Amose 5:4 - AHYERƐLƐ KRONGRON

⁴ Ofikyɛ bɔ AWURADE kã kyire Yisrael awuro ama ɛhe, “Ɛ́mɔpena me si ate, na ɛmɔkonya ngoa.

Amose 5:4 Iomraidhean Croise

2 Ahemvo 20:3

“Ao AWURADE, kyɛbɔ mafa m’ahone amukoraa mali wɔ dwirɛ so nahorɛ nu, ɔne kyɛbɔ mayɔ bɔ ɔtengyɛ wɔ wɔ nyunu ne, mesrɛ wɔ, fa wɔ nye to.” Na Hesekia suni hahii.

1 Aberɛso Dwirɛ 28:9

“Na afei, mma Solomon, AWURADE wɔ baba ye Nyameɛ ne, odi kyɛ enwu ye yé, ná ɛfa ahone bɔ nu te, ɔne sotie ɛso ye. Ofikyɛ AWURADE neanea ahone amukoraa nu, na ɔse nzusuleɛ ne adwene biala. Sɛ ɛpena ye si ate a, ekonwu ye, nakoso sɛ ɛpo ye a, ɔkɔye ye sa kofi wɔ bo afebɔɔ.

2 Aberɛso Dwirɛ 15:2

Ɔhɔ ooyiale Asa, na osele ye kyɛ, “Asa ne Yuda maen amukoraa ne Benyamin maen amukoraa, ɛ́mɔtie! Ɛmɔso AWURADE ye de, AWURADE gyi ɛmɔ si. Sɛ ɛmɔpena ye si atee a, ɛmɔkonwu ye. Nakoso sɛ ɛmɔpo ye a, ye koso ɔkɔpo ɛmɔ.

2 Aberɛso Dwirɛ 20:3

Né Yehosafate suro, yiti osũ frɛle AWURADE, na ɔhyehyɛle akɔngyere wɔ Yuda maen amukoraa nu.

2 Aberɛso Dwirɛ 20:4

Yudafoɛ bɔle dwaa kyɛ besu bɛfrɛ AWURADE, na befifili Yuda nguro nemɔ anu bɛwale kyɛ bɛbaasu bɛfrɛ AWURADE.

2 Aberɛso Dwirɛ 34:3

Nana Yosia lili hene ne, ye afoɛ mmɔtwɛ ne anu bɔ né ɔtɛte abɛɛmaa ne, ɔhyɛle ye bo kyɛ ɔso ye nana Dawide Nyameɛ ne. Ye afoɛ buru ne nyɔ ne anu, ɔhyɛle ye bo tutuli ɛhemɔ bo fili Yuda ne Yerusalem: asɔneyɛɛ mɔ, bosoen Asera dosii mɔ, yeɛ amoen bɔ base ne amoen bɔ bahuro nikyee bafa bayɔ ɔ.

Edwein 14:2

AWURADE to ye nye fi nyameɛso ɔnea adasa mmaa, kyɛ aso okonwu ebie bɔ ɔse nworɛ, bɔ ɔpena Nyameɛ si atee ɔ.

Edwein 22:26

Anwobrɛaseɛfoɛ bekodidi bɛkɔma bɛ ko koyi; bɛ bɔ bɛpena AWURADE si atee ne, bɛ yeɛ bɛkɔye ye ayɛ ɔ. Nyameɛ ɔ́ma ɛ́mɔnya anika afebɔɔ!

Edwein 27:8

Ahã ahyire me kyɛ, “Pena me si atee!” Na mmuale kyɛ, “AWURADE, wɔ si atee yeɛ mepena ɔ.”

Edwein 69:32

Anwobrɛaseɛfoɛ bekonwu ye na bɛ nye kɔgye; ɛmɔ bɔ ɛmɔpena Nyameɛ si atee ne, ɛ́mɔma ɛmɔ wora ɔ́kyekye.

Edwein 69:33

Ofikyɛ AWURADE tie ehiafoɛ sufrɛ, ná ye mmenia bɔ bɛwɔ amaneɛ nu ne, ommu bɛ animtia.

