Anyandera 20:7 - AHYERƐLƐ KRONGRON

⁷ Teneneeniɛ ye bra te sannwuu, na ye mma konya saleɛ wɔ ye si.

Anyandera 20:7 Iomraidhean Croise

Gyenesise 17:7

Ngɔyɛ m’apam maa ɔkɔyɛ apam afebɔɔ, bɔ ɔwɔ berɛ ma me ne wɔ ne kyẽa bie wɔ boso ama wɔ b’aworɛ ndoatoasoɛ mukoraa nu. Na ngɔyɛ wɔ ne kyẽa bie wɔ boso ama Nyameɛ.

YOB NWOMAA NE 1:1

Né biaa bie te Yuse aseɛ so. Ye dumaa li Yob. Sɔ biaa ne, né ye bra te sannwuu, na ɔtengyɛ. Ɔte sona bɔ né osuro Nyameɛ ɔ, na ɔhwene ye nwo fili bɔne nwo.

Edwein 112:2

Ye boso ama kɔyɛ titire wɔ aseɛ ye aso; teneneeniɛ ye aworɛ ndoatoasoɛ konya saleɛ.

Edwein 15:2

Sana bɔ ye bra te sannwuu, bɔ ɔyɔ bɔ ɔtengyɛ, bɔ ofi ye ahone nu ɔkã nahorɛ,

Edwein 26:1

Ao AWURADE, bua me be, ofikyɛ mafa pɛpɛɛpɛyɛlɛ manate; na mafa me nwo mato AWURADE so bɔ mengɔnwɔngye mengɔtɔ ɔ.

Edwein 26:11

Nakoso me de, nahorɛlilɛ yeɛ mefa menate ɔ; pepɛ de me, ná nwu me anwumvoin.

Edwein 37:26

Onwu anwumvoin daa, na ofia ye kunu fa nikyee fɛmo, na ye boso ama benya saleɛ.

Anyandera 13:22

Sona paa yakyi ye nnomaa agyapadeɛ, nakoso bɔnefoɛ anwonyadeɛ de, okooli teneneefoɛ sa nu.

Anyandera 14:2

Sona bɔ ɔnate nahorɛlilɛ atee so ne, osuro AWURADE, nakoso bɔ ɔnate atee tɛɛ so ne de, obu ye animtia.

Anyandera 14:26

Bɛ bɔ besuro AWURADE ne, bɛ wora wura ye nu pindinn, na ɔbɔ bɛ mma nwo waen.

Anyandera 19:1

Ehianiɛ bɔ ye bra te sannwuu ne, ɔte paa tra sona bɔ ɔte nnakannaka ne kwaseaa ɔ.

Yesaya 33:15

Sana teneneeniɛ bɔ ɔkã nahorɛ, bɔ okyi aminɛlilɛ nu mvasoɛ, bɔ ɔnwaha ye sa kyɛ ongole fea-ase-ma, bɔ otuatua ye so kyɛ ongotie sona hunɛ nwo porɛ bɔ babɔ ɔ, bɔ omuamua ye nye kyɛ ɔngɔma ongonwu bɔne ɔ;

Yeremia 32:39

Ngɔma bɛ ahone ko ne atee ko, amaa ɔnate so basuro me afebɔɔ, ɔnate bɛ bɔbɔ bɛ yeeyɛlɛ, ɔne kyẽa bie bɛ mma mɔ yeeyɛlɛ ti.

Luka 1:6

Né bɛ munyɔ bɛtengyɛ wɔ Nyameɛ nyunu, na belili Awurade mmeraa dwirɛ ne ye ahyɛdeɛ so pɛpɛɛpɛ.

Asomafoɛ 2:39

Ofikyɛ Nyameɛ anohoba ne wɔ berɛ ma ɛmɔ ne ɛmɔ mma ne bɛ bɔ bɛwɔ dedeede, ɔne ebiala bɔ Awurade, yɛ Nyameɛ, kɔfrɛ ye kɔwa ye berɛ ɔ.”

2 Korintofoɛ 1:12

Bɔ yɛfa yɛhoahoa yɛ nwo ɛhe: yɛ tiboa di yɛ adanzeɛ kyɛ yafa nahorɛlilɛ ne nyamesuro yeɛ yabɔ yɛ bra wɔ wiase ɔ, nganga yɛ ne ɛmɔ asetena nu. Yamva ewiase nworɛ so yeɛ yɛbɔle yɛ bra ɔ, na mmom yɛnate Nyameɛ adom so.