Amose 8:11 - AHYERƐLƐ KRONGRON

¹¹ “Tie, mmerɛ bie ɔ́ba, bɔ ngɔma ɛhɔen kandinga bie kɔwa aseɛ ne aso, bɔ nna aleɛ hɔen ɔ, yeɛ nna nzuhɔen ɔ, na mmom AWURADE dwirɛ tiele nwo hɔen ɔ”, AWURADE noa dwirɛ ɛne.

Amose 8:11 Iomraidhean Croise

2 Aberɛso Dwirɛ 15:3

Mmerɛ tendenn bie bɔ wapɛ nu ɔ, né Yisrael ɔnze nahorɛniɛ Nyameɛ ne. Né belle ɔsɔfo bɔ okyirekyire bɛ ɔ, yeɛ belle mmeraa biala.

Edwein 74:9

Yɛnnwu yɛ frangaa nemɔ; ngɔmhyɛlɛniɛ biala nne berɛ ko; na yɛ nu biala nze kyẽa bɔ ɛhe bo kɔpɛ ɔ.

Anyandera 29:18

Nekaa bɔ mmenia bɛndwene kyẽa bie ngɔsoɛ nwo ne, maen ne anu yɛ basaa, nakoso sona bɔ odi mmeraa ne aso ne, onya saleɛ.

Yesaya 5:6

Ngɔmaa ɔkɔkakyi adangasa, mengɔdwaadwaa ye nwo, yeɛ mengɔbɔ ye nwo, nu kofu agurɛ ne mmowue. Asa koso, ngɔhyɛ munungum kyɛ nnɛmaa ɔtɔ esue gua so.

Hesekiel 7:26

Musue kɔwa kɔtoatoa so, yeɛ ngunga kɔwa kɔtoatoa so; bɛkɔpena nyekyire bekofi ngɔmhyɛlɛniɛ ne berɛ, mmeraa ne anwo nimdeɛ kɔbɔ ɔsɔfo, yeɛ foɛtulɛ kɔbɔ mbanyi mɔ.

Hosea 2:3

Wamma ye sɔ a, ngɔpa ye nwo maa ye nwo kɔla so kyɛ kyẽa bɔ bɛwole ye ɔ; ngɔmaa ɔkɔyɛ kyɛ aseɛ pralaa so, ná wayɛ kyɛ aseɛ katerepee, na ngɔmaa nzuhɔen kohũ ye maa okowu.

Mika 3:6

Yiti aleɛ kɔsã ɛmɔ, bɔ ɛmɔngonwu nyekyire biala ɔ, awosii kɔto ɛmɔ, bɔ ɛmɔngɔhyɛ ngɔm biala ɔ. Eyia bɔ ɔta ma ngɔmhyɛlɛfoɛ nemɔ ne ɔkɔɔtɔ, na alehyeleɛ kɔkakyi bɛ so awosii tunn.

Mateo 9:36

Na onwuni mmenia pembepembe ne, bɛyɛle ye anwumvo, ofikyɛ né bafɛ, na né bɛsamo berɛ kyɛ mmoaen bɔ belle neafoɛ ɔ.

1 Samuel 28:15

Afei Samuel bisale Sɔɔlo kyɛ, “Nzu ati yeɛ agyegye me amaa mafi ɛborɔ dɔ mawa ɔ”? Na Sɔɔlo buale kyɛ, “Edwirɛ piri paa ato me, ofikyɛ Filistifoɛ afa koɛ batoa me. Nakoso Nyameɛ ayakyi me nu, na ɔmva ngɔmhyɛlɛfoɛ so anaa laleɛ nu mmua me ko. Yiti yeɛ mafrɛ wɔ kyɛ eehyire me bɔ nyɔ ɔ.”

1 Samuel 28:6

Sɔɔlo bisale AWURADE, nakoso laleɛ nu oo, Yurim so oo, anaa ngɔmhyɛlɛfoɛ so oo, AWURADE andɛ ye so.

1 Samuel 3:1

Né abɛɛmaa Samuel wura Eli ndeteyɛɛ bo yeɛ ɔso AWURADE ɔ. Sɔ mmerɛ ne, né AWURADE dwirɛ nwo yɛ nna paa; yeɛ né mmenia koso bɛndaa bennwu nyekyire.