Yesaya 31:1

Bɛ yaakɔ, bɛ bɔ bɛkɔ Misraim bɛkɔpena mmokalɛ, bɔ bɛfa bɛ nye bɛto mbɔngɔ so, bɔ ɔnate teaseɛnam mɔ bɛ somaa ti bɛfa bɛ wora bewura bɛ nu, bɔ ɔnate pɔngɔhanɛfoɛ mɔ b’anwoserɛ ti bɛfa bɛ wora bewura bɛ nu, nakoso bɛmva bɛ nwo bɛndo Yisrael Krongronniɛ ne so ɔ, anaakyɛ bɛmbena AWURADE si atee ɔ.

Yesaya 55:3

Ɛ́mɔyɛ asoɛ bétie, ná ɛmɔbra me berɛ; ɛ́mɔtie, amaa ɔnate so ɛmɔ kra anya ngoa. Me ne ɛmɔ yɛkɔyɛ apam afebɔɔ, bɔ ɔte me ɔdɔ bɔ onni ngasi bɔ nne ye ma Dawide ne.

Yeremia 38:20

Nakoso Yeremia buale kyɛ, Bɛngɔfa wɔ bengowura bɛ sa. Mesrɛ wɔ, tie AWURADE noa dwirɛ bɔ mekã mekyire wɔ ye, na okoyie wɔ yé, na wɔ kra konya ye ti kodidi nu.

Hesekiel 18:9

odi me nhyehyɛleɛ so, ná odi m’ahyɛdeɛ so nahorɛ nu a, sɔ sona ne yeɛ ɔtengyɛ ɔ, na nahorɛ nu, okonya ngoa, AWURADE Nyameɛ noa dwirɛ ɛne.

Hosea 10:12

Ɛmɔlua tenenee bɛ́ma ɛmɔ nwo, ɛ́mɔbu ye wɔ anwumvoinnwunɛ nu, ɛ́mɔso ɛmɔ hɔayeɛ too ne. Ofikyɛ mmerɛ aso kyɛ ɛmɔpena AWURADE si atee ɔ, kɔpem kyɛ ɔkɔwa kɔɔtɔ tenenee nzue kogua ɛmɔ so ɔ.

Amose 5:6

“Ɛ́mɔpena AWURADE si ate, na ɛmɔkonya ngoa; wamma ye sɔ a, ɔkɔwa Yosef awuro ama so kyɛ see, na ɔkɔyera ye, bɔ ebiala nne Betel bɔ okonua ye ɔ.

Sefania 2:3

Ɛmɔ, ɛ́mɔpena AWURADE, aseɛ ne asofoɛ bɔ ɛmɔbrɛ ɛmɔ nwo ase ɔ, bɔ ɛmɔdi AWURADE mmeraa dwirɛ so ɔ! Ɛ́mɔpena tenenee si atee, ɛ́mɔpena anwobrɛaseɛ si atee; ebiaa né wamaa ɛmɔanya ɛmɔ ti badidi nu wɔ AWURADE ahonehulɛ kyẽa ne.

Mateo 7:8

Ofikyɛ ebiala bɔ obisa ne, ye sa ka ye; na bɔ ɔpena ne, onwu ye; yeɛ bɔ ɔbɔ nu ne, bebukye ye.

Deuteronomi 32:46

osele bɛ kyɛ, “Edwirɛ bɔ ɛnɛ kyẽa ye meka mefa medi adanzeɛ metia ɛmɔ ye, odi kyɛ ɛmɔfa besie ɛmɔ ti anu. Ɛ́mɔfa bɛ́tete ɛmɔ mma, amaa ɔnate so bɛ wora bali mmeraa he anu dwirɛ amukoraa so nahorɛ nu.

Deuteronomi 32:47

Ofikyɛ ɔtte edwirɛ mbaen biala, na mmom ɔte ɛmɔ ngoa nyamaa. Na aseɛ bɔ ɛmɔkwaapɛ asue Yɔɔdan bɛfa bɛtena so ne, sɔ edwirɛ he yeɛ ɔkɔmaa ɛmɔkɔtena so bɛkɔhyɛ ɔ.”

Deuteronomi 4:29

Na dɔ yeɛ ɛmɔkɔpena AWURADE ɛmɔ Nyameɛ si atee ɔ. Na sɛ ɛmɔfa ɛmɔ ahone amukoraati ne ɛmɔ kra amukoraati bɛpena ye si atee a, ɛmɔkonwu ye.