1 Samuel 29:3 - AHYERƐLƐ KRONGRON

³ Yeɛ Filistifoɛ safohene nemɔ bisale kyɛ, “Hebrifoɛ hemɔ koso, b’amaneɛ wa?” Na Akise buale Filistifoɛ safohene nemɔ kyɛ, “Dawide ɛne. Yisrael hene Sɔɔlo ye somvoɛ bɔ waatena me wa kɔbo afoɛ ko ne, ye ɛne. Ofi mmerɛ bɔ ɔnwatili ɔɔfale ye nwo bɔle me ɔ, nnwuni ye nwo dwirɛ tɛɛ biala.”

1 Samuel 29:3 Iomraidhean Croise

Gyenesise 14:13

Ebie nwatili fili koɛ ne anoa, na ɔɔbɔle Hebriniɛ Abram amaneɛ. Né Abram te pingye Amoriniɛ Mamre eluii mmakaa ne. Né Mamre aliɛma mɔ Ɛseko ne Anere bɛte Abram koɛ nu bokafoɛ.

1 Aberɛso Dwirɛ 12:19

Mmerɛ bɔ Dawide ne Filistifoɛ bɛfale koɛ bɛɛtoale Sɔɔlo ne, Manase koɛhonɛfoɛ nemɔ bie nwati fili Yisrael koɛhonɛ kure ne anu bɛɛbokale Dawide so. (Nakoso Dawide wammoka Filistifoɛ nemɔ, ofikyɛ Filisti mbanyi dwenene ye nwo bɛfoane Dawide. Bɛnwa, “Sɛ Dawide yakyi yɛ nu kodi ye mene Sɔɔlo si a, ɔkɔmaa yɛkɔfa yɛ ngoa yɛkɔpɛ so.”)

1 Aberɛso Dwirɛ 12:20

Na osili nu kyɛ ɔkɔ Siklage ne, Manasefoɛ hemɔ nwatili bɛɛbokale ye so: Adena, Yosabade, Yediayɛl, Mikayɛl, Yosabade, Elihu ne Siletae, na bɛ yeɛ né bɛlela koɛhonɛfoɛ apee nemɔ anoa ɔ.

Daniel 6:5

Na sɔ mmenia nemɔ sele kyɛ, “Sɔ Daniel he, yɛngonya ye nwo dwirɛ tɛɛ biala ngɔfa ngɔbɔ ye kwaadu, sana ye Nyameɛ mmeraa nwo yeɛ yɛkonya bie ɔ.”

Yohane 19:6

Na asɔfo mbanyi nemɔ ne awɛmvoɛ nemɔ benwuni ye ne, bɛteateane nu kyɛ, “Bɔ ye mmeamudua nu! Bɔ ye mmeamudua nu!” Na Pilato sele bɛ kyɛ, “Ɛmɔ bɔbɔ bɛfa ye bɛɛbɔ ye mmeamudua nu! Ofikyɛ me de, mennwu kyɛ odi fɔ biala ɔ.”

Romanfoɛ 12:17

Nnɛma ɛmɔfa bɔne betua ebiala bɔne kerɛ. Na mmom ɛ́mɔdwene bɔ ɔte paa wɔ mmenia mukoraa bɛ nye so ɔ nwo.

1 Petro 3:16

Ɛ́mɔma ɛmɔ tiboa obua ɛmɔ be, amaa sɛ bɛto ɛmɔ soen a, bɛ bɔ bɛkekã ɛmɔ Kristo nu bra paa ne nwo dwirɛ tɛɛ ne, bɛ nyunu agua ase.

1 Samuel 14:11

Yiti bɛ munyɔ bɛmane Filistifoɛ koɛhonɛfoɛ nemɔ nwuni bɛ. Na Filistifoɛ sele kyɛ, “Ɛ́mɔnea, Hebrifoɛ befi ngumaa bɔ baafeafea nu nemɔ anu béfitefite.”

1 Samuel 25:28

Mesrɛ wɔ ala, fa w’afaneɛ mvomsoɛ kyɛ ye. AWURADE kɔma me mene ne ye boso ama bekoli hene afebɔɔ amba, ofikyɛ AWURADE koɛ yeɛ me mene ɔko ɔ. Na edwirɛ tɛɛ biala ngɔto wɔ wɔ mmerɛ biala bɔ ɛte ase ɔ.

1 Samuel 27:1

Dawide hane ye wɔ ye ti anu kyɛ, “Annea a, ɛlɛho Sɔɔlo konya me kohũ me. Bɔ ɔsɛ kyɛ meyɔ ala ole kyɛ ngɔnwati ngɔhɔ Filistifoɛ aseɛ so. Ɔba ye sɔ a, Sɔɔlo kɔpa aba, bɔ ɔngɔpena me ko wɔ Yisrael aseɛ so ɔ, na ngɔnwati ngofi ye sa nu.”

1 Samuel 27:7

Dawide lili afoɛ ko ne bosome nna wɔ Filistifoɛ maen ne anu.

1 Samuel 29:6

Afei Akise frɛle Dawide sele ye kyɛ, “Kyɛ AWURADE te ase ye, edi nahorɛ. Ɔhale me ngome a, ahaa ɛne me yeɛ yɛkɔhɔ koɛ ne ɔ; ofikyɛ, ofi kyẽa bɔ ɛɛfale wɔ nwo bɔle me bɔ ɔbaadwu ɛnɛ ɔ, nnwuni wɔ nwo dwirɛ tɛɛ biala. Nakoso ahemvo ngaa nemɔ bɛmbene so kyɛ ɛne yɛ kɔhɔ ɔ.

1 Samuel 4:6

Filistifoɛ tele esebɔlɛ nen, bɛhane kyɛ, “Esebɔlɛ bɔ ɔ́kɔ so wɔ Hebrifoɛ asikyeleɛ ye anu ye, ye bo ole sɛɛ?” Na Filistifoɛ tele kyɛ AWURADE alaka ne waadwu asikyeleɛ ne anu ne,