:14

Nakoso bandie, na mmom bɛyɛle asoserɛ kyɛbɔ bɛ nana mɔ bɔ banne AWURADE bɛ Nyameɛ banni ne, bɛyɛle ne ala.

2 Aberɛso Dwirɛ 30:8

Nnɛma ɛmɔyɛ asoserɛ kyɛbɔ ɛmɔ nana mɔ yɛle ne, na mmom ɛ́mɔbrɛ ɛmɔ nwo ase bɛ́ma AWURADE. Ɛmɔbra AWURADE ɛmɔ Nyameɛ nekaa krongron bɔ wate ye nwo afebɔɔ ne anu, ná ɛ́mɔso ye, amaa ɔnate so wayakyi ye yaa piri bɔ wafɛ ye wɔ ɛmɔ so ne.

2 Aberɛso Dwirɛ 36:16

Nakoso bɛhɔle so bɛgorole Nyameɛ ɛbɔfoɛ nemɔ anwo, bamva ye dwirɛ banyɛ huu, na bɛserele ye ngɔmhyɛlɛfoɛ nemɔ alaa kɔpem kyɛ AWURADE ɛyaa piri bɔ wafɛ ye wɔ ye maen so ne, ɔhɔle anwuro maa né bɛyɔ ye nwo hwee a ɔnyɛ yé ɔ.

Nehemia 9:29

Na ɛbɔle bɛ kɔkɔ bɔ ɔnate so bekosa bekooli wɔ mmeraa ne aso ɔ. Nakoso bɛyɛle anwomasoɛ, yeɛ banni wɔ mmeraa dwirɛ so, na mmom wɔ nhyehyɛleɛ bɔ sona di so a onya ngoa ne, bɛyɔle bɔne bebuli so. Bɛpemone b’awaen beguale wɔ so, bɛsoale bɛ kɔm so kyeinn, na bandie wɔ dwirɛ.

Edwein 95:8

Nnɛma ɛmɔyɛ asoserɛ, kyɛbɔ ɛmɔyɛle wɔ Meriba ne, kyɛbɔ ɛmɔyɛle ye sɔ kyẽa ne wɔ Masa wɔ ɛserɛ ne aso ne,

Anyandera 8:34

Sona bɔ otie me, bɔ ɔwɛne daa biala wɔ me pambim nu, ná ɔnwondɛ wɔ m’anoa nu ne, onya saleɛ.

Yesaya 8:14

Ɔkɔyɛ nekaa krongron, sundidua nyɔboɛ, ɔne nyɔbotaen bɔ ɔmaa besoti ɔ kɔma Yisrael abusua nyɔ ne, na ɔkɔyɛ atodum ne ngaen kɔma Yerusalemfoɛ.

Yeremia 19:15

“Bɔ Asafo AWURADE Yisrael Nyameɛ kã ɛhe: Tie, musue bɔ ngane kyɛ ngɔprapra ngogua kuro ye ne ye nwo nguro amukoraa so ne, ngɔmaa ɔkɔwa bɛ so, ɔnate kyɛ basoa bɛ kɔme so kyeinn bɔ bandie me dwirɛ ɔ.”

Yeremia 7:26

nakoso bandie me dwirɛ, yeɛ bandɛ me so, na mmom bɛsoale bɛ kɔme so kyeinn. Bɛyɔle bɔ ɔtte mayee bɛtrale bɛ nana mɔ.

Mateo 15:14

Nnɛma ɛmɔtɛ bɛ so! Bɛte anyesiniwaafoɛ bɔ bekyire anyesiniwaafoɛ atee ɔ. Na sɛ anyesiniwaaniɛ kyire anyesiniwaaniɛ atee a, bɛ munyɔ bɛkɔtɔ kumaa nu.”

Mateo 16:4

Ɛnɛmmafoɛ bɔnefoɛ ne agyaasɛkyelɛfoɛ bɛpena sɛngyerɛnneɛ, nakoso bɛngɔma bɛ sɛngyerɛnneɛ biala, sana Yona sɛngyerɛnneɛ ne ala.” Na Yesu yakyili bɛ berɛ hɔle.

Mateo 26:55

Na sɔ mmerɛ ne anu ala, Yesu sele ɛlɔen ne kyɛ, “Yiti ngrandɛ ne mmopura yeɛ ɛmɔfa bɛbakye me ɔ, kyɛ awerɔm awueniɛ bɔ ɛmɔba ye so ɔ? Ndenane asɔneyɛɛ sua ne anu nyɛle ngyerɛkyerɛ daa biala, nakoso ɛmɔangye me.

Yohane 12:40

“Wasi bɛ nye, na wama b’adwene ala, ná bamva bɛ nye bannwu nikye, ná bamva b’adwene bande ye bo, na banza bamma ma manza bɛ anwonyerɛ.”

Asomafoɛ 11:26

Na onwuni Sɔɔlo nen, ɔfale ye wale Antiokia. Bɛ munyɔ bɛ ne Antiokia asɔremma ne bɛtenane afoɛ ko mumua, na bɛyɛle ngyerɛkyerɛ behyirele mmenia pee. Na Antiokia berɛ yeɛ belili moa bɛfrɛle agyidifoɛ nemɔ Akristofoɛ ɔ.

Asomafoɛ 14:4

Nakoso kuro berɛ ama nu hyɛle nyɔ; bue ko gyi Yudafoɛ nemɔ si, yeɛ bue ko koso gyi asomafoɛ nemɔ si.

Asomafoɛ 17:4

Bɛ nu biemɔ lele edwirɛ ne lili, na bɛfale bɛ nwo bɛbɔle Pɔɔlo ne Silase; sɔ ala yeɛ Helafoɛ nyamesurofoɛ pee ne mmrasua atitirefoɛ pee koso yɔle ɔ.

