1 Korintofoɛ 5:13 - AHYERƐLƐ KRONGRON

¹³ Na Nyameɛ yeɛ okobua bɛ bɔ bɛnne ɛmɔ fekue ne anu ndɛen ɔ. Yiti ɛmɔfoa amumuyɛɛniɛ ne béfi ɛmɔ nu.

1 Korintofoɛ 5:13 Iomraidhean Croise

Edwein 50:6

Ewienu bɔ ye tenenee nwo dawure, ofikyɛ Nyameɛ bɔbɔ te ndɛenbualɛniɛ. Sela

Nworɛ Dwirɛhanɛniɛ 9:18

Nworɛ nwo hia tra akodeɛ, nakoso bɔnefoɛ komapɛ sɛkye paa pee.

Mateo 18:17

Na sɛ wandie bɛ koso a, kɔhã kyire asɔre ne. Na sɛ wandie asɔre ne koso a, ye de bu ye kyɛ bosoensolɛniɛ ne ɛtoɔdidelɛniɛ.

Asomafoɛ 17:31

ofikyɛ watu kyẽa ko bie wasie berɛ, bɔ ɔkɔfa sona bie bɔ waneanea nu waye ye ɔ so kobua ewiase amukoraa ndɛen tenenee nu ɔ. Na wali ɛhe nwo adanzeɛ wahyire wɔ etingyɛlɛ bɔ otingyele ye fili awufoɛ nu ne, kyɛ mmenia amukoraa bele ye beli.”

Romanfoɛ 2:16

Yiti kyɛbɔ me nzɛmba ne okyire ne, sɔ kyẽa ne, Nyameɛ kɔfa Yesu Kristo so kobua sona biala ye mvealeɛ nu dwirɛ nwo ndɛen ɔ.

1 Korintofoɛ 5:1

Baahã ye susu amba kyɛ ɛmɔ nu biemɔ bɔ adwaman, bɔ ye sɛso nne ewiasefoɛ po nu ɔ, ofikyɛ ebie fa ye baba aye.

1 Korintofoɛ 5:2

Nakoso ɛmɔhoahoa bɛ nwo! Ɛmɔ wora mmom yeɛ ɔsɛ kyɛ ɔbɔ ɔ, ná ɛmɔye sona bɔ wabɔ sɔ musue ne befi ɛmɔ nu.

1 Korintofoɛ 5:5

odi kyɛ ɛmɔye sɔ sona ne bewura Abɔnzam sa maa ɔsɛkye ye nwoɔnaen ne, amaa ye sunzum anya daa ngoa wɔ Awurade Yesu kyẽa ne.

1 Korintofoɛ 5:7

Yiti ɛ́mɔye mɔle harewaa daa ne befi ɛmɔ nu amaa ɛmɔayɛ mɔle torɛ foforɛ, kyɛbɔ ɛmɔte kabrɛdi ne ala. Ofikyɛ bafa Kristo bɔ ɔte y’Abɔtra boaen ne babɔ afɔleɛ bama yɛ.

Deuteronomi 13:5

Nakoso sɔ ngɔmhyɛlɛniɛ anaa sɔ sona bɔ ɔnate laleɛ so hyɛ ngɔm ne de, ɛ́mɔhu ye, ofikyɛ wafa ye noa dwirɛ wabɔ mmenia asɔne wafi AWURADE wɔ Nyameɛ bɔ ɔyele ɛmɔ fili Misraim aseɛ so, ná olele wɔ fili ngoaasolɛ nu ne nwo. Na ɔtwetwe wɔ fi atee bɔ AWURADE wɔ Nyameɛ hyɛle wɔ kyɛ ɛfa so ne aso. Yiti ɔsɛ kyɛ etu bɔne ne bo fi wɔ nu.

Deuteronomi 17:12

Na sɛ ebie yɛ anwomasoɛ, ná wandie ɔsɔfo bɔ baye ye kyɛ ɔ́yɔ ɔsɔfo adwuma wɔ berɛ ma AWURADE wɔ Nyameɛ ne, anaakyɛ ndɛenbualɛniɛ ne a, ɔsɛ kyɛ beku sɔ sona ne. Yiti ɔsɛ kyɛ etu bɔne ne bo fi Yisrael.

Deuteronomi 17:7

Adanzefoɛ nemɔ, ɔsɛ kyɛ bedi moa bɛboro sona bɔ babua ye ewue foɛ ne nyɔboɛ koraka, ná afei mmenia ne amukoraati baboro ye nyɔboɛ bie. Yiti ɔsɛ kyɛ etu bɔne ne bo fi wɔ nu.

Deuteronomi 21:21

Na afei ɔsɛ kyɛ kuro berɛ ama mukoraati boro ye nyɔboɛ beku ye. Yiti ɔsɛ kyɛ etu bɔne ne bo fi wɔ nu; na Yisrael mukoraati kɔte ná basuro.

Deuteronomi 22:24

odi kyɛ ɛmɔfa bɛ munyɔ bɛba kuro berɛ pambim ne anu, ná ɛmɔboro bɛ nyɔboɛ beku bɛ. Ɛ́mɔhu braa ne, ofikyɛ né ɔwɔ kuro nu, nakoso wandeatea nu wamvrɛ mmenia; ɛ́mɔhu biaa ne koso, ofikyɛ wafa obiɛngo aye. Yiti ɔsɛ kyɛ etu bɔne ne bo fi wɔ nu.

Hebrifoɛ 13:4

Odi kyɛ ebiala di agyaa ni, na nnɛma ebiala gua agyaa mba nwo fiɛ, ofikyɛ Nyameɛ kobua adwamanbɔlɛfoɛ ne agyaasɛkyelɛfoɛ ndɛen.

2 Petro 2:9

né nzaade Awurade se atee bɔ ɔfa so ɔpepɛ de bɛ bɔ besuro ye ɔ fi nzɔhwɛ nu, ɔne kyɛbɔ ɔtwe bɛ bɔ bɛndengyɛ so ɔfa nwondɛ ndɛenbualɛ kyẽa ne ɔ,

Maenbulɛfoɛ 20:13

Sɔ busuefoɛ bɔ bɛwɔ Gibea ye, ɛ́mɔye bɛ bɛma yɛ kekesaala ye maa yɛhu bɛ, ná yɛkyikyi bɔne ne yɛfi Yisrael.” Nakoso Benyaminfoɛ bandɛ b’eliɛma mɔ Yisraelfoɛ so.