1 Samuel 4:3 - AHYERƐLƐ KRONGRON

³ Na mmerɛ bɔ Yisrael koɛhonɛfoɛ nemɔ sa wale b’asikyeleɛ ne anu ne, bɛ mbanyi mɔ bisale kyɛ, “Nzu ati yeɛ AWURADE amaa ɛnɛ yali ngoguo wɔ Filistifoɛ nyunu ye? Ɛ́mɔma yɛɛfa AWURADE apam alaka ne yɛfi Silo yɛbra, ná ɔɔtena yɛ nu ole yɛ fi yɛ pɔfoɛ mɔ sa nu.”

1 Samuel 4:3 Iomraidhean Croise

2 Samuel 15:25

Na Nana Dawide sele Sadoke kyɛ, “Fa Nyameɛ alaka ne sa kɔ kuro ne anu. Sɛ ebiaa AWURADE nwu me anwumvoin a, ɔkɔmaa ngosa ngɔwa ngoonwu alaka ne, ɔne nekaa bɔ ogyi ɔ.

1 Aberɛso Dwirɛ 17:1

Afei Nana Dawide tenane ye awuro asomdwee nu ne, osele ngɔmhyɛlɛniɛ Natan kyɛ, “Nde awuro bɔ bafa sida basi ɔ nu, nakoso AWURADE apam alaka ne de, ogyi ɛtena sua nu.”

Edwein 74:1

Ao Nyameɛ, nzu ati yeɛ apo yɛ afebɔɔ ye? Wɔ bɔbɔ wɔ mmoaen bɔ ɛma bɛ aleɛ ne, nzu ati yeɛ afɛ yɛ so yaa kandinga ye?

Edwein 74:11

Nzu ati yeɛ ahwe w’anwoserɛ asaa ne asa ye? Nzu ati yeɛ afa wɔ sa ne agua wɔ hue so ye?

Yesaya 50:1

AWURADE nwa nyoo: “Ɛmɔ maame agyaayiralɛ krataa bɔ mva nyirale ye ne, ɔwɔ nisua? Anaa, nwa yeɛ mema ye kerɛ bɔ yiti mayɛ ɛmɔ atɔen mama ye ɔ? Ɛ́mɔtie, ɛmɔ amumuyɛɛ ti yeɛ nyɛle ɛmɔ atɔen ɔ, ɛmɔ mmeraatolɛ ti yeɛ nyirale ɛmɔ maame ɔ.

Yesaya 58:3

Bɛnwa: ‘Nzu ati yeɛ yayɛ akɔngyere bɔ ennwu ye ɔ? Nzu ati yeɛ yabrɛ yɛ kra ase bɔ ɛnze ɔ?’ Ɛ́mɔtie, sɛ ɛmɔyɛ akɔngyere a, bɔ ɛmɔ bɔbɔ ɛmɔkuro yeɛ ɛmɔyɔ ɔ, na ɛmɔhyɛ ɛmɔ adwumayɔlɛfoɛ amukoraa so.

Yesaya 59:1

Ɛ́mɔtie! AWURADE sa ɔtte tika bɔ ɔngora mbepɛ nnne ɔ, yeɛ ye so anu ɔnyɛ se bɔ ɔnde dwirɛ ɔ;

Yesaya 59:2

na mmom ɛmɔ amumuyɛɛ yeɛ watete ɛmɔ ne ɛmɔ Nyameɛ b’afia ɔ, na ɛmɔ bɔne ne amaa waye ye nye wato buro wafea ɛmɔ, bɔ ɔnate so ɔndɛ ɛmɔ so ɔ.

Yeremia 3:16

Na ɔkɔwa kyɛ, sɛ ɛmɔta pee ná ɛmɔsone wɔ aseɛ ne aso sɔ mmerɛ ne anu a, ye de bɛngɔhɔ so bɛngɔhã kyɛ, ‘AWURADE apam alaka ne.’ Ɔngɔwa bɛ ti anu, bɛngɔkaye, bɛngɔdwenedwene ye nwo, yeɛ bɛngɔyɛ ye foforɛ ko, AWURADE noa dwirɛ ɛne.

Yeremia 7:4

Nnɛma ɛ́mɔfa ɛmɔ wora bewura ngondombo dwirɛ hemɔ anu: ‘AWURADE asɔneyɛɛ sua ne, AWURADE asɔneyɛɛ sua ne, AWURADE asɔneyɛɛ sua ne ɛhe.’

Numeri 10:33

Yiti besili nu befili AWURADE bokaa ne aso bɛpɛle atee bɔ bɛfa ɛlɛsa yeɛ bɛpɛ ɔ. Né AWURADE apam alaka ne li bɛ nyunu wɔ sɔ ɛlɛsa ateetulɛ ne anu kyɛ ɔkwaapena nekaa maa bɛkyekye asikyeleɛ.

Numeri 10:35

Mmerɛ biala bɔ alaka ne kotu ye bo ne, Mose ka kyɛ, “O AWURADE dwɔso, ná ma wɔ pɔfoɛ mɔ bɛbɔ aya, ná ma bɛ bɔ bekyi wɔ ɔ bɛnwati befi wɔ nyunu.”

