1 Yohane 3:8 - AHYERƐLƐ KRONGRON

⁸ Ebiala bɔ ɔyɔ bɔne te abɔnzam sona, ofikyɛ ofi ahyɛaseɛ ne yeɛ abɔnzam yɔ bɔne ɔ. Na ɔnate ɛhe ati yeɛ Nyameɛ Awa ne ɔɔlale ye nwo ali kyɛ ɔbaasɛkye abɔnzam nnwumaa.

1 Yohane 3:8 Iomraidhean Croise

Gyenesise 3:15

Ngɔfa ɛpɔen ngɔto wɔ ne braa n’afia, yeɛ wɔ boso ama ne ye boso ama b’afia; ɔkɔgyerɛgyerɛ wɔ ti, na wɔ wora aha ye gya si.”

Yesaya 27:1

Sɔ kyẽa ne, AWURADE kɔfa ye ngrandɛ serɛserɛ pirikua suronyisuronyi ne kɔhwe ɛlɛngyɛen suronyisuronyi, bɔ ɔte ewoo bɔ ye nwo yɛ nyera ne ye so. Ɔte ɛlɛngyɛen suronyisuronyi bɔ ɔbenzebenze ye nu ɔ, na AWURADE kosa kohũ sasrabɔnzam bɔ ɔwɔ ɛpo nu ne.

Numeri 21:9

Yiti Mose fale kɔɔbere yɔle ewoo ne. Ɔfa sinzele mbuna so; na sɛ ewoo ka ebie ná sɔ sona ne nea kɔɔbere ewoo ne a, onya ngoa.

Mateo 12:28

Nakoso sɛ Nyameɛ Sunzum yeɛ mefa metu sunzummɔne mɔ de a, né nzaade Nyameɛ ahennie ne anya awa ɛmɔ so.

Mateo 13:38

eboo ne ole ewiase, na mmakaammaa paa ne ole ahennie ne mma; yeɛ ngyɛngyɛma ne ole bɔnefoɛ ne mma.

Mateo 4:3

Na bɔ oso mmenia nea ne wale ye berɛ oosele ye kyɛ, “Sɛ wɔ ole Nyameɛ Awa ne a, hyɛ nyɔboɛ hemɔ ma paanoo.”

Marko 1:24

“Yesu Nasarɛteniɛ, nzikyɛ yeɛ yɛne wɔ le yɔ ɔ? Awa kyɛ ɛbaasɛkye yɛ hɔ ɔ? Mese wɔ sona sue, Nyameɛ ye Krongronniɛ ne.”

Luka 10:18

Na osele bɛ kyɛ, “Nwuni Satan kyɛ ofi nyameɛso waatɔ ase kyɛ agralaa ɔ.

Yohane 12:31

Afei ewiase ndɛenbualɛ ne wadwu; bɔ odi wiase he aso ne, bekye yeɛ bɛbaaye ye befi berɛ ɔ.

Yohane 16:11

ndɛenbualɛ nwo, ofikyɛ Nyameɛ abua bɔ odi wiase he aso ne ndɛen dada.

Yohane 8:44

Ɛmɔ de, ɛmɔ baba bɔ ɛmɔfi ye nu ole abɔnzam, na ɛmɔ baba n’apɛdeɛ yeɛ ɛmɔkuro kyɛ ɛmɔyɔ ɔ. Ɔte wudiniɛ fi ahyɛaseɛ ne; na ollili nahorɛ le, ɔnate kyɛ nahorɛ biala nne ye nu. Sɛ ɔkã ngondombo dwirɛ a, kyɛbɔ ye sue te ne ala yeɛ ɔkã ɔ, ofikyɛ ɔte ngondomboniɛ ne ngondombo baba.

Romanfoɛ 16:20

Na ɔngɔhyɛ koraa asomdwee Nyameɛ ne kɔbɛtɛ Abɔnzam wɔ ɛmɔ gya bo. Y’Awurade Yesu Kristo ɔlo ɛmɔ.

Ɛfesofoɛ 2:2

bɔ daa ne, ɛmɔbɔle ɛmɔ bra kyɛbɔ wiase brabɔlɛ te ɔ, bɔ ɛmɔlili ewienu tumi panyi ne si, bɔ ɔte sunzum bɔ kekesaala ye odi dwumaa wɔ asoserɛfoɛ nu ne.

