Amose 7:15 - AHYERƐLƐ KRONGRON

¹⁵ na AWURADE yele me maa nyakyili mmoaen so nealɛ, na AWURADE sele me kyɛ, ‘Kɔ ná kɔhyɛ ngɔm kyire me maen Yisrael.’

Amose 7:15 Iomraidhean Croise

2 Samuel 7:8

“Yiti ka kyire me somvoɛ Dawide kyɛ, Asafo AWURADE nwa nyoo: Me yeɛ nyele wɔ mvili mmoaen nealɛ nu, ɔne mmoaen si lilɛ nu, ná mvale wɔ nduale me maen Yisrael noa ɔ.

1 Ahemvo 19:19

Yiti Elia sili nu fili berɛ, na onwuni Safate awa Elisa kyɛ ofundam aseɛ bɔ bɛfa bɛyɔ eboo ɔ. Né nandwie nyɔ nyɔ bɔ kɔnnua sosɔ bɛ ɔ sɔ alaa buru ne nyɔ beli Elisa nyunu. Né Elisa ɔfa kure bɔ ɔtɔ so buru ne nyɔ ne ofundam aseɛ ne. Elia ɔɔfale ye nwo berɛ, na Elia tole ye ataadeɛ aguasoɛ ne guale ye so.

Yeremia 1:7

Nakoso AWURADE sele me kyɛ, “Nnɛkã kyɛ, ‘Nde akwadaa’, ofikyɛ bɛ bɔ ngɔsoma wɔ wɔ bɛ berɛ ne amukoraa, odi kyɛ ɛkɔ ɔ, na edwirɛ biala bɔ ngɔfa ngɔsoma wɔ ne, odi kyɛ ɛkã ɔ.

Yeremia 26:12

Yeɛ Yeremia sele mbanyi nemɔ amukoraa ne maen ne amukoraa kyɛ, “AWURADE yeɛ ɔsomane me kyɛ mva edwirɛ bɔ ɛmɔate ye amukoraa nhyɛ ngɔm ndia awuro he ɔne kuro he ɔ.

Amose 3:8

Gyata bobɔ nu, na nwa yeɛ ongosuro ɔ? AWURADE Nyameɛ adwudwo, nwa yeɛ ɔngɔhyɛ ngɔm ɔ?”

Mateo 9:9

Yesu fili berɛ bɔ ɔpɛ nu kɔ nen, onwuni biaa bie bɔ bɛfrɛ ye Mateo kyɛ ɔte nekaa bɔ bedide ɛtoɔ ɔ, na osele ye kyɛ, “Di me si.” Na odwɔsole lili ye si.

Asomafoɛ 1:8

Na sɛ Sunzum Krongron ne ba ɛmɔ so a, ɛmɔkonya tumi ná ɛmɔayɛ m’adanzefoɛ wɔ Yerusalem, ne Yudea amukoraa ne Samaria maa waadwu aseɛ so nekaa biala.”

Asomafoɛ 4:20

ɔnate kyɛ, bɔ yɛ yanwu ye ná yate ne de, yɛngɔhora yɛngɔyakyi ye hanɛ.”

Asomafoɛ 5:20

“Ɛmɔhɔ beegyina asɔneyɛɛ sua ne anu, ná ɛmɔbɔ sɔ ngoa foforɛ he amukoraa nwo dawure behyire mmenia.”

1 Samuel 10:11

Na mmenia bɔ bɛse ye daa amukoraa nwuni ye kyɛ ɔne ngɔmhyɛlɛfoɛ nemɔ bɛ́hyɛ ngɔm nen, bebisabisale bɛ nwo kyɛ, “Nzikyɛ nikye yeɛ wate wape Kise awa ye aso ye? Sɔɔlo koso boka ngɔmhyɛlɛfoɛ nemɔ so hɔ ɔ?”