1 Korintofoɛ 5:8 - AHYERƐLƐ KRONGRON

⁸ Yiti nnɛmɔma yɛfa mɔle harewaa daa ne, bɔ ɔte bɔne ne amumuyɛɛ yɛdi aluolue ne, na mmom ɛ́mɔma yɛfa mɔle kabrɛdi bɔ ɔte adwene bɔ nu te ɔne nahorɛlilɛ ne yeɛ yɛli ɔ.

1 Korintofoɛ 5:8 Iomraidhean Croise

Edwein 32:2

Sona bɔ AWURADE mva ye amumuyɛɛ mmɔ ye kwaadu, bɔ nnakannaka suban biala nne ye nu ne, onya saleɛ.

Edwein 42:4

Mekaye sɔ dwirɛ hemɔ a, né me kra wora abɔ: kyɛbɔ me ne ɛlɔen ne yɛhɔle, ɛlɔen kandinga bɔ bedi aluolue ne, bɔ nne esebɔlɛ ne asennaa dwein, nnili folii ne nyunu ngɔle Nyameɛ awuro ne.

Ɛksadɔso 12:15

“Ɛmɔkoli paanoo kabrɛdi ɛlɛsoo. Kyẽa bɔ oli moa ne, ɔsɛ kyɛ ɛmɔye mɔle harewaa biala befi ɛmɔ awuro mɔ nu, ofikyɛ ofi kyẽa bɔ oli moa ne alaa bɔ ɔkwaadwu kyẽa bɔ ɔtɔ so nzoo nen, sona biala bɔ okoli mɔle harewaa ne, bɛkɔpɛ ye asue bekofi Yisraelfoɛ nu.

Ɛksadɔso 12:19

Ɛlɛsoo ne anu, ɔnzɛ kyɛ benwu mɔle harewaa wɔ ɛmɔ awuro; ofikyɛ ebiala bɔ okoli mɔle harewaa nen, sɛ ɛwɔfoɛ ahɔ oo, anaa bɛwole ye maen ne anu oo, bɛkɔpɛ sɔ sona ne asue bekofi Yisraelfoɛ nu.

Ɛksadɔso 12:8

Ɔsɛ kyɛ bɛtoto naen ne bedi ye sɔ kɔngɔen ne, ná bɛfa paanoo kabrɛdi ne awɔwee nyaa bɛboka so.

Ɛksadɔso 13:6

Di paanoo kabrɛdi ɛlɛsoo, ná di aluolue ne fa ye AWURADE ayɛ wɔ ye ɛlɛsoo ne aso.

Ɛksadɔso 13:7

Ɛlɛsoo yeɛ ɛ́mɔli paanoo kabrɛdi ɔ; ɔnzɛ kyɛ benwu paanoo harewaa biala wɔ ɛmɔ berɛ, anaa mɔle harewaa wɔ ɛmɔ aseɛ so nekaa biala.

Yesaya 25:6

Bokaa he aso yeɛ Asafo AWURADE kɔto poen kɔma maen amukoraa ɔ: Ɔkɔma bɛ aleɛ paa, nzaa paa, naen bɔ bowue nu fonyi wɔ nu, yeɛ nzaa bɔ basongyi so ɔ.

Yesaya 30:29

Ɛmɔkɔto dwein bɔ ɔte kyɛ aluolue krongron dwein bɔ ɛmɔto ye kɔngɔen ne; na ɛmɔ nye kɔgye kyɛbɔ ɛmɔhu aweɛn besi nu bɛkɔ AWURADE bokaa ne aso, Yisrael Nyɔbotaen ne aso ɔ.

Lewitikɔso 23:6

Sɔ bosome ne ala, ye kyẽa bɔ ɔtɔ so buru ne nnu ne, ɔte Paanoo Kabrɛdi aluolue ma AWURADE; odi kyɛ ɛmɔdi paanoo kabrɛdi ɛlɛsoo.

Mateo 16:12

Afei bɛtele ye bo kyɛ nna paanoo harewaa yeɛ osele bɛ kyɛ bɛ́nea bɛ nwo yé wɔ ye nwo ɔ, na mmom Farasiifoɛ ne Sadusiifoɛ bɛ ngyerɛkyerɛ nwo.

Mateo 16:6

Yeɛ Yesu sele bɛ kyɛ, “Ɛ́mɔnea yé; ɛ́mɔnea ɛmɔ nwo yé wɔ Farasiifoɛ ne Sadusiifoɛ mɔle harewaa nwo!”

Marko 8:15

Na Yesu bɔle bɛ kɔkɔ kyɛ, “Ɛ́mɔnea yé, ɛ́mɔnea ɛmɔ nwo yé wɔ Farasiifoɛ mɔle harewaa ne Herode mɔle harewaa nwo.”

