1 Samuel 15:11 - AHYERƐLƐ KRONGRON

¹¹ “Ɔyɛ me yea kyɛ mvale Sɔɔlo nzili hene ɔ, ofikyɛ wayakyi me si lilɛ, na onni me mmeraa so.” Sɔ dwirɛ ne hale Samuel, na osũ frɛle AWURADE kɔngɔen ne amukoraa.

1 Samuel 15:11 Iomraidhean Croise

Gyenesise 6:6

Na AWURADE nuni ye nwo kyɛ wayɔ sona wato aseɛ ye aso ɔ, na ɔyɛle ye yea soma.

Gyenesise 6:7

Yiti AWURADE hane kyɛ, “Ngonua kuro sona bɔ mabɔ ye ne boso ngofi aseɛ ye aso: mmenia ne ngaka mbiri ne ngaka bɔ bɛtwe bɛ nwo ase ne ewienu nnomaa, ofikyɛ manu me nwo kyɛ nyɔle bɛ ɔ.”

2 Samuel 24:16

Na mmerɛ bɔ abɔfo ne tengyɛle ye sa Yerusalem so kyɛ ɔsɛkye kuro ne nen, AWURADE adwene sesane wɔ mmenia hunɛ ne anwo, na osele abɔfo bɔ ogu so oku mmenia ne kyɛ, “Wayɛ yee, yakyi.” Sɔ mmerɛ ne, né AWURADE abɔfo ne adwu Yebusiniɛ Arayuna ye nekaa bɔ bɛboro aburoo ne.

1 Ahemvo 11:9

Na AWURADE fɛle Solomon so yaa, ofikyɛ ɔyakyili AWURADE Yisrael Nyameɛ si lilɛ. AWURADE yeɛ ɔyele ye nwo ali hyirele Solomon pɛen nyɔ,

1 Aberɛso Dwirɛ 10:13

Ɔnate Sɔɔlo asoserɛ ti owuli. Wanni nahorɛ wamma AWURADE, ɔnate kyɛ wanni AWURADE dwirɛ so. Afei koso, ɔhɔle nzamangɔmhyɛlɛniɛ berɛ abisa,

1 Aberɛso Dwirɛ 21:15

Na Nyameɛ somane abɔfo maa ɔhɔle Yerusalem kyɛ ɔɔbɔ kuro ne. Na mmerɛ bɔ abɔfo ne yɛle kyɛ ɔbɔ kuro ne nen, AWURADE neane, na ɔsesane ye adwene wɔ kuro ne bɔlɛ ne anwo, na osele abɔfo bɔ ogu so ɔbɔ kuro ne kyɛ, “Wayɛ yé! Yakyi.” Sɔ mmerɛ ne, né AWURADE abɔfo ne ogyi Yebusiniɛ Ɔnan ye nekaa bɔ bɛboro aburoo ne.

YOB NWOMAA NE 34:27

ofikyɛ bali makyebu bɔ banni ye si ɔ, na bamva ye dwirɛ ne anu biala banyɛ huu.

Edwein 109:4

Bɛ nwo ɔdɔ bɔ manya ye ne, bɛto me soen bɛfa besi ye gya nu, wɔ aberɛ bɔ mebɔ mbaeɛ (mema bɛ) po ɔ.

Edwein 110:4

AWURADE ata ndaen, na ɔngɔsesã ye adwene: “Ɛte sɔfo afebɔɔ, kyɛ Mɛlkisɛdɛke deɛ ne ala.”

Edwein 119:136

Mebɔ me nye a, ɛmoen ngome tatatata, ofikyɛ mmenia nni wɔ mmeraa ne aso.

Edwein 125:5

Nakoso mmenia bɔ bedi makyebu bɛfa b’atee bɔ ɔndengyɛ so ne de, AWURADE kɔfa bɛ kɔfra amumuyɛɛfoɛ so kɔfoa bɛ kofi berɛ. Asomdwee ɔ́tena Yisrael!

Edwein 36:3

Ye noa nu dwirɛ te bɔne ne nnakannaka; na bra bɔ nworɛ wɔ nu ná ɔte paa de, wayakyi ye bɔlɛ.

Edwein 78:41

Besole Nyameɛ bɛneane mmerɛ pee, na bewurale Yisrael Krongronniɛ ne apue.

Edwein 78:57

na mmom belili ye nwo makyebu, na banni nahorɛ kyɛbɔ bɛ nana mɔ yɔle ne ala; bɛmane bɛ bra hyeale kyɛ agyaen bɔ wakondo ɔ.

