2 Samuel 5:2 - AHYERƐLƐ KRONGRON

² Daa ne, bɔ né Sɔɔlo di yɛ so hene ne, né sɛ yɛkɔ oo, sɛ yɛba oo, wɔ yeɛ né edi Yisrael nyunu ɔ. Na AWURADE aha ahyire wɔ kyɛ, Wɔ yeɛ ɛkɔyɛ me maen Yisrael so neafoɛ ɔ, na wɔ yeɛ ɛkɔla Yisrael noa ɔ.”

2 Samuel 5:2 Iomraidhean Croise

Gyenesise 49:24

nakoso wando ye agyaen ne, Ɔnate Yakob ye Tuminiɛ ne ye anwoserɛ ti, ye abasa nu kɔyɛ se. (Ɔnate Mmoaenneafoɛ bɔ yeɛ ɔte Yisrael Nyɔbotaen ne dumaa nu).

2 Samuel 6:21

Na Dawide buale Mikal kyɛ, “AWURADE bɔ ɔyele wɔ baba ne ye awuro ama mukoraa siele ahameɛ, ná ɔneaneane nu yele me sili me hene wɔ ye maen Yisrael so ne, ye nyunu yeɛ ngole abilie ne ɔ.

2 Samuel 7:7

Nekaa biala bɔ mali tutena me ne Yisraelfoɛ amukoraa yahɔ ne, Yisrael mbanyi bɔ maye bɛ kyɛ bɛnea me maen Yisrael so ne, aso mabɔ bɛ nu bie somoɛ kyɛ, ‘Nzu ati yeɛ ɛmɔamva sida banzi awuro bamma me ɔ?’

2 Samuel 7:8

“Yiti ka kyire me somvoɛ Dawide kyɛ, Asafo AWURADE nwa nyoo: Me yeɛ nyele wɔ mvili mmoaen nealɛ nu, ɔne mmoaen si lilɛ nu, ná mvale wɔ nduale me maen Yisrael noa ɔ.

2 Ahemvo 20:5

“Sa wɔ si kɔhã kyire Hesekia bɔ odi hene wɔ me mmenia so ne kyɛ, AWURADE wɔ nana Dawide ye Nyameɛ ne, ɔnwa nyoo: Matie wɔ mbaeɛ ne, na manwu ɛmoen bɔ ɛte ne. Nahorɛ nu, ngɔsa wɔ anwonyerɛ na ɛlɛsa ne aso, ɛkɔhɔ AWURADE asɔneyɛɛ sua nu berɛ.

1 Aberɛso Dwirɛ 11:2

Daa ne, bɔ né Sɔɔlo di yɛ so hene ne po, sɛ Yisrael ɔkɔhɔ oo, sɛ ɔkɔwa oo, wɔ yeɛ né ɛla ye noa ɔ. Na AWURADE wɔ Nyameɛ wahã wahyire wɔ kyɛ, ‘Wɔ yeɛ ɛkɔyɛ me maen Yisrael so neafoɛ ɔ, na wɔ yeɛ ekoli me mmenia Yisraelfoɛ so hene ɔ.’ ”

2 Aberɛso Dwirɛ 1:10

Yiti ma me nworɛ ne nimdeɛ bɔ ngɔfa ngɔla wɔ maen ye noa ɔ; ofikyɛ wɔ maen piri ye, nwa yeɛ ɔkɔhora kɔla ye noa ɔ?”

Yesaya 40:11

Ɔkɔma ye mmoaen nemɔ aleɛ kyɛ mmoaenneafoɛ, ɔkɔfa ye sa kɔboaboa ye mmoaen mmaa nemɔ noa, ɔkɔfa bɛ kɔbɔ ye hue so, na okoli mmoaen mmrataen nemɔ anyunu ngaka ngaka.

Yesaya 55:4

Tie, mafa ye mayɛ adanzeɛ mama maen maen mɔ, ɔte maen maen mɔ bɛ safohene, ɔne bɔ ɔla bɛ noa ɔ.

Hesekiel 34:23

Ngɔma mmoaenneafoɛ ko kɔnea bɛ so. Ye ole me somvoɛ Dawide. Ɔkɔma bɛ aleɛ, ɔkɔma bɛ aleɛ ná wayɛ bɛ so mmoaenneafoɛ.