Numeri 31:6

Mose somane bɛ maa bɛhɔle koɛ ne; abusua kure biala anu mmenia apee ko. Né ɔsɔfo Eleasa awa Finehase boka bɛ so. Né ye yeɛ otira nekaa krongron berɛ ndalie nemɔ ɔne totorobɛndo mɔ bɔ bɛfa bɛbɔ ese ne ɔ.

Deuteronomi 29:24

bɛ ne maen maen mukoraati kɔha kyɛ, ‘Nzu ati yeɛ AWURADE ayɛ aseɛ ye sɔa ye? Nzikyɛ yeɛ ɔmane sɔ ɛyaa piri he wale ye?’

Deuteronomi 31:26

“Ɛ́mɔle mmeraa nwomaa he, ná ɛ́mɔfa bɛ́to AWURADE ɛmɔ Nyameɛ apam alaka ne anwo. Maa ɔla berɛ oli adanzeɛ tia wɔ.

2 Timoteo 3:5

bɛkɔyɛ bɛ nwo kyɛ basɔ nyamesom paa ne anu, nakoso bɛpo tumi bɔ ɔwɔ nu ne. Twe wɔ nwo fi sɔ mmenia nemɔ nwo.

Hebrifoɛ 9:4

Né sɔ nningyein hemɔ wɔ nu: esikaa kɔkorɛ afɔleɛ bokyea bɔ bɛyera ɛyɛɛ so, apam alaka bɔ bafa sikaa kɔkorɛ baboro ye nwo amu ɔ, sikaa kɔkorɛ kutusi bɔ mana wɔ nu ɔ, Aarɔn pɔmaa bɔ ɔfefɛle ne, ɔne nyɔboɛ nyɔ bɔ bahyerɛ apam ne bagua so ne.

Yosua 4:7

ɛmɔhã behyire bɛ kyɛ, Yɔɔdan nu nzue pɛle wɔ AWURADE apam alaka ne nyunu. Mmerɛ bɔ né apam alaka ne ɔ́pɛ asue Yɔɔdan nen, Yɔɔdan nu nzue pɛle. Yiti sɔ nyɔboɛ hemɔ te ngayeɛ afebɔɔ ma Yisraelfoɛ.”

Yosua 6:6

Yiti Nun awa Yosua frɛfrɛle asɔfo nemɔ, na osele bɛ kyɛ, “Ɛ́mɔsoa apam alaka ne, ná ɛ́mɔma asɔfo nzoo bétiratira boaen mmɛen totorobɛndo nzoo beli AWURADE alaka ne nyunu moa.”

Yosua 7:7

Na Yosua sele kyɛ, “O, AWURADE Nyameɛ! Nzu ati koraa yeɛ ɛfale maen he pɛle asue Yɔɔdan ɔ, kyɛ ɛbaafa yɛ wura Amorifoɛ sa maa bekuku yɛ ɔ? Sɛ né yɛse po a, ahaa yɛhale Yɔɔdan si dɔ!

Yosua 7:8

Mesrɛ wɔ ala, AWURADE, afei bɔ Yisrael wanwati wafi ye pɔfoɛ mɔ nyunu ye, nzikyɛ dwirɛ koraa yeɛ nga ɔ?

1 Petro 3:21

Na sɔ nzue ne sɛso, ye ole asubɔlɛ bɔ ode ɛmɔ koso ɛmɔ ngoa ɛnɛ ne. Ɔtte anwoɔnaen nu fiɛ nwunzinɛ, na mmom ɔte tiboa paa nwo abisadeɛ bɔ yɛfa Yesu Kristo wutingyelɛ ne aso yɛfa yɛto Nyameɛ nyunu ɔ.

Yuda 1:5

Ɔwɔ nu kyɛ ɛmɔse ɛhemɔ dada de, nakoso mepena kyɛ mebɔ ɛmɔ so, kyɛ Awurade bɔ olele maen ne fili Misraim aseɛ so ne, nziɛ ye, ohuhuni bɛ bɔ banne banni ne.

1 Samuel 1:24

Ɔpɛle akwadaa ne nyɔfone nen, ɔne ye bɛhɔle AWURADE awuro wɔ Silo, ɔwɔ nu kyɛ né akwadaa ne onnyini. Ɔfale ɛhemɔ koso bokale so: nandwie nyii bɔ wali afoɛ nza ɔ, esam graa ko, yeɛ bobe nzaa kɔndoa ko.

1 Samuel 14:18

Yeɛ Sɔɔlo sele Ahiya kyɛ, “Fa Nyameɛ alaka ne bra.” Ofikyɛ sɔ mmerɛ ne, né Nyameɛ alaka ne wɔ Yisraelfoɛ berɛ.

1 Samuel 4:2

Filistifoɛ beegyinagyinane koɛ noa, na bɛwale Yisrael so. Koɛ ne anu yɛle se, na Filistifoɛ lili Yisrael so ngonim. Behuhuni Yisraelfoɛ mmienzua kɔyɛ apee nna wɔ koɛ ne anu.