Ɛksadɔso 32:11

Nakoso Mose pale AWURADE ye Nyameɛ kyerɛ kyɛ, “O AWURADE, wɔ mmenia bɔ ɛnate tumi piri ne anwoserɛ so ɛyele bɛ fili Misraim aseɛ so wale ne, nzu ati yeɛ afɛ bɛ so yaa piri sɔa ɔ?

Ɛksadɔso 32:14

Yiti AWURADE sesane ye adwene wɔ musue bɔ ɔyɛle kyɛ ɔkɔmaa ɔkɔto ye mmenia ne anwo.

Yeremia 11:10

Bɛ nana mɔ amumuyɛɛ bɔ bɛyɔle, bɔ banguro kyɛ bekotie me dwirɛ ne, basa baayɔ bie; baali nyameɛ foforɛ mɔ asi baso bɛ. Yisrael awuro ama ne Yuda awuro ama babu m’apam bɔ me ne bɛ nana mɔ yɛyɛle ne aso.

Yeremia 13:17

Nakoso sɛ ɛmɔngotie de a, ɔnate ɛmɔ anwomasoɛ ti, me kra kosũ wɔ mvealeɛ nu; me nye kohwi moen pupuropupuro, na me nye kɔporo moen, ofikyɛ bahye AWURADE mmoaen kure ne nnure bahɔ.

Yeremia 34:16

Nakoso ɛmɔsesane ɛmɔ adwene bɛfale efiɛ bɛhane me dumaa, na ebiala osa ɔɔhyele ye kanganiɛ bienzua anaa brasua, bɔ wamaa wafa ye nwo wali kyɛbɔ né ye nye la so ne, na ɛmɔsa bɛfale bɛ bɛwale ngoaasolɛ nu maa bɛɛyɛle ɛmɔ nganga ne afaneɛ mɔ.

Yeremia 9:1

Ao, ahaa né me ti te mbombonzue, ná me nye te abura bɔ opu moen ɔ. Ahaa eyia ne kɔngɔen ngosu me maen awa brasua ye mmenia bɔ bahũhũ bɛ ne!

Yeremia 9:18

Ɛ́mɔma bɛyɛ ndɛndɛ besu yɛ, amaa ɔnate so yɛ nye aporo moen, ná yɛ nye so aporo nzue.

Hesekiel 18:24

Nakoso sɛ teneneeniɛ twe ye nwo fi ye tenenee nwo, ná ɔkɔbɔ amumuyɛɛ bra, ná ɔbɔ akyiwadeɛ bra mukoraa bɔ bɔnefoɛ bɛbɔ ne a, yiti okonya ngoa anaa? Ye tenenee bra bɔ wabɔ amukoraa, mengɔkaye. Na ɔnate ye nahorɛ bɔ wanni bɔ odi ye nwo foɛ, ɔne bɔne bɔ wayɔ ne ati, okowu.

Amose 7:3

AWURADE hwe sale, “Ɔngɔwa ye sɔ,” AWURADE noa dwirɛ ɛne.

Yona 3:10

Na Nyameɛ nwuni bɔ bɛyɔle ne, kyɛ bayakyi bɛ bɔne yɔleɛ ne, yiti Nyameɛ sesane ye adwene wɔ musue bɔ ɔhane kyɛ ɔkɔprapra kogua bɛ so ne anwo, na wamma wando bɛ.

Yona 4:2

Na ɔbɔle mbaeɛ bisale AWURADE kyɛ, “Ao AWURADE, mesrɛ wɔ, mmerɛ bɔ né nwɔ me maen nu ne, aso nna edwirɛ he yeɛ ngane ɔ? Ye sɔ ti yeɛ nwatili kyɛ ahaa mekɔ Tasise ne, ofikyɛ mese kyɛ ɛte Nyameɛ bɔ ɛdo mmenia ná ɛse anwumvoin ɔ, w’ahone nhu ndɛ, wɔ ɔdɔ bɔ onni ngasi ne ɔte piri, na ɛsesã w’adwene wɔ musue bɔ ɛbaafa ba ɔ nwo.

Sefania 1:6

yeɛ bɛ bɔ bayakyi AWURADE sililɛ, bɛ bɔ bɛmbena AWURADE si atee bɔ bɛmva bɛ dwirɛ bɛndo ye nyunu ɔ.”

