2 Samuel 21:1 - AHYERƐLƐ KRONGRON

¹ Mmerɛ bie, ɛhɔen piri bie wale toonn afoɛ nza wɔ Dawide aberɛ so. Dawide fa tole AWURADE nyunu, na AWURADE buale ye kyɛ, “Mogya nwo foɛlilɛ la Sɔɔlo ne ye awuro ama so, ɔnate kyɛ ohuhuni Gibeonfoɛ.”

2 Samuel 21:1 Iomraidhean Croise

Gyenesise 12:10

Afei ɛhɔen piri bie wale aseɛ ne aso. Na ɔnate kyɛ ɛhɔen ne te piri ne ati, Abram hɔle Misraim ɔɔtenane berɛ yɛle wɔfoɛ.

Gyenesise 26:1

Ɛhɔen piri bie wale aseɛ ne aso; asora ɛhɔen piri bɔ olili moa wale Abraham aberɛ so ne. Na Yisake hɔle Filisti hene Abimɛlɛke berɛ wɔ Gyeraa.

Gyenesise 41:57

Na ewiase mmenia mukoraa wale Yosef berɛ wɔ Misraim bɛɛtɔle aburoo, ofikyɛ né ɛhɔen piri ne noa yɛ se paa wɔ aseɛ ne aso nekaa biala.

Gyenesise 42:5

Yiti mmenia bɔ bɛhɔle aburoo atɔ wɔ Misraim ne, né Yisrael mma nemɔ boka so, ofikyɛ né ɛhɔen piri ne awa Kanaan aseɛ so.

Gyenesise 43:1

Ɛhɔen ne anu yɛle se maen ne anu.

2 Samuel 16:8

Sɔɔlo bɔ atu ye ali ye bia ne, ye abusuafoɛ mogya mukoraa bɔ aha agua ne, AWURADE atua wɔ so kerɛ! AWURADE ale ahennie ne wafi wɔ sa nu wama ɛwa Absalom. Abue yeɛ wabu wɔ ɔ, ofikyɛ ɛte kodiawuniɛ!”

2 Samuel 20:26

Né Yariniɛ Yira koso ɔte Dawide sɔfo.

2 Samuel 21:5

Na bebuale Nana Dawide kyɛ, “Biaa bɔ ohuhuni yɛ, bɔ ahaa ɔpena kyɛ yɛ boso nua, ná ɔye yɛ fi Yisrael aseɛ so nekaa biala ne,

2 Samuel 24:1

AWURADE ahone huli Yisrael so bieku paa, na ɔmane Dawide yɔle nikyee tiale bɛ. Osele ye kyɛ, “Kɔha Yisraelfoɛ ne Yudafoɛ.”

2 Samuel 5:19

Na Dawide bisale AWURADE kyɛ, “Mva koɛ ngɔndoa Filistifoɛ anaa? Ɛkɔfa bɛ kowura me sa anaa?” Yeɛ AWURADE buale Dawide kyɛ, “Kɔ, ngɔfa Filistifoɛ ngowura wɔ sa amba.”

2 Samuel 5:23

Dawide bisale AWURADE, na obuale kyɛ, “Nnɛkɔ wɔ nyunu tee, na mmom kakyi wɔ nwo kɔfa bɛ si. Kɔ bɛ so wɔ mmakaa bɔ bɛfrɛ ye basam ne ndendeneɛ so.

1 Ahemvo 17:1

Tisibeniɛ Elia bɔ ofi Tisibe bɔ ɔwɔ Gileade ne, osele Ahabo kyɛ, “AWURADE Yisrael Nyameɛ teasefoɛ bɔ yeɛ ngyi ye nyunu ne, kyɛbɔ ɔte ase ye de, mekã kyɛ, bosue anaa esue ngɔpe ase afoɛ ye mɔ anu, sana mafa me noa dwirɛ mama ye nwo ate koraka.”

1 Ahemvo 18:2

Yiti Elia sili nu hɔle kyɛ ɔkwaafa ye nwo kyire Ahabo. Né ɛhɔen ne noa yɛ se paa wɔ Samaria.

2 Ahemvo 6:25

Ɔnate kyɛ ɔhɔle so tuale Samaria ne ati, ɛhɔen pohonandafe bie wale kuro ne aso. Ɔnate so, né bɛfa afunum ti ko bede ɛdwetɛ sekel aburawɔtwɛ, yeɛ né bɛfa abubure ye bondua kongo bue bede ɛdwetɛ sekel nnu.