Mika 5:4

Na ɔkɔfa AWURADE anwoserɛ kogyina berɛ kɔma ye mmoaen kure aleɛ, wɔ AWURADE ye Nyameɛ animnyam ahennie dumaa nu. Bɛ bo kotimu, ofikyɛ afei ɔkɔyɛ titire koodwu aseɛ so nekaa biala.

Numeri 27:17

sona bɔ okoli bɛ nyunu wɔ nikyee biala anu, na afei watua bɛ noa wɔ bɛ koɛhonɛ nu, amaa AWURADE mmenia banyɛ kyɛ mmoaen bɔ belle neafoɛ ɔ.”

Mateo 2:6

‘Wɔ, Betlehem bɔ ɛwɔ Yuda aseɛ so ɔ, wɔ dibea wɔ Yuda atitirefoɛ nu ɔtte ba; ɔnate kyɛ wɔ nu yeɛ maenbulɛniɛ bɔ ɔbaanea me maen Yisrael so ne okofi kɔwa ɔ.’ ”

Yohane 10:11

“Me ole mmoaenneafoɛ paa ne. Mmoaenneafoɛ paa ne, ɔfa ye ngoa to berɛ ma mmoaen ne.

Hebrifoɛ 2:10

Ofikyɛ ye bɔ ɔbɔle nningyein mukoraa na nningyein mukoraa te ye deɛ ne, bɔ ɔnate Yesu so fa ye mma kɔ animnyam nu ne, né ɔfata kyɛ ɔma bɛ ngoalelɛ safohene Yesu ɔfa amaneɛnwunɛ nu odi mu.

1 Samuel 13:14

nakoso kekesaala ye de, w’ahennie ne ngogyina. AWURADE apena sona bɔ ɔla ye ahone nwo ɔ, na AWURADE afa ye ali ye maen so hene, ofikyɛ anni edwirɛ bɔ AWURADE hyɛle wɔ ne aso.”

1 Samuel 16:1

AWURADE bisale Samuel kyɛ, “Kyinzu koraa yeɛ ekoli Sɔɔlo nwo aworabɔlɛ maa okoodwu ɔ? Maye me sa mafi ye bo maa ye sɔ ati ɔtte Yisrael so hene ko. Fa ngoo gua wɔ towaa ne anu ná si nu kɔ. Mésoma wɔ Betlehemniɛ Yese berɛ, ofikyɛ ye mma nemɔ anu ko yeɛ me bɔbɔ maye ye kyɛ oli hene ɔ.”

1 Samuel 18:13

Yiti Sɔɔlo yele Dawide fili ye nwo, na ɔmaa ɔɔlale koɛhonɛfoɛ apee noa. Na Dawide lale koɛhonɛfoɛ nemɔ noa ɔne bɛ hɔle koɛ mɔ besa bɛwale.

1 Samuel 18:16

Nakoso Yisrael amukoraa ne Yuda amukoraa hurole Dawide dwirɛ, ofikyɛ né ye yeɛ odi bɛ nyunu ɔfa bɛ kɔ koɛ ɔ.

1 Samuel 18:5

Koɛ biala bɔ Sɔɔlo somane Dawide maa ɔɔhone ne, olili ngonim, yiti Sɔɔlo maa ɔlale koɛhonɛfoɛ nemɔ noa. Na ɛhe yɛle koɛhonɛfoɛ ne amukoraa ne Sɔɔlo somvoɛ nemɔ po fɛ.

1 Samuel 25:28

Mesrɛ wɔ ala, fa w’afaneɛ mvomsoɛ kyɛ ye. AWURADE kɔma me mene ne ye boso ama bekoli hene afebɔɔ amba, ofikyɛ AWURADE koɛ yeɛ me mene ɔko ɔ. Na edwirɛ tɛɛ biala ngɔto wɔ wɔ mmerɛ biala bɔ ɛte ase ɔ.

1 Samuel 25:30

Paa mukoraa bɔ AWURADE aha afa me mene nwo ne, sɛ ɔmaa ɔba nu, ná ɔmaa edi Yisrael so hene a,

1 Samuel 9:16

“Ɛhema, bekye sɔa ala, ngɔma biaa bie bɔ ofi Benyamin aseɛ so kɔwa wɔ berɛ, na fa ɛpopalɛ ngoo popa ye ma oli me maen Yisrael so hene. Ɔkɔpepɛ kole me maen kofi Filistifoɛ sa nu, ofikyɛ manwu amaneɛ bɔ me mmenia benwu ye ne, na bɛ suɛ adwu me nyunu.”