Asomafoɛ 15:20 - AHYERƐLƐ KRONGRON

²⁰ Na mmom odi kyɛ yɛkyerɛ krataa yɛkɔma bɛ, kyɛ, onni kyɛ bedi aleɛ biala bɔ bafa babɔ afɔleɛ bama bosoen, bɛhwe bɛ nwo befi adwamanbɔlɛ nwo; yeɛ afei onni kyɛ bedi kaka biala bɔ wawu ye mogya nu, anaakyɛ mogya.

Asomafoɛ 15:20 Iomraidhean Croise

Gyenesise 35:2

Yiti Yakob sele ye awuro ama ne bɛ bɔ bɛboka ye so amu kyɛ, “Ɛ́mɔgyi Amaenmaensofoɛ nyameɛ mɔ bɔ bɛwɔ ɛmɔ nwo ne begua, ɛ́mɔpete ɛmɔ nwo, na ɛ́mɔsesã ɛmɔ ndaadeɛ.

Gyenesise 9:4

Nakoso naen bɔ ye ngoa, bɔ ɔte ye mogya tɛ wɔ ye nu de, nnɛma ɛmɔdi.

Ɛksadɔso 20:23

Nnɛma ɛmɔfa ɛdwetɛ bɛyɛ nyameɛ foforɛ mɔ bɛboka me so, anaa sikaa kɔkorɛ bɛyɛ nyameɛ foforɛ mɔ bɛfa.

Hesekiel 33:25

Yiti se bɛ kyɛ, AWURADE Nyameɛ nwa nyoo: Ɛmɔdi naen bɔ ye mogya wɔ ye nu ɔ, ɛmɔsɔne ɛmɔ mmosoen nemɔ, yeɛ ɛmɔkã mogya begua; na ɔkɔyɛ sɛɛ né ɛmɔanya aseɛ ne bafa bayɛ ɛmɔ deɛ?

Hesekiel 4:14

Yeɛ nzele kyɛ, “Ao, AWURADE Nyameɛ, me kra nwo ogguale fiɛ le; ofi me ngwadaa nu bɔ ɔbaadwu ɛnɛ ɔ, nnnili kaka bɔ ye bɔbɔ wawu ɔ anaa bɔ kaka bie ahye ye ɔ le, yeɛ akyiwadeɛ naen biala ɔhhane me noa le.”

Daniel 1:8

Nakoso Daniel yɛle ye adwene kyɛ ongoli Nana aleɛ ngɔno ye nzaa ne, ná ɔngɔfa ngogua ye nwo fiɛ. Yiti ɔsrɛle sayɛɛ panyi ne kyɛ ɔma ye ate, amaa ɔnate so wangua ye nwo fiɛ.

Lewitikɔso 18:6

“Nnɛma ɛmɔ nu biala ne ye abusuaniɛ beyia nnaa. Me ole AWURADE.

Lewitikɔso 19:26

“Nnɛma ɛmɔdi naen bɔ ye mogya wɔ ye nu ɔ. Nnɛma ɛmɔkɔ abisa, yeɛ nnɛma ɛmɔyɛ bayie.

Lewitikɔso 3:17

Na ɛhe kɔyɛ ahyɛdeɛ afebɔɔ kɔma ɛmɔ wɔ ɛmɔ aworɛ ndoatoasoɛ amukoraati nu, wɔ nekaa biala bɔ ɛmɔkɔtena ɔ, kyɛ nnɛma ɛmɔdi ɛloe anaa mogya.”

Numeri 25:2

Moabo mmrasua nemɔ hwehwene Yisraelfoɛ hɔle Moabo mmosoen sɔnenɛ nu. Yisraelfoɛ lili mmosoen so aleɛ ne bie, na bɛkotole bɛ mmosoen nemɔ.

Asomafoɛ 15:29

Nnɛma ɛmɔdi aleɛ biala bɔ bafa babɔ afɔleɛ bama bosoen; nnɛma ɛmɔdi mogya; nnɛma ɛmɔdi kaka biala bɔ wawu ye mogya nu; yeɛ afei ɛmɔhwe bɛ nwo befi adwamanbɔlɛ nwo. Na sɛ ɛmɔtwe bɛ nwo befi ɛhemɔ nwo a, ɔte paa. Yɛbisa bɛ.”

