2 Samuel 18:18 - AHYERƐLƐ KRONGRON

¹⁸ Mmerɛ bɔ né Absalom te ase ne, nyɔboɛ bɔ ɔwɔ Ɛhene Bɔnza ne anu ne, ɔfa penane berɛ yɛle ye bɔbɔ ye nwo ngayeɛ, ofikyɛ ɔhane kyɛ, “Nnne baa bienzua biala bɔ ɔnate ye so bɛkɔkaye me dumaa ɔ.” Ɔfale ye dumaa tole ngayeɛ nyɔboɛ ne aso, na bɛfrɛ ye Absalom ngayeɛ maa waadwu ɛnɛ.

2 Samuel 18:18 Iomraidhean Croise

Gyenesise 11:4

Afei besele kyɛ, “Biamɔ, ɛ́mɔma yɛkyekye yɛ kuro, ná yɛsi abandenden bɔ odwu nyameɛso yɛsie so, ná yɛfa yɛle dumaa, amaa yammɔ aya wɔ aseɛ ye aso amukoraa.”

Gyenesise 11:9

Ɛhe ati yeɛ ɔmaa bɛfrɛ berɛ Babɛl, ofikyɛ AWURADE mane aseɛ so amukoraa dwudwolɛ yɛle nwunyaenn. Na ofi sɔ mmerɛ ne, AWURADE maa bɛbɔle aya wɔ aseɛ ye aso amukoraa.

Gyenesise 14:17

Mmerɛ bɔ Abram lili Kedolaoma ne ye mmango hene mɔ so ngonim na osa ba ne, Sodom hene ooyiale ye wɔ Sawe bɔnza (bɔ bɛfrɛ ye Ɛhene bɔnza) ne anu.

2 Samuel 14:27

Absalom wole mmaa mmienzua nza ne brasua ko. Brasua ne li Tamar. Ɔte brasua bɔ ye nwo yɛ nyemene ɔ.

Edwein 109:13

Ma ye boso ama bɛ boso onua, nnɛmaa bɛkaye bɛ dumaa wɔ aworɛ ndoatoasoɛ bɔ ɔtoa so ne anu.

Edwein 49:11

Ɔwɔ nu kyɛ bɛfale bɛ dumaa bɛtole b’aseɛ so de, nakoso b’asieleɛ yeɛ ɔte b’awuro afebɔɔ ɔ, na ɔte bɛ daberɛ aworɛ ndoatoasoɛ amukoraa nu.

Yesaya 22:16

Wɔ, nzikyɛ yeɛ ele ye yɔ wɔ wa ɔ? Nwa yeɛ wama wɔ sɔ tumi ne ɔ, bɔ yiti apɛ asieleɛ ato berɛ ama wɔ nwo wɔ ɛwa ɔ? Wɔ bɔ apɛ w’asieleɛ ato bokaa so, ná asa apɛ wɔ daberɛ ato nyɔbotaen nu ɔ?

Yeremia 22:30

Bɔ AWURADE kã ɛhe: “Ɛmɔhyerɛ bɛfa biaa he anwo kyɛ, ɔte ebie bɔ olle ba ɔ, biaa bɔ ongoyie ye yé wɔ mmerɛ bɔ ɔte ase, ofikyɛ ongoyie ye boso ama nu biala yé maa ɔngɔtena Dawide ahennie bia so, bɔ okosa koli hene wɔ Yuda ɔ.”

Daniel 4:30

na osele kyɛ, “Babilɔn yeɛ wayɛ piri sɔa e! Aso nna me tumi piri yeɛ mafa makyekye kuro ye maa wayɛ m’ahenguro, bɔ mefa meye m’ahennie animnyam ali ɔ?”

Numeri 32:42

Yeɛ Noba hɔle oolili Kenate ne ye nwo nguraa nemɔ so ngonim, na ɔsesane kuro ne dumaa fa tole ye nwo Noba.

1 Samuel 15:12

Samuel pɛle aleɛ dwɔsole kyɛ ɔkwaapena Sɔɔlo. Na bɛha behyirele Samuel kyɛ, “Sɔɔlo ahɔ Kamɛl, nekaa bɔ wasi ngayeɛ nikyee wafa wahyɛ ye nwo animnyam ne, na waase wapɛ nu wahɔ Gilgal.”