Kolosefoɛ 2:15

Olele mbanyililɛ ne tumililɛ bɛ sa nu tumi, na ɔlale bɛ ali pefee wɔ badwa nu, na olili bɛ so ngonim wɔ mmeamudua ne aso.

1 Timoteo 3:16

Aporowaa biala nne ye nwo kyɛ nyamesom nu mvealeɛ nu dwirɛ ne ɔte piri: Nyameɛ lale ye nwo ali anwoɔnaen nu, olili be wɔ Sunzum nu; abɔfo mɔ nwuni ye, bɛbɔle ye nwo dawure wɔ maen maen nu; belele ye belili wɔ wiase, na bɛfale ye bɛhɔle nyameɛso animnyam nu.

Hebrifoɛ 2:14

Na ɔnate kyɛ mmaa nemɔ te anwoɔnaen ne mogya ne ati, Yesu bɔbɔ yɛle ye nwo kyɛ bɛ ala, ɔfale sɔ sona sue ne bie, amaa ɔnate ye wue ne aso wasɛkye abɔnzam bɔ ye yeɛ ole ewue so tumi ne;

Hebrifoɛ 9:26

Na sɛ ɔtte sɔ de a, ahaa ɔsɛ kyɛ Kristo taa nwu amaneɛ fite kyɛ Ɛdangama bɔle aleɛ ɔ. Nakoso waye ye nwo ali komapɛ wɔ mmerɛ bɔ ewiase kɔ ye ayieleɛ ye, na wafa ye bɔbɔ ye nwo wabɔ afɔleɛ wakyikyi bɔne.

2 Petro 2:4

Na sɛ Nyameɛ amva abɔfo mɔ bɔ bɛyɔle bɔne ne nwo wangyɛ bɛ, ná mmom ogyili bɛ guale ɛborɔ kumaa kuronguronn awosii kabii nu, ná ɔbɔle bɛ panwu kyɛ ɔfa nwondɛ ndɛenbualɛ ne a;

1 Yohane 1:2

sɔ ngoa ne yele ye nwo ali, na yanwu ye, yɛdi ye nwo adanzeɛ, na daa ngoa bɔ né ɔne Baba ne wɔ berɛ na afei bɛyele ye ali behyirele yɛ ne yeɛ yɛbɔ ye nwo dawure yɛkyire ɛmɔ ye.

1 Yohane 3:10

Na ɛhe yeɛ ɔmaa yɛnwu nzonzoleɛ bɔ ɔla abɔnzam ne Nyameɛ mma b’afia ɔ: ebiala bɔ ɔyɔ bɔ ɔndengyɛ anaa bɔ onguro oliɛma dwirɛ ne, ɔtte Nyameɛ awa.

1 Yohane 3:5

Ɛmɔse kyɛ ɔwale kyɛ ɔbaasoa yɛ bɔne kɔ; na ye de bɔne nne ye nwo.

1 Yohane 5:19

Yɛse kyɛ yɛte Nyameɛ deɛ, yeɛ ewiase amukoraa wura bɔnefoɛ ne bo.

Yuda 1:6

Na abɔfo mɔ bɔ bannea bɛ dibea so yé, ná mmom bɛyakyili bɛ bɔbɔ b’atenaleɛ berɛ ne, wabɔ bɛ afebɔɔ panwu wafa bɛ wasie awosii kabii nu, na ɔfa nwondɛ kyẽa piri ndɛenbualɛ ne.

Nyekyire 20:10

Na abɔnzam bɔ ɔlakalakale bɛ ne de, befindini ye bɛtole see ne sɔfe abura ne anu, nekaa bɔ kaka ne ne ngɔmhyɛlɛniɛ ngondomboniɛ ne bɛwɔ ne, na bɛkɔfa bɛ bɛkɔfa yealɛ nu alehyeleɛ ne alesaleɛ nu afebɔɔ.

Nyekyire 20:15

Na ebiala bɔ bannwu kyɛ bahyerɛ ye dumaa wɔ ngoa nwomaa ne anu ne, begyili ye bɛtole see abura ne anu.