Asomafoɛ 21:25

Nakoso Amaenmaensofoɛ bɔ bayɛ agyidifoɛ ne de, yahyerɛ krataa yaama bɛ, na yahyire bɛ y’adwene kyɛ nnɛma bedi bosoen so aleɛ biala, anaakyɛ mogya, anaa kaka biala bɔ wawu ye mogya nu, na afei bɛhwe bɛ nwo befi adwamanbɔlɛ nwo.”

1 Korintofoɛ 5:11

Na afei bɔ mekyerɛ mebrɛ ɛmɔ ole kyɛ, nnɛma ɛmɔ ne ebiala bɔ ɔfrɛ ye nwo aliɛmaa bɔ ɔbɔ adwaman, anaa ɔte anyeboroborolɛ, anaa ɔte bosoensolɛniɛ, anaa ɔte tuture, anaa akɔnomnzaniɛ anaa awueniɛ besã, nnɛma ɛmɔ ne ye to asaa bedidi po.

1 Korintofoɛ 6:13

“Bɛbɔle aleɛ bɛmane koɛ, yeɛ koɛ wora bɛbɔle ye bɛmane aleɛ.” Nakoso Nyameɛ kɔsɛkye bɛ munyɔ. Nipadua nne berɛ ma adwamanbɔlɛ, na mmom ɔwɔ berɛ ma Awurade, yeɛ Awurade koso wɔ berɛ ma nipadua.

1 Korintofoɛ 6:18

Ɛmɔyakyi adwamanbɔlɛ! Bɔne biala bɔ sona yɔ ne nga ye nipadua, nakoso sona bɔ ɔbɔ adwaman ne yɔ bɔne tia ye bɔbɔ ye nipadua.

1 Korintofoɛ 6:9

Ɛmɔnze kyɛ bɔnefoɛ ngɔhɔ Nyameɛ ahennie ne anu hɔ ɔ? Nnɛma ɛmɔlakalaka bɛ nwo: adwamanbɔlɛfoɛ, bosoensolɛfoɛ, agyaasɛkyelɛfoɛ, mmrasua bɔ bɛ ne mmrasua da, mmienzua bɔ bɛ ne mmienzua da,

1 Korintofoɛ 7:2

Nakoso adwamanbɔlɛ nwo nzɔhwɛ ti, ɔsɛ kyɛ bienzua biala nya ye bɔbɔ ɔye, na brasua biala nya ye bɔbɔ ohu.

1 Korintofoɛ 8:1

Afei, ɔfa bosoen so aleɛ nwo dwirɛ de, yɛse kyɛ yɛ mukoraa yɛle nimdeɛ. Nimdeɛ ma sona moma ye nwo so, nakoso ɔdɔ de ɔma ngɔsoɛ.

2 Korintofoɛ 12:21

Ebiaa meba bieku a, me Nyameɛ kɔbrɛ me ase wɔ ɛmɔ nyunu maa ngoli ɛmɔ nu pee nwo aworabɔlɛ wɔ mmenia somaa bɔ daa bayɔ bɔne, ná kekesaala ye bɛtɛyɔ ná banzakyera b’adwene wɔ brabɔlɛ fiɛ, adwamanbɔlɛ ne ahuhubra nwo ti.

Galatiafoɛ 5:19

Anwoɔnaen dwumadie bɔ odi da adi pefee. Bɛ ɛhe: agyaasɛkyelɛ, adwamanbɔlɛ, efiɛ, ahohwie,

Ɛfesofoɛ 5:3

Na adwamanbɔlɛ, bra fiɛ amukoraa anaa anyeboroborolɛ nwo dwirɛ po, ɔnzɛ kyɛ ofite ɛmɔ nu ɔ, kyɛbɔ ɔfata anwoteefoɛ ɔ.

Deuteronomi 12:16

Nakoso ye mogya ne ngome yeɛ nnɛma ɛmɔdi ɔ; hwie gua aseɛnwo kyɛ nzue.

Deuteronomi 14:21

“Nnɛma ɛmɔdi kaka fuin biala. Ɛkɔhora kɔfa kɔma ɛwɔfoɛ bɔ ɔwɔ wɔ kuro maa okoli, anaakyɛ ɛkɔhora kɔyɛ ye atɔen kɔma ɛwɔfoɛ; ofikyɛ ɛte maen krongron ma AWURADE wɔ Nyameɛ. “Nnɛfa abɔngye ba oni nyɔfonesue gua ye nwo to.

Deuteronomi 15:23

Ye mogya ne angome yeɛ nnɛdi ɔ; hwie gua aseɛnwo kyɛ nzue.

