1 Samuel 5:8 - AHYERƐLƐ KRONGRON

⁸ Yiti bɛsomane maa bɛɛfrɛfrɛle Filisti ahemvo amukoraa maa beyiale, na bebisale bɛ kyɛ, “Yisrael Nyameɛ apam alaka ne, yɛ́yɛ ye sɛ koraa?” Na bebuale kyɛ, “Ɔsɛ kyɛ yɛye Yisrael Nyameɛ apam alaka ne yɛfi wa yɛkɔ Gate.” Yiti bɛyele Yisrael Nyameɛ apam alaka ne befili berɛ bɛhɔle Gate.

1 Samuel 5:8 Iomraidhean Croise

1 Aberɛso Dwirɛ 7:21

Sabade, bɔ ɔwole Sutela ne. Efraim mma mmienzua bieku mɔ ole Esere ne Eleade. Na Gatefoɛ bɔ bɛwole bɛ wɔ aseɛ ne aso ne, behuni bɛ munyɔ, ofikyɛ bɛhɔle Gatefoɛ nemɔ dɔ bɛɛbɔle bɛ nyɛmmoa mɔ so apaa.

Amose 6:2

Ɛ́mɔpɛ nu bɛhɔ Kalene bɛɛnea, na ɛmɔfi berɛ a, ɛmɔhɔ kuro piri Hamate; afei ɛ́mɔtoro bɛhɔ Filistifoɛ kuro Gate. Aso bɛte paa bɛtra sɔ ahennie hemɔ? Anaa b’aseɛ te piri tra ɛmɔ aseɛ anaa?

Sakaria 12:3

Na sɔ kyẽa ne, ngɔfa Yerusalem ngɔyɛ nyɔboɛ nonɛnonɛ ngɔma maen maen amukoraa, ebiala bɔ ɔkɔpagya ye ne, okopura piri paa, ɔwɔ nu kyɛ aseɛ so maen maen amukoraa bɛkɔboa bɛ noa bekodwɔso bekotia ye de.

Yosua 13:3

fite asue Sihɔ bɔ ɔwɔ Misraim eyia afiteleɛ bɔ ɔkwaadwu Ekron ɛwɛen so wɔ ye sorɔ dɔ ne. Ye mukoraa te Kanaan aseɛ. Filistifoɛ ahemvo nnu yeɛ bɛwɔ berɛ ɔ. Bɛwɔ Gasa, Asedɔde, Asekelɔn, Gate ne Ekron, yeɛ Awimfoɛ koso bɔ bɛwɔ ngwaen dɔ ne.

Yosua 15:11

Ɛwɛen ne kɔ Ekron sorɔ dɔ bokaa ne ndoroleɛ nu. Afei ɔkondo kɔ Sikeron, ɔpɛ nu kɔ Baala bokaa ne aso kodwu Yabeneel, na afei ye noa kɔpem ɛpo ne.

1 Samuel 17:4

Na bienzua kwabranoa bie fili Filistifoɛ asikyeleɛ ne anu oogyinane anyunu. Oli Goliate, ofi Gate, na ye tendenn te agyirɛ ngona ne bɛ sa mmɛseka ko.

1 Samuel 17:52

Yeɛ Yisrael koɛhonɛfoɛ ne Yuda koɛhonɛfoɛ hyɛle ye bo bɛbɔle ese, na bɛfoane Filistifoɛ toonn bedwuli Gate ne Ekron pambim nemɔ. Filistifoɛ bɔ bepurapurale ne, bɛtotɔle atee so fili Saaraim toonn beedwuli Gate ne Ekron.

1 Samuel 29:6

Afei Akise frɛle Dawide sele ye kyɛ, “Kyɛ AWURADE te ase ye, edi nahorɛ. Ɔhale me ngome a, ahaa ɛne me yeɛ yɛkɔhɔ koɛ ne ɔ; ofikyɛ, ofi kyẽa bɔ ɛɛfale wɔ nwo bɔle me bɔ ɔbaadwu ɛnɛ ɔ, nnwuni wɔ nwo dwirɛ tɛɛ biala. Nakoso ahemvo ngaa nemɔ bɛmbene so kyɛ ɛne yɛ kɔhɔ ɔ.

1 Samuel 5:11

Yeɛ bɛsomane maa bɛɛfrɛfrɛle Filisti ahemvo amukoraa maa beyiale, na besele bɛ kyɛ, “Ɛ́mɔye Yisrael Nyameɛ apam alaka ne béfi wa besa bɛɛfa besie ye boso, ná wangukũ yɛ ne yɛ kuro ama.” Ofikyɛ né ewue nwo ahunundetelɛ atɔ kuro ne aso amukoraa. Né Nyameɛ ama ɛhawo piri paa awa berɛ.

1 Samuel 5:7

Na Asedɔdefoɛ nwuni kyɛbɔ nningyein si sisi nen, bɛhane kyɛ, “Ɔnzɛ kyɛ yɛma Yisrael Nyameɛ apam alaka ne ɔka yɛ wa, ofikyɛ watua yɛ ne yɛ nyameɛ Dagɔn so kerɛ piri paa.”

1 Samuel 6:2

Afei Filistifoɛ tole asaa bɛfrɛfrɛle b’ahɔmeɛ ne bɛ musueyelɛfoɛ, na bebisale bɛ kyɛ, “AWURADE alaka ne, yɛ́yɛ ye sɛ? Nikye horɛ bɔ ɔsɛ kyɛ yɛfa yɛboka so ná yafa yaasie ye boso ne, ɛmɔhã behyire yɛ.”