2 Samuel 18:2 - AHYERƐLƐ KRONGRON

² Dawide hyɛle koɛhonɛfoɛ nemɔ nu kure nza: ɔfale ko wurale Yoabo sa, ɔfale ko wurale Yoabo aliɛma Abisae bɔ oni ole Seruya ne sa, yeɛ ɔfale ko wora wurale Gitiniɛ Yitae sa. Na Nana Dawide sele koɛhonɛfoɛ nemɔ kyɛ, “Me bɔbɔ me ne ɛmɔ yɛkɔhɔ koɛ ne.”

2 Samuel 18:2 Iomraidhean Croise

2 Samuel 17:11

Me de, métu wɔ foɛ kyɛ, ma Yisrael koɛhonɛfoɛ amukoraa, ofi Dan bɔ ɔkwaadwu Beɛ Hyeba, bɔ bɛ somaa te kyɛ mboanoa anweaa, bɛɛboa bɛ noa wɔ wɔ nyunu, ná wɔ bɔbɔ di bɛ nyunu kɔ koɛ ne.

2 Samuel 21:17

Nakoso Abisae bɔ oni ole Seruya ne, ɔpepɛ lele Dawide, na ɔhɔle Filistiniɛ ne so ohuni ye. Na ɛhe mane Dawide mmenia nemɔ tale ndaen tole ye so kyɛ, “Yɛkɔ koɛ bieku a, ɛngɔhɔ bie, anyɔ a ekonua Yisrael kanea ne.”

2 Samuel 23:18

Yoabo aliɛma Abisae bɔ oni ole Seruya ne, né ɔla koɛhonɛfoɛ ahoneserɛfoɛ aburasa nemɔ noa. Ɔhwene ye pealɛɛ ɔne mmenia ɛyaa nza bɛhone. Ohuhuni bɛ, na olele dumaa kyɛ koɛhonɛfoɛ ahoneserɛfoɛ nza nemɔ ala.

2 Samuel 8:16

Né Seruya awa Yoabo ɔte koɛhonɛfoɛ nemɔ so safohene; né Ahilude awa Yehosafate ɔte maen ne anu abakɔsɛm ahyerɛlɛniɛ;

1 Ahemvo 2:28

Mmerɛ bɔ Yoabo tele sɔ dwirɛ nen (Yoabo gyinane Adoniya si, nakoso wangyina Absalom si), Yoabo nwati hɔle AWURADE ɛtena sua ne anu, na ɔsosɔle afɔleɛ bokyea mmɛen nemɔ anu.

Edwein 3:6

Menzuro mmenia apee apee bɔ babɔ me nwo porɛ bapɛ me nwo bayia ne.

Maenbulɛfoɛ 7:16

Afei, ɔhyɛle koɛhonɛfoɛ ɛyaa nza ne anu kure nza, na ɔfale totorobɛndo wurawurale bɛ mukoraa bɛ sa nu. Osa mane ebiala kwangoa too bɔ ɛtɛen wura nu ɔ.

Maenbulɛfoɛ 7:19

Abunnamu bɔ bɛsesane kuro berɛ awɛmvoɛ nemɔ nen, Gideon ne koɛhonɛfoɛ ɛyaa ko bɔ bɛboka ye so ne, bɛwale asikyeleɛ ne tiwaa. Behuli totorobɛndo nemɔ, na bɛbobɔle kwangoa bɔ né otiratira bɛ nemɔ.

Maenbulɛfoɛ 9:43

ɔboaboale ye koɛhonɛfoɛ noa. Ɔhyɛle bɛ nu kure nza maa bɛɛtetɛle eburo dɔ. Abimɛlɛke nwuni kyɛ mmenia nemɔ fi kuro ne anu bɛba ne, ɔfale koɛ tetale bɛ huhuni bɛ.

1 Samuel 11:11

Aleɛ hyene ne, Sɔɔlo hyɛle ye lɔen ne anu kure nza. Na alebahyene, bɛhɔle Amonfoɛ asikyeleɛ ne anu, na behuhuni Amonfoɛ toonn maa oodwuli eyia ketee. Bɛ bɔ benyane bɛ ti bedidili nu ne, bɛbɔle aya, bɔ mmenia nyɔ po banga neka horɛ ɔ.