2 Samuel 8:11 - AHYERƐLƐ KRONGRON

¹¹ Na Nana Dawide tuli sɔ nningyein nemɔ koso siele berɛ mane AWURADE sɔnenɛ, kyɛbɔ maen mɔ bɔ olili bɛ so ngonim ne, otuli b’ɛdwetɛ ne sikaa kɔkorɛ siele berɛ mane AWURADE sɔnenɛ ne.

2 Samuel 8:11 Iomraidhean Croise

2 Samuel 8:10

Toyi somane ɔwa bienzua Yoram wɔ Nana Dawide berɛ maa oobisale ye ahye yɛle ye mmo, kyɛ wali Hadadesa so ngonim ɔ, ofikyɛ né Hadadesa ne Toyi bɛtaa bɛko koɛ. Yoram ɔkɔ Dawide berɛ ne, ɔfale mbembenanneɛ bɔ bafa ɛdwetɛ, esikaa kɔkorɛ ne kɔɔbere bayɔ yeɛ ɔhɔle ɔ.

1 Ahemvo 7:51

Yiti Nana Solomon yɔle AWURADE awuro ne anwo adwuma amukoraati yiele. Na nningyein bɔ Solomon baba Dawide tu siele berɛ mane AWURADE ne: ɛdwetɛ, esikaa kɔkorɛ ɔne nningyein ahoroɔ nemɔ, Solomon fa hɔle AWURADE awuro oosiele nekaa bɔ besie nningyein ne.

1 Aberɛso Dwirɛ 18:11

Ɛdwetɛ ne esikaa kɔkorɛ bɔ Nana Dawide sesa fili maen maen amukoraa so: Edom, Moabo, Amonfoɛ, Filistifoɛ ne Amalɛke berɛ ne, ɔfale sɔ nningyein nemɔ bokale so, na otu siele berɛ mane AWURADE sɔnenɛ.

1 Aberɛso Dwirɛ 29:2

Yiti mabɔ mmɔden bɔ ngɔhora biala, mapena nningyein bɔ bɛkɔfa bekosi me Nyameɛ awuro ne ɔ magua berɛ: esikaa kɔkorɛ bɔ bɛkɔfa bɛkɔyɔ esikaa kɔkorɛ nningyein; ɛdwetɛ bɔ bɛkɔfa bɛkɔyɔ ɛdwetɛ nningyein; kɔɔbere bɔ bɛkɔfa bɛkɔyɔ kɔɔbere nningyein; buralɛ bɔ bɛkɔfa bɛkɔyɔ mmuralɛ nningyein; yeɛ mmakaa bɔ bɛkɔfa bɛkɔyɔ mmakaa nningyein ɔ. Afei koso, mapena onike nyɔboɛ bɔ bɛkɔfa bɛkɔhyehyɛ ɔ, nyɔboɛ hyɛnhyɛnn, nyɔboɛ torometorome, nyɔboɛ bɔ ye nyɔboɛ yɛ se ɔ, yeɛ nyɔbosanyene pee.

2 Aberɛso Dwirɛ 5:1

Yiti Solomon yɔle AWURADE awuro berɛ adwuma ne amukoraati yiele. Na nningyein bɔ Solomon baba Dawide tu siele berɛ mane AWURADE, ɔne ɛdwetɛ, esikaa kɔkorɛ ɔne nningyein ahoroɔ ne, Solomon fa hɔle Nyameɛ awuro berɛ oosiele nekaa bɔ besie nningyein ne.

Mika 4:13

Ao Sion awa brasua, dwɔso ná boro, ofikyɛ wɔ mmɛen ne, ngɔyɛ ye buralɛ, yeɛ ngɔyɛ wɔ gya mmaboa ne koso kɔɔbere, na ɛkɔfa kɔsɛkye maen pee pasapasa. Ngotu b’anwonyadeɛ ngosie berɛ ngɔma AWURADE, yeɛ ngotu b’agyapadeɛ ngosie berɛ ngɔma aseɛ amukoraa Mene ne.