Mateo 24:13

Nakoso bɔ okotindim koodwu ayieleɛ nen, ye yeɛ bekole ye ngoa ɔ.

Mateo 5:44

Nakoso me de, mekã mekyire ɛmɔ kyɛ, ɛ́mɔhuro ɛmɔ pɔfoɛ mɔ dwirɛ, ná ɛ́mɔbɔ mbaeɛ bɛ́ma bɛ bɔ bɛtane ɛmɔ nye ɔ;

Luka 6:12

Sɔ mmerɛ ne anu, Yesu hɔle bokaa bie aso ɔɔbɔle mbaeɛ, na kɔngɔen ne amukoraa ɔbɔle mbaeɛ hyirele Nyameɛ.

Hebrifoɛ 10:38

Na teneneeniɛ de, ɔnate ye gyidie so yeɛ okonya ngoa ɔ; nakoso sɛ osa ye si de a, me kra nye ngɔgye ye nwo.”

Yosua 22:16

“AWURADE mmenia ne amukoraa nwa nyoo: Ɔwale ye sɛ, bɔ ɛmɔayɔ musue nikyee he batia Yisrael Nyameɛ, bɔ ɛnɛ ye de ɛmɔayakyi AWURADE si lilɛ ɔ; bɔ ɛnɛ ye de ɛmɔasi ɛmɔ bɔbɔ b’afɔleɛ bokyea bafa bayɛ AWURADE nwo lɔen ɔ?

1 Samuel 12:23

Yeɛ me koso, ɔngɔwa ye sɔ le, kyɛ ngɔyakyi ɛmɔ nwo mbaeɛbɔlɛ maa ɔnate so ngɔyɔ bɔne ngotia AWURADE ɔ. Atee bɔ ɔte paa ná ɔtengyɛ ne yeɛ ngohyirehyire ɛmɔ ɔ.

1 Samuel 13:13

Na Samuel sele ye kyɛ, “Ali ngwaseasɛm! Anni AWURADE wɔ Nyameɛ mmeraa bɔ ɔhyɛ mane wɔ ne aso. W’ahennie ne, ahaa AWURADE kɔma ye bo kotimu wɔ Yisrael daa,

1 Samuel 15:10

AWURADE lale ye dwirɛ ali hyirele Samuel kyɛ,

1 Samuel 15:3

Yiti kɔ na kohũ Amalɛkefoɛ, ná sɛkye bɔ bele ye amu bɔkɔɔ. Nnɛma ebiala nya ye ti didi nu, na mmom ku mmienzua ne mmrasua, ngwadaa ne nnɔma, nandwie ne mmoaen, afupɔngɔ ne afunum.’ ”

1 Samuel 15:35

Na Samuel nye ammɔ Sɔɔlo nyunu ko kɔpem kyɛ Samuel wuli ɔ, nakoso Samuel lili Sɔɔlo nwo aworabɔlɛ. Na ɔyɛle AWURADE yea kyɛ wafa Sɔɔlo wali Yisrael so hene ɔ.

1 Samuel 15:9

Sɔɔlo ne koɛhonɛfoɛ nemɔ bangu Agage, mmoaen ne nandwie paa nemɔ, nandwie sayɛɛ nemɔ, ɔne mmoaen mmaa nemɔ, yeɛ banzɛkye nikyee biala bɔ ɔte paa ɔ. Banguro kyɛ bekohu bɛ ɔ. Nakoso nikyee biala bɔ bebuli ye kyɛ ɔtte mayee ná ye nwo olle mvasoɛ ne de, bɛsɛkyele ye bɔkɔɔ.

1 Samuel 16:1

AWURADE bisale Samuel kyɛ, “Kyinzu koraa yeɛ ekoli Sɔɔlo nwo aworabɔlɛ maa okoodwu ɔ? Maye me sa mafi ye bo maa ye sɔ ati ɔtte Yisrael so hene ko. Fa ngoo gua wɔ towaa ne anu ná si nu kɔ. Mésoma wɔ Betlehemniɛ Yese berɛ, ofikyɛ ye mma nemɔ anu ko yeɛ me bɔbɔ maye ye kyɛ oli hene ɔ.”

1 Samuel 8:6

Nakoso bɛhane kyɛ, ‘Ma yɛ hene ma ɔla yɛ noa’ ne, wanyɛ Samuel fɛ. Yiti Samuel fa tole AWURADE nyunu,