Asomafoɛ 15:9 - AHYERƐLƐ KRONGRON

⁹ Wangyire kyɛ nzonzoleɛ biala wɔ yɛ ne bɛ nu, na mmom ɔnate (bɛ) gyidie so fale bɛ bɔne hyɛle bɛ.

Asomafoɛ 15:9 Iomraidhean Croise

Edwein 51:10

Ao Nyameɛ, bɔ ahone bɔ nu te ɔ wura me nu, ná fa sunzum bɔ ɔtengyɛ ɔ wura me nu.

Hesekiel 47:22

Odi kyɛ ɛmɔfa serewagualɛ so bɛkyɛ maa ɔyɛ ɛmɔ agyapadeɛ, ɛmɔ ne amanvrafoɛ bɔ baatena ɛmɔ nu ná bawowo mmaa bagua ɛmɔ nu ne. Odi kyɛ ɛmɔbu bɛ kyɛ Yisrael mmaa bɔ bɛwole bɛ maen ne anu ne ala. Bɛ ne ɛmɔ yeɛ bekonya agyapadeɛ wɔ Yisrael mmusua kure nu ɔ.

Asomafoɛ 10:15

Na ɔtele dwudwolɛ bieku kyɛ, “Nikyee biala bɔ Nyameɛ ate ye nwo kyɛ beli ne, nnɛbu ye kyɛ ɔte akyiwadeɛ.”

Asomafoɛ 10:28

Na osele bɛ kyɛ, “Ɛmɔ bɔbɔ ɛmɔse kyɛ otia mmeraa kyɛ Yudaniɛ ɔkɔfa ye nwo kɔbɔ Amaenmaensoniɛ anaakyɛ ɔkɔhɔ ye awuro kɔɔsra ye ɔ. Nakoso Nyameɛ aye ahyire me kyɛ onni kyɛ mebu sona biala kyɛ ɔbboka yɛ so, anaakyɛ ye nwo nde.

Asomafoɛ 10:34

Na Petro sele kyɛ, “Nahorɛ nu, manwu kyɛ Nyameɛ nyɛ nyeyemuɛ,

Asomafoɛ 11:12

Na Sunzum ne hã hyirele me kyɛ me ne bɛ yɛhɔ, na nnɛmaa meyɛ nyeyemuɛ. Sɔ aliɛmaa nzia hemɔ koso bɛbokale me so yeɛ yɛhɔle biaa n’awuro berɛ ɔ.

Asomafoɛ 14:1

Na ɔwale kyɛ Yikoniom koso, bɛ munyɔ bɛhɔle Yudafoɛ nyianu sua nu, na kyɛbɔ besi bedwudwole ne, ɔmane Yudafoɛ ne Helafoɛ pee bele belili.

Asomafoɛ 14:27

Beedwuli berɛ ne, bɛmane asɔre mma ne yiale, na bɛhane nikyee biala bɔ Nyameɛ afa bɛ so wayɔ ɔ behyirele bɛ, ɔne kyɛbɔ wasi wabukye gyidie anoa wama Amaenmaensofoɛ koso ɔ.

Romanfoɛ 3:22

Nyameɛ nate sona gyidie bɔ ɔwɔ Yesu Kristo nu so yeɛ ɔfa siesie ye ne kuro sona afia ɔ, ɔnate kyɛ Nyameɛ nyɛ nyeyemuɛ.

Romanfoɛ 3:9

Sɛ sɔ yeɛ ɔte hɔ a, né yɛ Yudafoɛ yɛte paa yɛtra Amaenmaensofoɛ anaa? Dabida! Ɔnate kyɛ yali moa yahyire kyɛ Yudafoɛ ne Amaenmaensofoɛ mukoraa wura bɔne tumi bo.

Romanfoɛ 9:24

Ofikyɛ wamvrɛ yɛ wamvi Yudafoɛ ngome nu, na mmom ɔfrɛle yɛ fili Amaenmaensofoɛ koso nu bie.

1 Korintofoɛ 1:2

Yɛfa yɛbrɛ Nyameɛ asɔre bɔ ɔwɔ Korinto, bɛ bɔ ɔnate Yesu Kristo ti bafrɛ bɛ maa baayɛ krongron; mekyire ɛmɔ bɔ bafrɛ ɛmɔ ne bɛ bɔ bɛwɔ nekaa biala maa ɛmɔayɛ anwoteefoɛ, na ɛmɔ ne yɛ bɔ nu bɔ Yesu Kristo dumaa kyɛ y’Awurade ɔ.

1 Korintofoɛ 7:18

Sɛ né ebie apɛ ye bienzua koraka yeɛ Nyameɛ frɛle ye a, nnɛmaa ɔha ye nwo kyɛ ɔkɔkakyi ye ɔ. Yeɛ sɛ né ebie ɔppɛle ye bienzua koraka yeɛ Nyameɛ frɛle ye a, nnɛmaa ɔha ye nwo kyɛ ɔkɔpɛ ɔ.

Galatiafoɛ 3:28

Yiti Yudaniɛ ne Helaniɛ oo, akoaa ne dehyeɛ oo, bienzua ne brasua oo, nzonzoleɛ biala nne bɛ nu ko; ofikyɛ ɛmɔ amukoraa bɛte ko wɔ Kristo Yesu nu.

Galatiafoɛ 5:6

Ofikyɛ sɛ yɛne Kristo Yesu yɛ ko de a, bienzuapɛlɛ oo, nna bienzuapɛlɛ oo, ye nwo nhia, na mmom gyidie bɔ ɔnate ɔdɔ so yɔ adwuma yeɛ ohia ɔ.

Ɛfesofoɛ 3:6

Na ɛhe ma Amaenmaensofoɛ koso bele kyɛfa wɔ nu, bɛwɔ nipadua komapɛ ne ala nu bie, na bɛnate nzɛmba ne aso banya kyɛfa wɔ ye bɔhyɛ ne anu wɔ Kristo Yesu nu.

Kolosefoɛ 3:11

Yiti Helaniɛ oo, Yudaniɛ oo; bienzuapɛlɛniɛ oo, bɛmbɛ-bɛ-bienzuafoɛ oo; pɔtɔniɛ oo, bɔ ye nye butu ase oo; akoaa oo, dehyeɛ oo, nzonzoleɛ biala nne b’afia, ofikyɛ Kristo wɔ berɛ ma bɛ mukoraa, na ɔte bɛ mukoraa bɛ nu.

1 Petro 1:22

Asoɛmmerɛlɛ bɔ ɛmɔayɛ bama nahorɛ ne ne ati, wamaa ɛmɔate ɛmɔ kra nwo, na ɛhe amaa ɛmɔahurohuro ɛmɔ nwo dwirɛ wɔ nahorɛ nu, yiti ɔsɛ kyɛ ɛmɔfi ɛmɔ ahone nu bekurokuro ɛmɔ nwo dwirɛ.