Amose 5:6 - AHYERƐLƐ KRONGRON

⁶ “Ɛ́mɔpena AWURADE si ate, na ɛmɔkonya ngoa; wamma ye sɔ a, ɔkɔwa Yosef awuro ama so kyɛ see, na ɔkɔyera ye, bɔ ebiala nne Betel bɔ okonua ye ɔ.

Amose 5:6 Iomraidhean Croise

2 Samuel 19:20

W’akoaa, mese kyɛ mayɔ bɔne. Yiti Nana, me mene, mesrɛ wɔ, Yosef awuro ama amukoraa, me yeɛ mali moa mawa kyɛ mebaayia wɔ ɔ.”

1 Ahemvo 11:28

Né Yeroboam te anwoserɛniɛ paa. Na Solomon nwuni kyɛ sɔ aberandeɛ ne ɔbɔ ye nwo mmɔden ne, Yosef boso ama amukoraa bɔ bɛhyɛ bɛ maa bɛyɔ adwuma ne, ɔmaa ɔneane bɛ so.

2 Aberɛso Dwirɛ 34:25

Ofikyɛ bapo me, bayera ɛyɛɛ bama nyameɛ foforɛ mɔ, na ɔnate so bafa bɛ sa noa adwuma mukoraa bawura me apue. Yiti mafɛ maen ye aso yaa piri paa, bɔ m’ahone ngɔtɔ nzue nu ɔ.

Edwein 27:8

Ahã ahyire me kyɛ, “Pena me si atee!” Na mmuale kyɛ, “AWURADE, wɔ si atee yeɛ mepena ɔ.”

Edwein 69:33

Ofikyɛ AWURADE tie ehiafoɛ sufrɛ, ná ye mmenia bɔ bɛwɔ amaneɛ nu ne, ommu bɛ animtia.

Ɛksadɔso 22:6

“Sɛ see tɔ nekaa bie, ná ɔkɔsɔ ngyɛngyɛma nu, ná ɔkɔyera pata so aburoo, anaa fieso aburoo, anaa aburoo boo a, ɔsɛ kyɛ sona bɔ ɔtole see ne tua kerɛ.

Yesaya 1:31

Anwoserɛniɛ kɔyɛ kyɛ mmɛyeram worowaa, ye sa noa adwuma kɔyɛ kyɛ see nzramaa, na ɔne ye sa noa adwuma ne bɛkɔyera bɛkɔbɔ nu, bɔ ebiala nne berɛ bɔ okonua ye ɔ.

Yesaya 55:3

Ɛ́mɔyɛ asoɛ bétie, ná ɛmɔbra me berɛ; ɛ́mɔtie, amaa ɔnate so ɛmɔ kra anya ngoa. Me ne ɛmɔ yɛkɔyɛ apam afebɔɔ, bɔ ɔte me ɔdɔ bɔ onni ngasi bɔ nne ye ma Dawide ne.

Yesaya 55:6

“Ɛ́mɔpena AWURADE si atee, mmerɛ bɔ ɛmɔpena ye a ɛmɔkonwu ye ɔ, ɛ́mɔfa ɛmɔ dwirɛ bɛ́to ye nyunu, mmerɛ bɔ opingye ɛmɔ ɔ.

Yeremia 38:20

Nakoso Yeremia buale kyɛ, Bɛngɔfa wɔ bengowura bɛ sa. Mesrɛ wɔ, tie AWURADE noa dwirɛ bɔ mekã mekyire wɔ ye, na okoyie wɔ yé, na wɔ kra konya ye ti kodidi nu.

Yeremia 4:4

Ao Yudafoɛ ne Yerusalemfoɛ, odi kyɛ ɛmɔye ɛmɔ ahone nwo bɔne ndwirahoɛ ne wɔ AWURADE nyunu, kyɛbɔ bɛpɛ sona ye bienzua ɔ, Wanyɛ sɔ a, m’ahone kohu kyɛ see, na okogye alaa bɔ ebiala ngɔhora ye nua ɔ, ɔnate ɛmɔ bɔne yɔleɛ ne ati.

Yeremia 7:20

Yiti bɔ AWURADE Nyameɛ kã hɔ ɛhe: Tie, m’ahonehulɛ ne me yaa piri ne, ngohwie ngogua ɛwa, kuro sona ne ngaka so, eburo mmakaa ne aseɛ so mmakaammaa so; ɔkɔyera bɔ ongonua ɔ.

