1 Yohane 2:25 - AHYERƐLƐ KRONGRON

²⁵ Na bɔ wafa wahyɛ yɛ bɔ ole daa ngoa.

1 Yohane 2:25 Iomraidhean Croise

Daniel 12:2

Na bɛ bɔ balela wɔ aseɛnwo nnɛterɛ nu ne, bɛ nu pee kotingye, ebiemɔ kɔhɔ daa ngoa nu, yeɛ ebiemɔ wora bɛkɔhɔ animguaseɛ ne nyanzoen bɔ olle ayieleɛ ɔ nu.

Luka 18:30

bɔ ongonya ye mmɔhoɛ pee sɔ mmerɛ ye anu, ɔne daa ngoa wɔ wiase bɔ ɔbaawa ne anu ɔ.”

Yohane 10:28

Mema bɛ daa ngoa, na bengomini le; na ebiala ngofoti bɛ ngofi me sa nu.

Yohane 12:50

Na mese kyɛ ye ahyɛdeɛ te daa ngoa. Yiti edwirɛ bɔ mekã ne, kyɛbɔ Baba ne ahã ahyire me ne, sɔ ala yeɛ mekã ɔ.”

Yohane 3:15

amaa ɔnate so ebiala bɔ okole ye koli ne wanya daa ngoa.

Yohane 5:39

Ɛmɔpɛnzɛpɛnzɛ Ahyerɛlɛ ne anu, ofikyɛ ɛmɔdwene kyɛ ɛmɔle daa ngoa wɔ nu; na ye ala yeɛ odi me nwo adanzeɛ ɔ.

Yohane 6:27

Nnɛma ɛmɔyɔ aleɛ bɔ ɔsɛkye ɔ nwo adwuma, na mmom ɛ́mɔyɔ aleɛ bɔ ɔtena berɛ kɔ daa ngoa nu, bɔ Sona Awa ne kɔfa kɔma ɛmɔ ne nwo adwuma; ofikyɛ ye yeɛ Baba Nyameɛ wale ye wato nu wama ye tumi ɔ.”

Yohane 6:40

Ɛhe ole me Baba n’apɛdeɛ, kyɛ ebiala bɔ onwu Baa ne, ná ode ye di ne, okonya daa ngoa; na ngotingye ye wɔ ayieleɛ kyẽa ne.”

Yohane 6:47

Nahorɛ nu paa, mekã mekyire ɛmɔ kyɛ, ebiala bɔ ode di ne, ole daa ngoa.

Yohane 6:54

Na ebiala bɔ odi me nwonaen ná ɔno me mogya nen, ole daa ngoa, na ngotingye ye wɔ ayieleɛ kyẽa ne.

Yohane 6:68

Na Simɔn Petro buale ye kyɛ, “Awurade, nwa berɛ yeɛ yɛkɔhɔ ɔ? Wɔ yeɛ ele daa ngoa dwirɛ ɔ;

Romanfoɛ 2:7

Bɛ bɔ bemia bɛ nye bɛyɔ paa, na bɛpena animnyam, anidie ne daa ngoa nen, bɛ yeɛ Nyameɛ kɔma bɛ daa ngoa ɔ.

Romanfoɛ 5:21

Na kyɛbɔ bɔne nate ewue nu lili hene nen, sɔ ala yeɛ Nyameɛ adom koso kɔnate tenenee nu koli hene ɔ, na ɔkɔfa y’Awurade Yesu Kristo so kɔfa yɛ kɔhɔ daa ngoa nu.

Romanfoɛ 6:23

Ofikyɛ bɔne akatuaa ole ewue; na Nyameɛ adom akyɛdeɛ ole daa ngoa wɔ y’Awurade Yesu Kristo nu.

Galatiafoɛ 6:8

Na bɔ sona biala dua ye wɔ anwoɔnaen akɔnnɔ nu ne, okonya ewue kofi anwoɔnaen nu; nakoso bɔ odua ye wɔ Sunzum nu ne, okonya daa ngoa kofi Sunzum nu.

1 Timoteo 1:16

Nakoso ɛhe ati yeɛ onwuni me anwunvoin ɔ, kyɛ me bɔ nni moa ne anu, Yesu Kristo kɔla ye aboterɛ amukoraa ali maa ɔkɔyɛ nhwɛsoɛ kɔma bɛ bɔ bekole ye bekoli bɛkɔhɔ daa ngoa nu ne.

1 Timoteo 6:12

Ko gyidie koɛ paa ne; sɔ daa ngoa bɔ bɛfrɛle wɔ bɛwale nu, bɔ ɛpakyele nu hane ye yé wɔ adanzefoɛ pee bɛ nyunu ne anu.

1 Timoteo 6:19

ná bɛ́fa bɛ́to fapem paa besie berɛ bɛma bɛ nwo kyẽa bie; amaa ɔnate so bɛ sa ahã daa ngoa ne.

Tito 1:2

daa ngoa nwo anyelasoɛ nu, ngoa bɔ Ɛdangama Nyameɛ bɔ ɔmbɛ ngondombo ne ɔfa hyɛle bɔ koraka yeɛ ɔbɔ aleɛ ɔ;

Tito 3:7

amaa ɔnate ye adom so wabua yɛ be, bɔ ɔkɔma yɛ sa kɔhã daa ngoa nwo anyelasoɛ ne ɔ.

1 Yohane 1:2

sɔ ngoa ne yele ye nwo ali, na yanwu ye, yɛdi ye nwo adanzeɛ, na daa ngoa bɔ né ɔne Baba ne wɔ berɛ na afei bɛyele ye ali behyirele yɛ ne yeɛ yɛbɔ ye nwo dawure yɛkyire ɛmɔ ye.

1 Yohane 5:20

Yɛsa yɛse kyɛ Nyameɛ Awa ne awa, na wabukye y’adwene nu maa yanwu nahorɛniɛ ne. Yɛne Ɔwa Yesu Kristo bɔ ɔte nahorɛniɛ ne atira abiɛngoɛ, na ye yeɛ ɔte nahorɛ Nyameɛ ne ɔne daa ngoa ne ɔ.

Yuda 1:21

Ɛmɔhɔ so bɛtena Nyameɛ ɔdɔ nu, ná ɛ́mɔnwondɛ y’Awurade Yesu Kristo anwumvoinnwunɛ ne bɛhɔ daa ngoa nu.