Amose 6:13 - AHYERƐLƐ KRONGRON

¹³ Ɛmɔ bɔ ɛmɔhoahoa ɛmɔ anwo kyɛ ɛmɔali Lodeba kuro ne aso ngonim, bɔ ɛmɔkekã kyɛ, “Aso nna yɛ bɔbɔ y’anwoserɛ yeɛ yafa yali Karenaim so ngonim ɔ?”

Amose 6:13 Iomraidhean Croise

2 Ahemvo 13:25

Na Yisrael nguro bɔ Ben Hadade baba Hasael ole fili Yehoase baba Yehoahase ye sa nu wɔ koɛ nu ne, Yehoase sa le fili Ben Hadade sa nu. Yoase lili Ben Hadade so ngonim pɛen nza, na osa lele Yisrael nguro nemɔ.

2 Ahemvo 14:25

Ɔhone koɛ osa lele Yisrael aseɛ bɔ ye wɛen fi Lebo Hamate kɔpem Araba Ɛpo ne, kyɛbɔ AWURADE Yisrael Nyameɛ dwirɛ bɔ ɔnate ye somvoɛ ngɔmhyɛlɛniɛ Yona so hane ne, ɔte ne ala. Yona fi Gate Hefa, na ye baba ole Amitae.

YOB NWOMAA NE 31:25

sɛ mvale m’anwonya pee ne nduli me nwo, anaakyɛ nhoahoale me nwo kyɛ me sa nu le bie;

YOB NWOMAA NE 31:29

“Sɛ me nye agye kyɛ me pɔfoɛ onwu amaneɛ, anaa wayɛ me fɛ kyɛ musue ato ye a,

YOB NWOMAA NE 8:14

Bɔ wafa ye nwo wato so ne, ɔsɛkye, yeɛ ye anyelasoɛ koso ɔyɛ mmerɛ kyɛ ananze ndendaen.

YOB NWOMAA NE 8:15

Ɔfa ye nwo kisa ye sua, nakoso sua ne dwiri gua, yeɛ ɔfa ye nwo mata sua ne, nakoso sua ne ngora gyina.

Edwein 2:2

Aseɛ ye aso ahemvo boaboa bɛ nwo, na maenbulɛfoɛ bɛbɔ nu bɛfa adwene betia AWURADE ne bɔ AWURADE wapopa ye ngoo ne kyɛ,

Edwein 75:4

Sona bɔ ɔhoahoa ye nwo ne, mekã mekyire ye kyɛ, “Nnɛhoahoa wɔ nwo,” yeɛ mekã mekyire bɔnefoɛ kyɛ, “Nnɛfa wɔ tumi hoahoa wɔ nwo;

Edwein 75:5

nnɛfa wɔ tumi hoahoa wɔ nwo koraa, yeɛ nnɛdwudwo ahandaen so.”

Nworɛ Dwirɛhanɛniɛ 11:9

Aberandeɛ, ma wɔ nye gye wɔ wɔ mmerandeɛ nu, nya anigye wɔ wɔ nu wɔ wɔ mmerandeɛ nu. Yɔ bɔ wɔ nye gye ye nwo ɔ ɔne bɔ ɔte wɔ nye so akɔnnɔ ɔ, nakoso nwu ye kyɛ, Nyameɛ kobua wɔ ndɛen wɔ bɔ ɛkɔyɔ amukoraa nwo.

Yesaya 7:1

Yusia awa Yotam ɔwa Ahase bɔ ɔte Yuda hene ne, ye aberɛ so, Siria hene Resin ne Yisrael hene Peka bɔ ɔse ole Remalia ne, bɛɛfale koɛ bɛtetale Yerusalem, nakoso bangora banni so ngonim.

Yesaya 7:4

ná se ye kyɛ, Gyina pindinn, yɛ konn, nnɛsuro, yeɛ nnɛma wɔ kunu tete wɔ wɔ gyetia nyɔ hemɔ bɔ begye monɛɛmonɛɛ ne anwo, bɔ bɛ ole Sirianiɛ Resin ɔne Remalia awa ne bɛ yaa hahii bɔ bafɛ ne.

Yesaya 8:6

“Ɔnate kyɛ maen he apo Siloa asue bɔ ɔsẽ dinn ne, ná bama Resin ne Remalia awa ne nwo suronyi atɔ bɛ so ne ati,

Yeremia 50:11

“Ao, ɛmɔ bɔ ɛmɔfẽ m’agyapadeɛ ne ɔ, ɔnate kyɛ ɛmɔ nye gyele, ɔnate kyɛ ɛmɔlili ahurusi ne ati, ɛmɔayɛ mbiri mbiri kyɛ nandwie beleɛ akrɔngrɔma bɔ ɛserɛ apɛ ye nwo ayia ɔ, yeɛ ɛmɔsu kyɛ nandwie nyii’.