Kolosefoɛ 3:5

Yiti ɛ́mɔhu aseɛ so suban bɔ ɔwɔ ɛmɔ nu ne: adwamanbɔlɛ, brabɔlɛ fiɛ, ahohwibra, akɔnnɔ bɔne bɔ ɔhyɛ sona so, ɔne anyeboroborolɛ; ofikyɛ anyeboroborolɛ te bosoensolɛ.

1 Tɛsalonikafoɛ 4:3

Nyameɛ apɛdeɛ ɛhe: kyɛ ɛmɔ nwo kɔte, ná ɛmɔkɔhwe ɛmɔ nwo bekofi adwamanbɔlɛ nwo,

Hebrifoɛ 12:16

na ebiala anyɛ adwamanbɔlɛniɛ anaakyɛ bɔ nyamesuro nne ye nu kyɛ Yisɔ, bɔ ɔtɔnene ye bamuɛbaa dibea fa lele aleɛ talie komapɛ twe ne.

Hebrifoɛ 13:4

Odi kyɛ ebiala di agyaa ni, na nnɛma ebiala gua agyaa mba nwo fiɛ, ofikyɛ Nyameɛ kobua adwamanbɔlɛfoɛ ne agyaasɛkyelɛfoɛ ndɛen.

1 Petro 4:3

Yɛbɔle yɛ bra kyɛ Amaenmaensofoɛ wɔ y’asetena mmerɛ bɔ wapɛ nu ne anu, na yɛbɔle yɛ bra wɔ ahohwibra, akɔnnɔ, nzaabolɛ, bɔne nu anigye, asanzabra, yeɛ bosoensolɛ bɔ ɔte akyiwadeɛ ɔ nu.

Nyekyire 10:2

Né otira nwomaa kaaba bie bɔ babukye nu ɔ wɔ ye sa nu. Na otuli ye gya famaa siele ɛpo so, yeɛ otuli ye gya bɛen siele aseɛ so.

Nyekyire 10:8

Na komviɛ bɔ nde mvili nyameɛso ne odwudwo hyirele me bieku kyɛ, “Nwomaa kaaba bɔ babukye nu, bɔ ɔwɔ abɔfo bɔ ogyi ɛpo ne aseɛ so ye sa nu ne, kole.”

Nyekyire 2:14

Nakoso mebɔ wɔ kwaadu kãa, ofikyɛ ele mmenia biemɔ wɔ wɔ berɛ bɔ basɔ Balaam ngyerɛkyerɛ nu ɔ, ye bɔ ohyirele Balake kyɛ ɔto Yisraelfoɛ sundidua ma beli bosoen so aleɛ, ná bɛbɔ adwaman ɔ.

Nyekyire 2:20

Nakoso mebɔ wɔ kwaadu kãa, ofikyɛ ɛma braa Yesebɛl bɔ ɔfrɛ ye nwo ngɔmhyɛlɛniɛ ne ate, kyɛ ɔyɛ ngyerɛkyerɛ ná ɔlakalaka me ngoaa mɔ ma bɛbɔ adwaman ná beli bosoen so aleɛ.

Nyekyire 9:20

Nakoso adasa mmaa ngaa bɔ ɛhawo hemɔ wangukũ bɛ ne, banzakyera b’adwene bamvi bɛ sa noa nnwumaa nwo, banyakyi sunzummɔne mɔ sɔnenɛ, yeɛ banyakyi sikaa kɔkorɛ, ɛdwetɛ, kɔɔbere, nyɔboɛ ne bakaa amoen mɔ bɔ bɛngora bennwu nikye, anaa bɛnde dwirɛ, anaa bɛnnate ɔ sɔnenɛ;

1 Samuel 14:32

Yiti koɛhonɛfoɛ nemɔ te guale koɛ nu nzesadeɛ ne aso. Bɛhyele mmoaen, nandwie ne nandwie mmaa behuni bɛ wɔ aseɛnwo berɛ nekaa bɔ bɛhyele bɛ ne, na belili naen ne bɛfrale ye mogya.

1 Samuel 14:33

Na ebie ɔɔbɔle Sɔɔlo amaneɛ kyɛ, “Tie, koɛhonɛfoɛ nemɔ gu so bɛ́yɔ bɔne bétia AWURADE, ofikyɛ begu so bédi naen bɛfra ye mogya.” Na Sɔɔlo sele kyɛ, “Ɛmɔali edwirɛ tɛɛ! Ɛ́mɔmunu nyɔbotaen bɛ́brɛ me wa kekesaala ye!”