2 Korintofoɛ 13:4 - AHYERƐLƐ KRONGRON

⁴ Ɔwɔ nu kyɛ bɛbɔle ye mmeamudua nu wɔ mmerɛyɛlɛ nu de, nakoso ɔnate Nyameɛ tumi so ɔte ase. Yɛ koso, yɛyɛ mmerɛ wɔ ye nu, nakoso yɛnate Nyameɛ tumi so yɛne ye kɔtena ase.

2 Korintofoɛ 13:4 Iomraidhean Croise

Yohane 10:18

Ebie nne mvi me sa nu, na mmom me bɔbɔ yeɛ mefa meto berɛ ɔ. Ye nwo tumi wura me sa kyɛ mefa meto berɛ ɔ, yeɛ ye nwo tumi wura me sa kyɛ mesa mefa ye bieku ɔ; na ahyɛdeɛ he yeɛ nya mvili me Baba berɛ ɔ.”

Asomafoɛ 2:36

“Yiti ma Yisrael awuro ama mukoraa benwu ye tofee kyɛ, Yesu he bɔ ɛmɔbɔle ye mmeamudua nu ne ala yeɛ Nyameɛ ayɛ ye Awurade ɔne Kristo ne ɔ.”

Asomafoɛ 3:16

Na ɔnate ye dumaa nu, ye dumaa nu gyidie so, yeɛ wama sɔ bubuaniɛ he bɔ ɛmɔnwu ye ná ɛmɔse ye ne wanya anwoserɛ ɔ. Amba, gyidie bɔ ɔnate Yesu so yeɛ wamaa wate apɔ bɔkɔɔ wɔ ɛmɔ amukoraa bɛ nyunu wa ye.

Romanfoɛ 1:4

bɔ bafa tumi baye ye bahyire kyɛ Nyameɛ Awa, kyɛbɔ anwotelɛ Sunzum te ne, awufoɛ tingyelɛ nu, Yesu Kristo, yɛ Awurade,

Romanfoɛ 14:9

Ɛhe ati yeɛ Kristo wuli na otingyele ɔ, amaa wayɛ awufoɛ ne teasefoɛ b’Awurade.

Romanfoɛ 6:4

Yiti basie yɛ ne ye wɔ asubɔlɛ nu bahɔ ye wue nu. Ofikyɛ kyɛbɔ Baba n’animnyam tumi ne tingyele Kristo fili awufoɛ nu ne, sɔ ala yeɛ ɔsɛ kyɛ yɛnate ngoa foforɛ nu ɔ.

1 Korintofoɛ 1:25

Ɔnate kyɛ Nyameɛ nhyehyɛleɛ bɔ bebu ye ngwaseasɛm ne, nworɛ wɔ nu tra adasammaa nworɛ; yeɛ bɔ bebu ye kyɛ ɔte Nyameɛ mmerɛyɛlɛ nen, anwoserɛ wɔ nu tra adasammaa anwoserɛ.

1 Korintofoɛ 15:43

Bedua ye animguaseɛ nu, na betingye ye animnyam nu. Bedua a, né ɔyɛ mmerɛ, na betingye ye tumi nu.

1 Korintofoɛ 2:3

Na mvale anwobrɛaseɛ ne esuronyi ne anwopopolɛ yeɛ me ne ɛmɔ yɛtenane ɔ.

1 Korintofoɛ 6:14

Na Nyameɛ tingyele Awurade, na ɔnate ye tumi ne aso okotingye yɛ koso.

2 Korintofoɛ 10:10

ofikyɛ mmenia kekã kyɛ, “Ye ngrataa te anwunanwuna na nu sa yɛ se, nakoso sɛ ɔba wa a, ye noa yɛ mmerɛ, yeɛ ye noa dwirɛ koso mbɛ asue.”

2 Korintofoɛ 12:10

Na ɔnate Kristo ti, me nye gye wɔ mmerɛyɛlɛ nu, alapaa bɔ bɛbɔ me nu, anwokyere nu, ndaneanyeɛ nu, aworabɔlɛ nu; ofikyɛ sɛ meyɛ mmerɛ a, yeɛ me nwo yɛ se ɔ.

2 Korintofoɛ 13:9

Na sɛ yɛyɛ mmerɛ, na ɛmɔ de ɛmɔyɛ se a, né yɛ nye agye; na yɛ mbaeɛ ole kyɛ ɛmɔkoli mu ɔ.

Filipifoɛ 3:10

Me botaeɛ ole kyɛ ngonwu ye ne ye wutingyelɛ tumi ne, kyɛ ngonwu ye amaneɛ ne bie, kyɛ ɔkɔmaa ngɔyɛ kyɛ ye wɔ ewue nu,

Hebrifoɛ 5:7

Mmerɛ bɔ né Yesu wɔ aseɛ ye aso wa nen, ɔfale esuɛ ne ye nye moen teateane nu fale ye mbaeɛ ne nikyeesrɛlɛ tole Nyameɛ bɔ ɔkora ye ye fi ewue nu ne nyunu, na ɔnate ye nyamesuro ti Nyameɛ tiele ye.

1 Petro 3:18

Ofikyɛ Kristo koso nwuni bɔne nwo amaneɛ pɛenko; ye bɔ ɔtengyɛ ne, onwuni amaneɛ mane bɛ bɔ bɛndengyɛ ɔ, amaa ɔnate so wafa yɛ wahɔ Nyameɛ berɛ. Behuni ye wɔ anwoɔnaen nu, nakoso bɛfale ye bɛwale ngoa nu wɔ Sunzum nu,

1 Petro 3:22

Ye yeɛ ɔhɔle nyameɛso ne, na ɔte Nyameɛ sa famaa so; na abɔfo mɔ ne anwoserɛ mɔ ne tumi mɔ babrɛ bɛ nwo ase bawura ye bo.