Hesekiel 21:3

ná se Yisrael aseɛ ne kyɛ, AWURADE nwa nyoo: Tie, meko metia wɔ, ngɔhwe me sɛpɔ ne ngofi ye bɔha nu, na teneneefoɛ oo, bɔnefoɛ oo, ngonua bɛ boso ngofi wɔ nu.

Hesekiel 33:11

Se bɛ kyɛ: Kyɛ nde ase ye, me nye ngye bɔnefoɛ ye wue nwo, na mmom me nye gye kyɛ bɔnefoɛ kɔyakyi ye yɔleɛ, ná okonya ngoa ɔ. AWURADE Nyameɛ noa dwirɛ ɛne. Ɛ́mɔyakyi, ɛ́mɔyakyi ɛmɔ bɔne yɔleɛ ne! O Yisrael awuro ama, nzu ati yeɛ odi kyɛ ɛmɔwuwu ɔ?

Hesekiel 37:19

bua bɛ kyɛ, ‘AWURADE Nyameɛ nwa nyoo: Ɛ́mɔtie, mebaafa Yosef bakaa ne bɔ otira Efraim sa nu ne, yeɛ afei Yisrael mmusua kure bɔ bɛboka ye so ne. Ngɔfa bɛ ngɔboka ye so, mekyire Yuda bakaa ne, maa bɛkɔyɛ bakaa ko, na bɛkɔyɛ ko wɔ me sa nu.’

Amose 3:14

“Kyẽa bɔ ngɔhwe Yisrael so wɔ ye mmeraatolɛ nwo ne, ngɔhwe Betel afɔleɛ mmokyea nemɔ koso bɛ so, na bɛkɔpepɛ afɔleɛ mmokyea mmɛen nemɔ maa bekogua ase.

Amose 5:14

Bɔ ɔte paa mmom yeɛ odi kyɛ ɛmɔpena ye si atee ɔ, na nna bɔ ɔte bɔne ɔ, amaa ɔnate so ɛmɔanya ngoa, na AWURADE Asafo Nyameɛ kogyina ɛmɔ si, kyɛbɔ ɛmɔahã ne.

Amose 5:4

Ofikyɛ bɔ AWURADE kã kyire Yisrael awuro ama ɛhe, “Ɛ́mɔpena me si ate, na ɛmɔkonya ngoa.

Amose 6:6

ɛmɔ bɔ ɛmɔno nzaa awaa bɔ wayi to, bɔ ɛmɔfa sakyeɛfona paa bɛpopa, nakoso ɔmva ɛmɔ nwo kyɛ Yosef ɔbɔ ɔ!

Sefania 2:3

Ɛmɔ, ɛ́mɔpena AWURADE, aseɛ ne asofoɛ bɔ ɛmɔbrɛ ɛmɔ nwo ase ɔ, bɔ ɛmɔdi AWURADE mmeraa dwirɛ so ɔ! Ɛ́mɔpena tenenee si atee, ɛ́mɔpena anwobrɛaseɛ si atee; ebiaa né wamaa ɛmɔanya ɛmɔ ti badidi nu wɔ AWURADE ahonehulɛ kyẽa ne.

Sakaria 10:6

“Ngɔma Yuda awuro ama b’ahone kɔyɛ se, na ngɔpepɛ ngole Yosef awuro ama. Ngosa ngɔfa bɛ ngɔwa ngɔɔbɔ bɛ atenaseɛ, ofikyɛ manwu bɛ anwumvoin, ngɔyɛ bɛ kyɛ nna bɛ yeɛ mbole bɛ ne, ofikyɛ me ole AWURADE bɛ Nyameɛ, na ngotie bɛ sufrɛ.

Deuteronomi 32:22

Ofikyɛ m’ahone bɔ wahu ne asɔ see, na ogye toonn kodwu ɛborɔ ye bo dɔ, ɔyera aseɛ ne so aleɛ, na ɔfa see to mmokaa mɔ bɛ nyinasoɛ nu.

Deuteronomi 4:24

Ofikyɛ AWURADE wɔ Nyameɛ ne, ɔte see bɔ ɔyera motoo ɔ, Nyameɛ bɔ ɔtwe nungunɛ ɔ.

Yosua 18:5

Odi kyɛ bɛkyɛ aseɛ ne anu nzoo; ofikyɛ Yuda abusua kure de, wanya ye deɛ wɔ ngwaen dɔ dada, yeɛ Yosef boso ama wora banya bɛ deɛ wɔ sorɔ dɔ dada.