Asomafoɛ 19:23

Sɔ mmerɛ ne anu, Atee ne ati basabasayɔlɛ wale Ɛfeso.

Asomafoɛ 19:30

Ahaa Pɔɔlo pena kyɛ ɔkɔ ɛlɔen ne anu berɛ bie, nakoso agyidifoɛ nemɔ amma ye ate.

Asomafoɛ 20:31

Yiti ɛmɔla ɛmɔ nwo so, na ɛ́mɔkaye kyɛ mvale me nye moen eyia ne kɔngɔen nduli ɛmɔ nu biala foɛ sɔ alaa afoɛ nza.

Asomafoɛ 22:4

Ndanene bɛ bɔ beli Atee he si nye maa behuni bɛ. Ngyekyele mmienzua ne mmrasua maa bɛfale bɛ beguale kuku nu,

Asomafoɛ 24:21

sana nikyee komapɛ bɔ ngyinane bɛ nyunu berɛ ndeane nu ngane ɔ, kyɛ, ‘Awufoɛ ewutingyelɛ nwo yeɛ ɛmɔbua me ndɛen ɛnɛ ye.’ ”

Asomafoɛ 28:22

Nakoso yɛpena kyɛ ekyire yɛ w’adwene, ɔnate kyɛ yɛse kyɛ nekaa biala mmenia dwudwo tia sɔ som he.”

Asomafoɛ 7:51

Na Setefano toale so hane kyɛ, “Yisraelfoɛ asoserɛfoɛ, ɛmɔapini b’ahone, yeɛ afei ɛmɔaprapra bɛ so asi wɔ Nyameɛ dwirɛ ne anwo. Ɛmɔte kyɛ ɛmɔ nana mɔ ala, bɔ dáa ɛmɔsi Sunzum Krongron ne ate ɔ!

Asomafoɛ 9:2

ɔɔsrɛle ye berɛ tumi krataa, bɔ ɔkɔfa kɔhɔ Damasko nyianu sua nemɔ nu, kyɛbɔ ɔkɔyɛ na onwu ebiala bɔ ɔnate Awurade nwo gyidie atee so a, bienzua oo, brasua oo, wahora wahye ye, ná wafa ye wawa Yerusalem.

Romanfoɛ 11:7

Afei de nzikyɛ bieku? Yisrael sa anga nikyee bɔ né ɔpena ne. Bɛ bɔ waneanea nu waye bɛ ne, bɛ sa hane ye; nakoso bɛ ngaa ne de, bɛyɛle asoserɛ,

Romanfoɛ 9:18

Na sɛ sɔ yeɛ ɔte de a, nzaade sona biala bɔ Nyameɛ kuro ye dwirɛ yeɛ onwu ye anwumvoin ɔ; yeɛ sona biala bɔ Nyameɛ kuro ne, yeɛ opini ye ahone ɔ.

1 Korintofoɛ 16:9

Atee piri bie bɔ ngɔfa so ngɔyɔ adwuma, bɔ ye nwo kɔwa mvasoɛ abukye ama me wɔ wa, nakoso me pɔfoɛ sone.

1 Timoteo 6:5

manzoenhwenɛ wɔ mmenia bɔ b’adwene awu ɔ nu, bɔ bɛne nahorɛ abɔ nzahoɛ, bɔ besusu kyɛ nyamesom paa ma sona nya ye nwo ɔ.

2 Timoteo 1:15

Ɛse kyɛ bɛ bɔ bɛwɔ Asia amukoraa bayakyi me nu bahɔ; Figɛlo ne Hɛmogen koso bɛboka so.

2 Timoteo 3:5

bɛkɔyɛ bɛ nwo kyɛ basɔ nyamesom paa ne anu, nakoso bɛpo tumi bɔ ɔwɔ nu ne. Twe wɔ nwo fi sɔ mmenia nemɔ nwo.

2 Timoteo 4:2

bɔ edwirɛ ne dawure, ná kɔ so yɔ, kyɛ mmerɛ paa nu oo, anaa mmerɛ tɛɛ nu oo. Maa mmenia benwu bɛ mvomsoɛ, twi bɛ nyunu, tu foɛ, wɔ ndoboaseɛ ne aboterɛ amukoraa nu.

Hebrifoɛ 3:13

Na mmom ɛmɔtutu bɛ nwo foɛ kyẽa biala bɔ bɛfrɛ ye “Ɛnɛ” ne, na bɔne annakalaka ɛmɔ nu biala amma wanyɛ asoserɛ.

2 Petro 2:12

Nakoso sɔ mmenia hemɔ, bɔ bɛte kyɛ ngaka bɔ adwene nne bɛ ti anu, bɔ bɛwole bɛ kyɛ bɛhye bɛ behũ bɛ ne, bɛkekã dwirɛ betia nikyee biala bɔ bɛnde ye bo ɔ, na bɛ bɔbɔ bɛ sɛkyelɛ nu yeɛ bekowuwu ɔ,

2 Petro 2:2

Na mmeni pee bekoli b’asanzabra ne asi, na ɔnate bɛ ti mmenia kɔkekã nahorɛ ne nwo dwirɛ tɛɛ.

Yuda 1:10

Nakoso mmenia hemɔ de, bɛkekã dwirɛ tɛɛ betia nikyee biala bɔ bɛnde ye bo ɔ; na nikyee bɔ befi bɛ sona sue nu bɛse, kyɛ ngaka bɔ adwene nne bɛ ti anu ne, ye ala yeɛ ogua bɛ nwo fiɛ ɔ.