2 Ahemvo 8:1

Né Elisa ahã ahyire braa bɔ otingyele ɔwa bienzua fili ewue nu ne kyɛ, “Ɛne w’awuro ama mɔ, ɛ́mɔdwɔso, na ɛmɔtu bɛɛtena nekaa biala bɔ ɛmɔkonya ɔ; ofikyɛ AWURADE baama ɛhɔen piri ba aseɛ ye aso afoɛ nzoo.”

YOB NWOMAA NE 10:2

Ngɔhã ngohyire Nyameɛ kyɛ, ‘Nnɛbua me fɔ. Maa nwu nikyee bɔ yiti yeɛ afa wɔ dwirɛ ateta me e.

Edwein 27:8

Ahã ahyire me kyɛ, “Pena me si atee!” Na mmuale kyɛ, “AWURADE, wɔ si atee yeɛ mepena ɔ.”

Edwein 50:15

Sũ frɛ me wɔ w’amaneɛnwunɛ mmerɛ nu, na ngɔpepɛ ngole wɔ, amaa ɔnate so ahyɛ me animnyam.”

Edwein 91:15

Sɛ osũ frɛ me a, ngotie ye sufrɛ. Ngogyina ye si wɔ ye amaneɛnwunɛ nu; ngɔpepɛ ngole ye, ná mahyɛ ye animnyam.

Lewitikɔso 26:26

Ngɔma ɛhɔen kɔwa ɛmɔ aseɛ so; mmrasua buru yeɛ bɛkɔto ɛmɔ aleɛ wɔ bokyea komapɛ aso ɔ. Mmrasua nemɔ kosusu aleɛ ne mmaa mmaa bie yeɛ bɛkɔma ɛmɔ ɔ, yiti sɛ ɛmɔdi a, ɛmɔ ko ngoyi.

Numeri 27:21

Nakoso odi kyɛ ɔba ɔsɔfo Eleasa nyunu maa ɔfa Yurim so obisa AWURADE noa dwirɛ ɔma ye wɔ AWURADE nyunu. AWURADE noa dwirɛ so yeɛ odi kyɛ ɔne Yisrael maen ne amukoraa begyina bɛyɔ nikyee biala ɔ.”

Yosua 7:1

Nakoso AWURADE mmeraa bɔ ɔfa nningyein bɔ watu wasie berɛ kyɛ bɛsɛkye ye ne anwo ne, Yisraelfoɛ buli so. Akan bɔ ɔse ole Karemi, bɔ ɔse ole Sabidi, bɔ ye koso ɔse ole Sera bɔ ofi Yuda abusua kure nu ne, ɔfale nningyein bɔ AWURADE atu asie berɛ kyɛ bɛsɛkye ye ne bie, yiti AWURADE fɛle Yisraelfoɛ so yaa piri paa.

Yosua 9:20

Bɔ yɛkɔyɛ bɛ hɔ ɛhe: Yɛkɔmaa bekonya bɛ ti bekodidi nu, amaa ɔnate ndaen bɔ yata yahyire bɛ ne ati Nyameɛ amvɛ yɛ so yaa.”

Rutu 1:1

Mmerɛ bɔ né maenbulɛfoɛ yeɛ bɛla Yisraelfoɛ bɛ noa ne, ɛhɔen piri bie wale maen ne anu. Na biaa bie bɔ ofi Betlehem bɔ ɔwɔ Yuda ɔ otu ɔɔtenane Moabo aseɛ so. Ɔne ɔye ne ye mma mmienzua nyɔ yeɛ bɛhɔle ɔ.

1 Samuel 10:22

Yiti besa bebisale AWURADE kyɛ, “Sɔ sona ne, aso wamma wa bie anaa?” Na AWURADE buale kyɛ, “Ɛ́mɔnea, waafea nningyein bɔ baboaboa ye noa ne anu.”

1 Samuel 23:11

Aso Keilafoɛ kɔfa me kowura ye sa anaa? Sɔɔlo kɔwa kyɛbɔ wɔ somvoɛ ate ne ala anaa? O, AWURADE Yisrael Nyameɛ, mesrɛ wɔ ala, ka kyire wɔ somvoɛ.” Na AWURADE buale kyɛ, “Yoo, ɔkɔwa.”

1 Samuel 23:2

Na Dawide bisale AWURADE kyɛ, “Me ne Filistifoɛ hemɔ yɛɛho anaa?” Yeɛ AWURADE buale Dawide kyɛ, “Ɛne bɛ bɛɛho na de Keila kuro ne.”

1 Samuel 23:4

Dawide bisale AWURADE bieku. Na AWURADE buale ye kyɛ, “Kɔ. Kɔ Keila, na ngɔfa Filistifoɛ ngowura wɔ sa.”