Yeremia 9:23

Bɔ AWURADE kã hɔ ɛhe: “Nnɛma nworɛniɛ ɔfa ye nworɛ hoahoa ye nwo, nnɛma anwoserɛniɛ ɔfa ye anwoserɛ hoahoa ye nwo, yeɛ nnɛma sikaniɛ ɔfa ye anwonya hoahoa ye nwo.

Hesekiel 29:3

Dwudwo, ná se kyɛ, AWURADE Nyameɛ nwa nyoo, “Tie, meko metia wɔ, Misraim hene Faro, wɔ, sasrabɔnzam piri bɔ ɛla w’asue mɔ nu, bɔ ɛnwa: ‘M’asue Naele te me bɔbɔ me deɛ, na me bɔbɔ yeɛ nyɔ mane me nwo ɔ.’

Hesekiel 29:9

Misraim aseɛ ne kɔkakyi kurofoen ne aseɛ pralaa, na bekonwu kyɛ me ole AWURADE. “Ɔnate kyɛ ɔnwa, ‘Asue Naele te me bɔbɔ me deɛ, na me bɔbɔ yeɛ nyɔle ɔ.’

Daniel 4:27

Yiti Nana, me foɛ bɔ mebaatu wɔ ye, de to nu: Bɔ bra bɔ ɔtengyɛ ɔ ná yakyi bɔne yɔlɛ; nwu bɛ bɔ bɛyɛ anwumvo ɔ anwumvoin, ná yakyi amumuyɛɛ yɔlɛ, amaa ɔnate so ebiaa né wɔ so anu atɔ wɔ ahyɛ.”

Daniel 4:30

na osele kyɛ, “Babilɔn yeɛ wayɛ piri sɔa e! Aso nna me tumi piri yeɛ mafa makyekye kuro ye maa wayɛ m’ahenguro, bɔ mefa meye m’ahennie animnyam ali ɔ?”

Yona 4:6

Na AWURADE Nyameɛ siesiele ngomvo bakaa bie maa onyi katale Yona so, kyɛ ɔyɛ fɔnwoo ɔkata ye ti so, ná ɔye ye ofi ye amaneɛ ne anu. Yiti Yona nye gyele ngomvo bakaa ne anwo paa.

Sefania 3:11

“Sɔ mmerɛ ne, w’animguaseɛ yɔleɛ amukoraa bɔ ɛfa tole me mmeraa ne, ngɔye ngofi berɛ, na bɛ bɔ bedi anwomasoɛ nu ahurusi ne, ngotu bɛ bo ngofi wɔ nu, na ɛngɔyɛ ahandaen ko wɔ me bokaa krongron ne aso.

Sakaria 1:19

Yeɛ mmisale abɔfo bɔ ɔne me dwudwole ne kyɛ, “Na ɛhemɔ, nzikyɛ ɛne?” Na obuale me kyɛ, “Ɛhemɔ ole mmɛen bɔ bɛbɔle Yuda, Yisrael ne Yerusalem bɛsandele ne.”

Yohane 16:20

Nahorɛ nu paa, mekã mekyire ɛmɔ kyɛ: Ɛmɔkosu ná ɛmɔabɔ awuye, nakoso wiase koli ahurusi; na ɛmɔ de, ɛmɔ wora kɔbɔ, nakoso ɛmɔ aworabɔlɛ ne kɔkakyi ahurusililɛ.

Yakobo 4:16

Nakoso ɛmɔhoahoa ɛmɔ nwo wɔ ɛmɔ anwomasoɛ nu; na sɔ anwomasoɛ ne amukoraa te bɔne.

Nyekyire 11:10

Na bɛ bɔ bɛte aseɛ so ɔ bekoli bɛ nwo ahurusi, na bɛ nye kɔgye ná bamanemane bɛ nwo akyɛdeɛ; ofikyɛ sɔ ngɔmhyɛlɛfoɛ nyɔ nemɔ bɛfale ɛhawo bɛtole bɛ bɔ bɛte aseɛ so ɔ so.

Maenbulɛfoɛ 9:27

Bɛhɔle fieso, na bɛɛtetele bobe befili bɛ bobe boo mɔ nu. Behwini bɛyɛle nzaa, na bɛfa bɛgyele bɛ nye. Yeɛ bɛhɔle bɛ bosoen asɔneyɛɛ sua nu. Bedidili bɛnone, na bɛgorole Abimɛlɛke nwo.

1 Samuel 4:5

Na mmerɛ bɔ AWURADE apam alaka ne dwuli asikyeleɛ ne anu ne, Yisrael amukoraa bɔle ese mane aseɛ wosole.