Anyandera 22:7 - AHYERƐLƐ KRONGRON

⁷ Sikafoɛ di ehiafoɛ so, yeɛ sona bɔ obisa bosea ne, ɔte bɔ ɔbɔ bosea n’akoaa.

Anyandera 22:7 Iomraidhean Croise

2 Ahemvo 4:1

Ngɔmhyɛlɛfoɛ fekue ne, bɛ nu ko aye oosuni hyirele Elisa kyɛ, “Me hu, bɔ ɔte wɔ somvoɛ ne, wawu. Ɛse kyɛ wɔ somvoɛ, né osuro AWURADE. Nakoso ebie bɔ yɛma ye kerɛ ɔ, wawa kyɛ ɔbaafa me mma nyɔ nemɔ yɛ nganga sie kerɛ ne anoa.”

Anyandera 14:31

Ɛhyɛ sona bɔ ɔyɛ anwumvo so a, né agua ye Nyameɛ bɔ ɔbɔle ye ne nyunu ase, na ebiala bɔ onwu ehianiɛ anwumvo ne, ɔhyɛ Nyameɛ animnyam.

Anyandera 18:23

Ehianiɛ noa dwirɛ te kyerɛpalɛ, nakoso sikaniɛ de, ɔma mmuayɛɛ fumfum.

Anyandera 22:16

Sona bɔ osisi ehiafoɛ fa nya ye nwo, ɔne bɔ ɔfa ye anwonya kyɛ sikafoɛ ne, ehiaa yeɛ okohia ye ɔ.

Anyandera 22:22

Nnɛdi sona bɔ ɔyɛ anwumvo ɔ aminɛ, ofikyɛ ɔyɛ anwumvo, yeɛ nnɛsisi ehianiɛ wɔ nekaa bɔ bedi dwirɛ ɔ;

Yesaya 24:2

Na ɔkɔwa kyɛ, bɔ ɔkɔto mmenia ne, sɔ ala yeɛ ɔkɔto ɔsɔfo ɔ; bɔ ɔkɔto kanganiɛ ne, sɔ ala yeɛ ɔkɔto ye mene ɔ; bɔ ɔkɔto afaneɛ ne, sɔ ala yeɛ ɔkɔto ye mene brasua ɔ; bɔ ɔkɔto sona bɔ ɔtɔ nningyein ne, sɔ ala yeɛ ɔkɔto bɔ ɔyɛ ye atɔen ɔ; bɔ ɔkɔto sona bɔ ɔbɔ bosea ne, sɔ ala yeɛ ɔkɔto bɔ obisa bosea ɔ; bɔ ɔkɔto sona bɔ bɛma ye kerɛ ne, sɔ ala yeɛ ɔkɔto bɔ ɔma kerɛ ɔ.

Amose 2:6

AWURADE nwa nyoo, “Ɔnate Yisrael ye amumuyɛɛ nza, eh, ɔne nna ne ati, mengɔhwe ye so hwenɛ ne mengosa; ofikyɛ bɛtɔne teneneeniɛ bɛfa bede ɛdwetɛ, yeɛ bɛtɔne ehianiɛ bɛfa bede mmaboa.

Amose 4:1

Ɛmɔ, ɛ́mɔtie, Basan nandwie mmeleɛ bɔ ɛmɔwɔ Samaria bokaa so ɔ, ɛmɔ bɔ ɛmɔhyɛ mmenia bɔ bɛyɛ anwumvo ɔ so, ná ɛmɔsisi ehiafoɛ ɔ; ɛmɔ bɔ ɛmɔkã bekyire ɛmɔ ahu mɔ kyɛ, ‘Fa bra maa yɛno’ ɔ.

Amose 8:4

Ɛ́mɔtie ɛhe, ɛmɔ bɔ ɛmɔsisi mmenia bɔ bɛyɛ anwumvo ɔ, kyɛ ɛmɔfa so ma aseɛ ne aso ehiafoɛ bedi amia,

Amose 8:6

Ɛhe kɔmaa yɛkɔfa ɛdwetɛ yɛkɔtɔ ehiafoɛ, yɛkɔfa mmaboa yɛkɔtɔ bɛ bɔ bɛyɛ anwumvo ɔ, ná yatɔne atokoɔ boso bɔ ɔtte mayee ne.

Mateo 18:25

Né ɔngɔhora kerɛ ne tua, yiti ye mene ne hyɛle kyɛ bɛtɔne ye, ɔne ɔye ne ye mma, yeɛ bɔ ole ye amukoraa, ná bɛfa betua kerɛ ne.

Yakobo 2:6

Nakoso ɛmɔbu ehianiɛ animtia! Aso nna sikafoɛ yeɛ bɛhyɛ ɛmɔ so ɔ, aso nna bɛ yeɛ bɛtwe ɛmɔ bɛkɔ badwafoɛ nyunu ɔ?

Yakobo 5:1

Afei ɛmɔ, esikafoɛ, ɔnate amaneɛ bɔ ɔ́ba ɛmɔ so ne ati, ɛ́mɔsu ná ɛ́mɔbɔ awuye!

Yakobo 5:4

Ɛ́mɔtie! Apaafoɛ bɔ bɛyɔle ɛmɔ fieso adwuma ne, b’akatuaa bɔ ɛmɔnate asisie so bɛfa besiele ne, ɔtea nu; na bɛ bɔ bɛtele ɛmɔ fieso nnɔbaeɛ ne, bɛ suɛ ne waadwu Asafo Awurade so anu.