Luka 12:1

Sɔ mmerɛ ne, né mmenia apee apee bahyere so bɔ betiatia bɛ nwo so ɔ. Na Yesu hyɛle ye bo lili moa sele ye asuafoɛ nemɔ kyɛ, “Ɛ́mɔnea ɛmɔ nwo yé wɔ Farasiifoɛ mɔle harewaa bɔ ye ole nyaatwomyɛlɛ ne anwo.

Yohane 1:47

Na Yesu nwuni kyɛ Nataneɛl ɔba ye berɛ nen, ɔhã fale ye nwo kyɛ, “Ɛ́mɔnea, Yisraelniɛ turoloo bɔ ngondombo biala nne ye nu ɔ!”

1 Korintofoɛ 3:3

Ofikyɛ ɛmɔ brabɔlɛ tɛte kyɛ ewiasefoɛ abrabɔ. Na aberɛ bɔ anyeboroborolɛ ne apindapinda wɔ ɛmɔ afia ye de, aso ɛhe ngyire kyɛ ɛmɔte anwoɔnaenufoɛ bɔ ɛmɔ yɔleɛ te kyɛ ewiasefoɛ ɔ?

1 Korintofoɛ 5:1

Baahã ye susu amba kyɛ ɛmɔ nu biemɔ bɔ adwaman, bɔ ye sɛso nne ewiasefoɛ po nu ɔ, ofikyɛ ebie fa ye baba aye.

1 Korintofoɛ 5:6

Ɔnzɛ kyɛ ɛmɔhoahoa ɛmɔ nwo. Ɛmɔnze kyɛ mɔle harewaa kãa bie yeɛ ɔfra mɔle torɛ ne amukoraa nu maa ɔkeka ɔ.

2 Korintofoɛ 1:12

Bɔ yɛfa yɛhoahoa yɛ nwo ɛhe: yɛ tiboa di yɛ adanzeɛ kyɛ yafa nahorɛlilɛ ne nyamesuro yeɛ yabɔ yɛ bra wɔ wiase ɔ, nganga yɛ ne ɛmɔ asetena nu. Yamva ewiase nworɛ so yeɛ yɛbɔle yɛ bra ɔ, na mmom yɛnate Nyameɛ adom so.

2 Korintofoɛ 2:17

Yɛ de, yɛtte kyɛ mmeni pee bɔ bɛnate besi Nyameɛ dwirɛ ne aso kongo ne. Na mmom yɛbɔ Kristo nwo dawure nahorɛ nu wɔ Nyameɛ nyunu kyɛ mmenia bɔ Nyameɛ asoma bɛ ɔ.

2 Korintofoɛ 8:8

Mendwudwo nhyɛsoɛ so, na mmom mefa ebiemɔ mmɔdenbɔlɛ metoto ɔdɔ bɔ ɛmɔle ye ne anwo menea kyɛ sɛ ɔte kaenn a.

Ɛfesofoɛ 6:24

Bɛ bɔ befi b’ahone nu bekuro y’Awurade Yesu Kristo dwirɛ amukoraa ne, adom ɔyɛ bɛ deɛ.

Deuteronomi 16:16

“Afoɛ biala, ɔsɛ kyɛ wɔ mmienzua mukoraati ba AWURADE wɔ Nyameɛ nyunu pɛen nza, wɔ nekaa bɔ okohyire ne: wɔ Paanoo Kabrɛdi aluolue ne, Dapɛn Dapɛn aluolue ne, yeɛ Asese aluolue ne anu. Nnɛmaa bɛfa bɛ sa mbaen bɛba AWURADE nyunu.

Deuteronomi 16:3

Nnɛfa paanoo harewaa bɔ naen ne aso di. Fa paanoo kabrɛdi bɔ naen ne aso di ye ɛlɛsoo. Ɔte amaneɛnwunɛ paanoo, ofikyɛ ndɛndɛ so yeɛ etu fili Misraim aseɛ so ɔ; amaa ɔnate so mmerɛ biala bɔ ɛte ngoa nu ne, akaye kyẽa bɔ etu fili Misraim aseɛ so ɔ.

Yosua 24:14

“Yiti ɛ́mɔsuro AWURADE ná ɛ́mɔso ye ferengyemm ne nahorɛ nu. Na mmosoen bɔ ɛmɔ nana mɔ sole bɛ wɔ asue Yufreti asi dɔ, ɔne Misraim nen, ɛ́mɔgyi bégua ná ɛ́mɔso AWURADE.

1 Petro 4:2

na anwoɔnaen nu asetena mmerɛ bɔ waha ne, ɔndena ase mma sona akɔnnɔ ko, na mmom ɔtena ase ma Nyameɛ apɛdeɛ.